الوصفه الهنيه ؟ في عمل الجمريه

[هرطمان]

انا ما اعرف للطبخ لامن ابي اشارك معكم واكيد اتطور

الجمريه وبعضهم يسميها قرص جمر


المقادير

طحين حسب الرغبه
وملح حسب الرغبه
تشب الحطب ( تولع النار )
تضع الطحين بالمعجانه وتضيف بعض الماء وتبدأ بعجن الطحين
وكل شوي تضيف ما بس لا يكثر الما
وتعجن وتكون العجينه ماهي طريه واجد مثل خبز الصاج
لا
تكون اقرب للتماسك القوي

تفرد العجينه في صحن وتقترب من النار وهي جمر

تاخذ الملقاط وتمسك بالجمر
وتبدأ تكوي العجينه ( اكثر من كوي الخشه شوي )
وتغير الجمره وتكوي
ثم الجهه الاخرى
بعد الكوي تصير متيبسه حتى ما يدخل به تراب ( بوجه العدو )
ثم تضعها بالمله حتى تستوي
وانتبهوا تكلونه نيه تراه تسبب الموليه

يمكنكم ايضا حشوها باللحم وبعضهم يخلط معها شرائح البصل

ثم تقدم مع كاسة شاهي على الجمر ايضا :)
والسمن العربي الاصلي


وبالهنا والعافيه
وبالهنا والعافيه

[حنين الماضي]

الله يعطيك العافيه منتب هوين :D
لا والقصمان يسمونه قرص خلا
بس أنا أدخله بدون كوي وإلا طلعته حكيت اليابس والمحرق منه ويصير معه التراب

الله يسلمك على ذكريات البر والشبه

[رفحاوي]

اخوي الغالي / هرطمان ...

انت نادر الوجود في هذا الزمن ... انت بلسم وغيرك علقم ...
لو جلست من هنا الى باسر امدحك ما وفيتك لو جزء يسير من قدرك فلذلك ساختصر على نفسي واقول انت هرطمان ...

ايه هذا الشغل اللي يسوى مهو كيك وبسكوت ( الحمد لله على النعمة ) ... اللي اول ما تاكله يجيك اسهال ( تكرم) ... بحياتي انمرضت مرتين الاولى يوم اكلت تبولة والثانية يوم شربت كافي ( الله يكفينا الشر ) ...


اقول هاضت عبرتي وجددت جروحي يا فلان ...
تذكرت ايام راحت بالنفود الله يذكره بالخير ...
تهقى يجي يوم وارجع للنفود نوبتن ثانية ؟!!

[عاشقة الجهاد]

السلام عليكم ورحمة الله
اكتشفنا خبرة طهي جديده اكتست بلباس التواضع :)
شكرا لك أخي الكريم لقد بدا لي هذا الطبق لذيذا وبخاصه أنه يطهى على الجمر
إن أذنت لي أيها الفاضل باستفسار بسيط واعذرني فأحد الإخوة علق على ثقافتي بالفرنسيه:rolleyes:
من سياق الشرح فهمت أنكم تطهون هذا الطبق على الجمر مباشرة فهل هذا صحيح ؟ ثم ألا يحترق بسرعه دون أن ينضج؟ وكيف أعرف بنضجه وقد تم كيه من جميع الجهات؟
لك خالص شكر يتلوه شكر

[أبو هيا]

الاخ/هرطمان..
صباح الخيرات...ياخي وش سويت بالبروسيجر حق الجمريه..
اول مره اسمع بالكوي هذا..
اخوي الغالي انا اشهد انك ماقصرت بس لو تشرحلي الفرق بين الموليه والزائده الدوديه...

