يانـجـم يالـلـي غـبت من غـبت مـا بـنـت

[همس شاعر]

السلام عليكم ورحمة الله وبركاته تحية طيبة وبعد

قصيده
-
-

الشاعرالراحل :منصور بن سعدي الرمالي الشمري





يانجم ياللي غبت من غبت مـا بنـت
وشحـال بيـن أيـام مجـدك وبينـك

الشمس تطلع وأسأل الصبح وين انـت
وتغيب شمسي وأسـأل الليـل وينـك

وين إنت أنا منهـان منهـان لاهنـت
منهان مـن شخـص عجـز لايهينـك

إرجـع متـى ترجـع أنـا انهـنـت
وسجنت واللي سجني كان قبلي سجينك

إرجع ورجّع مجد ماضـي كمـا كنـت
ورجّع مـن المديـون للنـاس دينــك

ياقاسي فـي وجـه الأضـداد مالنـت
ومن صاحبـك ينعـم بعطفـك ولينــك

حتى على خصمك من احسانك احسنت
وياماعطت مـن كـل غالـي يمينــــك

بالسيف في شبه الجزيرهـة تسلطنـت
أخضعـت أهلهـا وملكـنـه يديـنــــك

مثـلـك ولــد والـلّـه فلاجابـتـه بنت
لاشـك عيّـن يمهلنـك سنينـــــــــك

أقولها وين إنت وأنـا أدل ويـن إنـت
لاشك مـن زود القهـر قلـت وينــك

ويا قصر ياللي بدلوا طينـك اسمنـت
احذر تخون وتنكـر أصحـاب طينـك

اللّه يخونك كان لأهـل الوفـا خنـت
وأوفيـت للـي بالخـفـا خاينيـنــــك

ياقصر لاتسكن وإن انضمت وسكنـت
اخفس قهر واخفـس معـك ساكنينـك

ياقصـر مهمـا زينـوا فيـك مازنـت
زينك رحـل وإن عادلـك عـاد زينـك

[ديكتاتوري]

ياقصـر مهمـا زينـوا فيـك مازنـت ... زينك رحـل وإن عادلـك عـاد زينـك


همس شاعر .. كفـــووووو يالذيب .. وربي ذوق لا لا لا الذوق يتعلم منك يااستاذي

ياخي ذي القصيده اذا قريتها تجيني قشعرينه

فديتك وفديت ذوقك ياذوق .. ودي اعبر لك وش قد انا معجب في ذوقك واختيارك للقصائد بس للأسف خانني التعبير

مااقول الا سلمت يمينك يابعدي

[القروي]

الحمدلله
قصيده رائعه في مضمونها وقافيتها
والله يرحم راعي القصر
واقول ان شاءالله مايخفس بساكنينه والله يعطيهم العزويرزقهم البطانة الصالحه .

[المزارع]

منصور سعـدي الرمالي الشمري ( يرحمه الله )
كنت اتمنى لو كان في زمن شاعـر المليون
مبدع ، مبدع ، بكل ماتعني الكلمة من معنى
تخصص احزان ان جاز التعبير
اليكم احـدى قصائدة النادرة والتي قل من اطلع عليها

انا يوم ميلادي صدف مولد المأساة
كبرت ومعي كبرت همومي ومأساتي
------------------------
انا للأسى مرسى وانا شاطي الآهات
ولا للأمل مرسى على ساحل آهاتي
--------------------------
انا الياس لي موطن وانا موطن اللوعات
تضيع السعادة بين ياسي ولوعاتي
------------------------
انا الماضي الهارب من الحاضر اللى فات
وانا الحاضر الهارب من الماضي الآتي
-------------------------
مواطن بلا موطن ولا لي وطن واثبات
سوى اني بشر حساس واحساسي اثباتي
---------------------------
وانا عادتي محسب على غيري الزلات
ولكني ابكي لاتذكرت زلاتي
--------------------------
انا يوم غيري عاش في دنيته لذات
انا عيش في عزلة والاحزان لذاتي

انا يوم غيري ياسعد همه السفرات
مع الهاجس اللى يخفق الطير سفراتي

انا يوم غيري هام مع الضحك والسهرات
مواعيدة افراح وله الهم ماياتي

انا موعدي في كل يوم مع النكبات
وانا حظي العاقر سبب كل نكباتي

وانا يوم غيري ياسعد في منامه بات
اخوك المعنى يسهر الليل ماباتي

وانا ياسعد حيلي تردي وجسمي مات
وبقي القلب ينبض ياسعد والجسد ماتي

اعيش العذاب بكل لحظة من اللحظات
من الهم تمضي كنه ايام لحظاتي

غدرني زماني ياسعد واخلف الهقوات
غدر وانقلب واخلف ضنوني وهقواتي

وحتى الصديق اللى وقفنا معه وقفات
تنكر معي وانكر جميلي ووقفاتي

صديق المصالح لك يجيلك ساعة الحاجات
واذا كان ماله فيك ملزوم ماياتي

واذا صار لك مطلب تعذر عديم الذات
عديم الوفا والمعرفه تنكره ذاتي



000

[شمري قطري]

جزاك الله خير على النقل الجميل
والله يرحم الشاعر منصور الرمالي
شمــري قطــري

[القروي]

الحمدلله
بارك الله فيك يالمزارع على ايراد هذه الموعظه التي تنذر وتحذّر عن بعض الهقوات
والظن الطيب في اناس ليسوا اهلاً لها
اشكرك وواصل بما تحفظ من هذه الروائع انستنا انسك الله بالعافيه .

[همس شاعر]

اخوي دكتاتوري الذوق ذوقك يابعدي وشكرا على مرورك وتشريفك

[همس شاعر]

القروي شكرا على مرورك وتعليقك على القصيده

[همس شاعر]

اخوي المزارع اشكرك على مرورك


واضافتك للشاعر المرحوم منصور الرمالي


هذا الشاعر الرائع والمميز وعشقه للصراحه حتى لو على موته

وسلمت اناملك ودمت بود

[همس شاعر]

شمري قطري حياك الله وشاكر لك على مرورك وتعليقه


ودمت بود

[رفحاوي]

صح لسانك ولسان الشاعر (الله يرحمه) ولسان المزارع ...

شعر واختيار راقيين ...

مشكووووووووووورين

[همس شاعر]

رفحاوي حياك الله وصح لسان المزارع واضافته الحلوه للشاعر


ودمت بود