يالله من جود حسناك طالبك

[align=center]يالله انا من جود حسنـاك طالبـك
عفوك ومدك حيث ماانـت بخيلـي
يالآدمـي دنيـاك هـذي تعـذبـك
لوطفـت فيهـا مالقيـت الدليلـي
كل ٍ على مذهـب إمامـه يخاطبـك
يبيك مـن زايـد ذنوبـه تشيلـي
واليا عصيت أهل المذاهـب تعتبـك
كـل ٍ يقـول أبيـك يمـي تجيلـي
ولو انتحيت بعيـد بالسـؤ تطلبـك
وكل ٍ بصاعه مـن ذنوبـه يكيلـي
أحد ٍ يصحح لك حديثـه ويرهبـك
وأحد ٍ يقول الحـق عنـدي نزيلـي
وأحد ٍ يخيفيك في كلامـه ويدبـك
وابليس يضحك له وهو مستشيلـي
الناس عوجـان المناطـق تكذبـك
وعن الصحيح الكذب معهم بديلـي
إن مارضيت بقولهم نتـف شاربـك
وتكبـر ذنوبـك لوغنـاك تهليلـي
ناس ٍ على درب الفضيلة تحاربـك
وعلى دروب الشـر تهـذل هذيلـي
ودروبهم عسرات عـوج وتتعبـك
ما تستـوي لـك لا ولا تستويلـي
ينبيك عن دنياك ماضـي تجاربـك
وعزي لحالك كـان عرفـك قليلـي
اتبع نبيـك واتـرك اللـي مجنبـك
واقضب مماشـي سنتـه لا تعيلـي
اللي بغـار الثـور للرشـد يندبـك
وأبوبكـر عنـده نديـم وخليـلـي
نصايحـه للرشـد حـذرا تغايبـك
هرجه صحيح وكل فعلـه جميلـي
سنـة نبيـك للفضيلـة تقـربـك
المصطفى مالـه شبيـه وعديلـي
وأحذرك عن نقالـة السـو تقربـك
ومن يتبع العايـل لـزوم ٍ يعيلـي
لو أنت ماتغضب ترى الناس تغضبك
وعقب المعـزه يجعلونـك ذليلـي
وترى ردي العرق للعيـب يجذبـك
وتصير بدروب الـردا لـه عميلـي
وبنت الردي حذراك حذراك تعجبـك
واحذر تصير لمثـل هـذي حليلـي
وعن مايعيب النسل عرب مناسبـك
وعليك في بنت الحصان الأصيلـي
يجي ولدها فـارق ٍ عـن قرايبـك
ويقيف في وجه الخصيـم القبيلـي
إن كبرت القالات بالفعـل يعجبـك
ويبرد همومك كـان قلبـك غليلـي
مثل القطامي فـي هـداده يشببـك
والدم مـن مخـلاب كفـه يسيلـي
ليا صار ماصلبين الأرياء مكاسبـك
تراك بيـن النـاس تبقـى هزيلـي
وترى دروب الخبث يالعبد تذهبـك
ويفوت عمرك ما تحصل حصيلـي
إحذر يابن حـوا تطمـن لحاجبـك
إلا لــرب ٍ للخـلايـق يزيـلـي
اللي بعفـوه عـن عذابـه يرغبـك
وعينه لكل الخلـق دايـم تخيلـي
في لوحه المحفوظ يالعبـد مذهبـك
نزل بحق وكـل مـا بـه فضيلـي
ومعاشر الخايب مع الناس يذربـك
وتصبح قليل الميز عقلـك هبيلـي
ومعاشر الطيّب على الطيب يجلبـك
ويرقيـك للعليـا بظـل ٍ ظليـلـي
لا تقرب الأجرب بالأمراض يعطبـك
يصير جسمك مثل جسمـه عليلـي
ممشى الخنا من صافي العقل يسلبك
ويصير لـك يـم الرذيلـة سبيلـي
وعن مارد الأنـذال نـزه مشاربـك
واشرب نظيف لـو ورادك طويلـي
ولياك تنسى يابن الأجـواد واجبـك
واللي يروم المجـد حملـه ثقيلـي
يالآدمي وإن كان كبـرت مصايبـك
إزبن على محـي البـلاد المحيلـى
إزبن علـى رب ٍ بعرشـه يراقبـك
وناجه وبعد العسر يسـره جليلـي
ناجه ولأجل ارضاه وجـه ركايبـك
وخلـك لعـلاّم السرايـر دخيـلـي
هو الذي ينجيك من كـود صايبـك
ويذريك من كربات هـول ٍ مهيلـي
يالعبد مكّن عنـد ربـك مقاضبـك
وفكـر وقـدّر وإنتبـه لاتميـلـي
ولا أحد ٍ من الخلاق يالعبد حاجبـك
هو الـذي مـدّه وعفـوه جزيلـي
وهو الذي فـي مافعلتـه يحسابـك
وهو الذي بـأرزاق عبـده كفيلـي

تعجبني كثيرا كلمات هذه القصيدة و ما بها من حكم ،و كلي أمل ان تحوز على اعجابكم

الأمير / محمد الأحمد السديري[/align]

[align=center][align=center](للأسف حاولت بس ما عرفت انسق الأبيات)[/align][/align]