[الدب الداشر]

مشكوووووور حجي هرطوووووووومي
تسلم الله يزووووووووجك ام اررررربع طعش "ام اربع طعش ورع"

اختي عااشقة الجهاااد ماتتسوى الجمريه غير يكون فيه رماد"سمااد"

عشااانه يكوون ساااااخن وماايحرقهاا

الحجي حموود متأثر بالأمريكاااااااان اللي ساااكن عندهم

شيبااانااا ولله الحمد 24 ساااعه يآكلون جمري وبالذااات بالشتااااء

ولله الحمد سليمين

[الحلوه أم قصه]

ايوااااااااااااااااااااااااااااااا احلىىىىىىىىى يا حركاااات يا هرطمان رغم اني ما عرفت الطبخه هذي
وبعدين تعال هنااااااا ليه تنافس الدب الداشررر:\:\

عموما مشكور واتمنى لك مزيد من التقدم في عالم الطبخاااااااااات:D

انتبه من الدب الداشررررI-اكيد بيتوعد لك I-

[عاشقة الجهاد]

عجبا أخي ... تضعونها على الرماد مباشرة دونما إناء؟!
وهل المله تعني الرماد؟

شكرا لتقضلك بالإجابة نيابة عن أخينا

[هرطمان]

اول شئ اشكر الجميع على المرور والمشاركه
وما توقعت هالتفاعل شكلكم بترفعون بي تخلوني اداوم بكره بحدى المطاعم ونستلمكم بالاجابات

الاخت حنين الماضي
اصلا انتي لازم تشاركين بالموضوع لانك راح تحنين للماضي

ولو بالنسبه لطريقتك تراها ماش :-/
يعني ماشيه معك لاكن فيه ناس ما يفضلونها لانهم يستمتعون بتعذيب
الجمريه علشان الي يشوفهم يرحمها عند الاكل:D

اخوي رفحاوي الرائع
يولد انتفخ راسي تقول عجينه حاطين عليها خميره
يعني هالحين ابي لكي مخطر علشان يخف راسي

ايه يارفحاوي
تجي بالسلامه وتلقى الربيع وتسوي الجمريه
وتخلي عيالك ينشدونك وشي هاذي يا بابا تقولهم هاذي بيتزا بدو :D
ذكرتني بواحد اعجبه البقل وهو نويعم
يقول عطوني بسكوت ابو بصمات :p

الاخت عاشقه الجهاد
الله يعطيك العافيه ذكرتيني بشي
ترى الجمريه تكون سميكه يعني من 2 سنتي وحولها ودائري والقطر حسب الرغبه وحسب النار
لا حنا بعد ما نكويها ونحرك الجمر حتى يجف السطح
نزيح الجمر ونصل الى شي من السماد والتراب ( المله ) الحار جدا وفيه جمر صغير
على قولة الشاعر
ما غير اتقلب كن جنبي على مله
وفي الحديث عن قطع الرحم ( فكأنما تسفهم المل )
اسف على اللاستطراد
نقوم بدفنها ثم نغطيها من اعلى بالمل ثم نضع الجمر من اعلاها
وتبين النضج بالوقت التقريبي والحفر عنها وابقاءها بعد ذلك على المل عند الحاجه لاستكمال النضج
وترى بتلقين جمره لا صقه عادي ما تزعل
وتوقفينها وتضربينها ( جلد ) بالملقاط ليطير عنها السماد والجمر
:mad: شكلها تعذيب حرق وضرب لازعلت على واحد قل والله لا اسويك جمريه :D
حمودي
الله يعطيك العافيه وبالنسبه للموليه هي بنتاخي الزايده
بس حنا يوم نتكلم عن الجمري نقول موليه
ويوم نتكلم عن التيوله نقول زائده

دبدوب الحبوب شكرا على التوضيح والمساعده شكلهم بيكتشفون اني مبطي عنها ;)

الحلوه الله يعطيك العافيه
هاذي بيتزا مل على وزن بيتزا ان
جربيها مره مش حت سيبيها بالمره
وخاصة بالشتاء
وقطعيها قطع زي الفتيت مخلوطه بالسمن العربي الحر اممممممممم


والله يعطيكم العافيه كثر مامشت الدجاجه حافيه

[هرطمان]

عاشقة الجهاد تراني ما دريت عن سؤالك شكلي بلشان بالرد وانتي سالتي وما دريت

يمكن صار واضح الجواب واي استفسار حنا جاهزين

[عاشقة الجهاد]

شكرا لك أخي الكريم
اتضحت الرؤيه الآن واعذروني لجهلي ببعض الكلمات الرفحاويه
سأحتفظ بها وأسعى بإذن الله لتجربتها متى تيسر لي الوقت والرحله :)