كل ما سالتك قلت مشغول يامناحى
السلام عليكم ورحمة الله وبركاته
اصبح وامسى على اخوانى واخواتى بالمنتدى الجميع دون استثناء ونرجو السموحه منكم على طول الغياب بس على قولة مناحى ................هذا خويي للعلم فقط وعلى قولة رحمت نهههههههابه الله يغفر له . يابناخييى ( يعنى انا ) الدنيا تموحبنا منا ومنا ........هذا مشروع مثل شعبى يدل على الانشغال الدائم .
عموما نرجع لمناحى ...............مناحى هذا اكسبلوسف ماى مايند يعنى فجر مخى ...وفى تعبير اخر دبل كبــــــــــــــــدى.
كل ماتصل فيه مايرد وانا والله بس ابي اسلم ليس لى به حاجه .......نطعم بالفصيح شوى لزوم الحبكه.
واذا رد دايما يبادر برده المعهود ...والله ياخوك مشغول حدى ماقدر احك راسى من الاشغال
اسمحلنا مثلك يعذر.
وانا دايم اسامح قلبى طيب . وفى يوم من الايام ...يعنى انتبهوا بدت القصه
كنت ابى مناحى ضرورى جدا جدا جدا وكنت بالسياره واتصلت فيه ورد على مناحى جيتس جيتس اسم ابوه ولاقصورا بابوه قلت يامناحى وينك ياخوى ابيك بشغله بسيطه ماتاخذ من وقتك الثمين شى . قال ياخوك والله مشغول اعذرنى واثناء حديثى معه لمحت سيارته عند واحد من الربع قاعد ببيت شعر ووقفت وانا اكلمه قلت شعندك الحين من شغل ابيك قال لا ياخوك الحين بالذات ماقدر عندى شغل ضرورى جدا خلها لظروفها ....قلت وشو شغلك الحين بالضبط وش تسوى قال انا مشغول الحين حيل اذا شفتك اشرحلك . ....وذهلت من رده وشكيت بنفسى قلت يمكن انا ثقيل طينه ومايبى يكلمنى . اتصلت على كذا واحد من الشباب
قلت اتصلو عليه ابى اعرف لييييييه مايفضى نفسه شوى لى المهم اتصلو عليه العيال رد عليهم نفس الرد ......... الظاهر كان يعد الارانب ببيت الشعر .
المهم قررت اتابع هالانسان المشغوول دايما من بداية الصباح حتى نهاية اليوم .
مناحي هذا يقعد الصبح مايروح الدوام اكثر ايامه غياب واذا قعد راح متاخر قعدله ساعتين وطلع رجع البيت ونام وقعد المغرب او العشا وبعدها يدور القعدات مصحصح ابو غيتس ويلغى امثاله كثير يروح الاستراحه الساعه 9 ويقعد ابو شغل لصلاة الفجر ويرجع البيت واذا سالته المره .....يابن الحلال شفيك متاخر ماوديت الوغد للطبيب .... الوغد لغتة يعنى الاحمق وبلغتنا يعنى طفل وجب التنويه لا اكثر المهم اذا سالته انجن عليها وقال انا وين اوديه والله ماقعدت راحه مشغول من اليوم.....المهم بحسبه بسيطه الوليده نايم من الفجر الى الظهر تقريبا 8 ساعات وبعدها تحكحك شوي بالدوام وطلع وبعدها راح الاستراحه يعنى ينام الذيب اكثر من 12 ساعه والوقت الباقى يقضيه بالاستراحه او ماشابه .وبحسبه بسيطه لو كان عمره الافتراضى 100 سنه وهذا بعلم الغيب طبعا ...سنجد ان من 40 الى 50 سنه نايم الذيب والوقت الباقى ضايع بالاستراحه والقعده .ويبقى وقت بسيط يقعد يندب حظه العاثر ويلقى اللوم على الكل الا نفسه.
كم من الناس على شاكلة مناحى ..........ياترا انت منهم.
فـــيـــــــــــــــــــــــــه احد سال نفسه وش العامل المشترك بين مناحى وماركوس - صاحب مجموعة ماركس .
يقولون البدو اول ...ان ماركوس سأله واحد قاله يالبناخى وش العامل المشترك بين الاغنياء والفقراء....بين المشاهير والناس العاديه بين العلماء والبسطاء................يقول الراوى انه انتخى وقال انا اخو جينيفر هذى اخته للعلم .
فيه احد مايعرف العامل المشترك ياخلف ميتى .........!
هذى مايبيله سعال ان تتسسسان مانا واهم تروه الوقت كلهم عندهم نفس الوقت 24 ساعه عند الغنى والفقير...يقولون دلا عاد يهل هالسوالف يقول ماركس ان العالم تطور من ادم لليوم وتشعب وتوسع بكل الاتجاهات ..!
لكن الوقت لم يتغير لازال 24 ساعه ............ويتلقى العالم والجاهل والغنى والفقير نفس الزمن والوقت 24 ساعه كل يوم..لكن الفرق بين ان تكون فاشل او ناجح غنى او فقير عالم او جاهل ..........مناحى او ماركوس هو كيفية استعمالك واستقلالك للوقت .
كانت ادارة الوقت مهمه على مر العصور لكن فى هذا الزمان السريع مهمه اكثر .
سأل كارلوس غصن.....لبنانى الاصل عن كيفية استغلاله للوقت هذا غير ستانلى ماركوس طبعا
يقول ابن غصن ...وهذا طبعا مدير شركة نيسان ورينو الفرنسيه ...انام 6 ساعات يوميا واذا نمت اكثر سوف ابذل جهد مضاعف باليوم التالى ويقول ان الوقت الوحيد الذى استطيع التفكير فيه هو الصباح الباكر قبل العمل من الساعه 6 الى الساعه8 صباحا لانى لا اجد الوقت للتفكير
عزيزى هل تستغل وقتك بنجاح .؟
هل نجحت بوضع بصمه يذكرك الناس بها فى حياتك او مدينتك او حتى بيتك ؟
هل ستبدأ من الان بوضع خطه لاستغلال الوقت ام ستؤجل كالعاده؟
هل تعلم ان ادارة الوقت فن يدرس بالجامعات ؟
هل وضعت برنامج لحياتك وهدف ؟
اسئله يجب ان تجيب عليها ....الحين الحين الحين الحين. خصوصا بعمرك القصير نسبيا فى هذه الحياة.
واخيرا ..............نعتذر عن الاطاله ادامكم الله بصحه وعافيه ....ويكفينى لو اثر كلامى المتواضع فى اي واحد من اخوانى او اخواتى بالمنتدى وهذا شرف كبير لى شخصيا.
وما اوصيكم ان شفتو مناحى سلمولى عليه.
غدا تشرق الشمس
