بين رفحا و العويقيله

[سعود الشمري]

دخيل الله من جور اللـزز هـمٍّ وضيقـة بـال =سباقٍ فـي وسـط صـدري مقافيـه ومقابيلـه
يتلّ الشوق معلاق الحشـا ودّه بشـوف رجـال =تركناهم على سيف البحر غصـبٍ بـلا حيلـه
ليا حاولـت اقـرّب عهدهـم بمكالمـة جـوّال =تزايد رغبتي فـي شوفهـم مـع كـل تقفيلـه
أسلي خاطري في بعدهـم وآجـر لـي مـوّال =وادوج بموتـري مـا بيـن رفحـا والعويقيلـه
وانـا لله حشـا مـا اذمّ قـومٍ بينهـم نــزّال =ينابيـع الكـرم لا جـا مجالـه دبّلـو كيـلـه
زحولٍ تنطح الشور العسير وفي الشداد جمـال =تلبـي مـن زهمهـا ترتكـي للحمـل وتشيلـه
ولكن النفوس لهـا عربهـا والـدروب طـوال =خذت في ذكرياتي صوبهـم سفـره وتوصيلـه
ليامنّه نشدني من لقيـت وقـال كيـف الحـال =أقول بخير . واقصر بالخبر واخفـي تفاصيلـه
على الله والسنه تقضي ونسمع صوت راعي فال =يبشّـر لـه معلّـم يرتجـي نقلـه وتحويـلـه
نعـوّد صوبكـم يـا ربعنـا نتنـاول الفنجـال =نسولف عن زمانٍ قـد مضـى دارت فناجيلـه











منقوله

[أنا والليل؟]

صح لسانك على النقل المتميز



يعطيك العافية

[سعود الشمري]

صح لسانك على النقل المتميز



يعطيك العافية



ياهلا وغلا بصاحبنا الكريم

حياك وصح بدنك وعفاك ربي

وشكرا لمرورك العطر لاهنت

[سعود الشمري]

يعطيك العافيه


ياهلا بالاخت وجد

الله يعافيك وشكرا لمرورك

[القروي]

دائماً ماتجيب الا المتميّز
صح لسانك على النقل الموفّق .

[سعود الشمري]

ياهلا وغلا بابو سامي شكرا لمرورك الله يعافيك لاهنت

وصح بدنك ياغالي