زوج نص كم

زوح المستقبل

زوج نص كم ......زالله لا يفضحنا

في مملكتنا الغاليه تقريبا 1258000 موظفه موزعين من مدرسه لطبيبه لباحثه اجتماعيه لموظفة بنك .( يارب ترزقني بمديرة بنك عانس تبحث عن أخر الرجال المحترمين)) ومعظمهم او نصفهم متزوجات ..والنص الثاني عانس الله لايعنسنا على شر..بسبب طمع الاباء الله يكفينا شر الطمع والطماعين ..المهم الاباء ماهوب موضوعنا لني خضت في طمعهم كثير لين جاني دوران البحر .لكن بخوض بطمع الازواج في زوجاتهم ..في الحقيقة جتني رسايل كثيره تقول ليه ماتكتب عن طمع الازواج بزوجاتهم لين حسيت ان هاللي مرسلات لي الرسايل يراسلون لي عن طريق كافي انتر نت فالحاير( سجن النسا ).والديون راكبتهم .والمر شاربينه مع الهايد كيك والكرون فليكس ...ولو بحلف ان كل وحده فيهم تطبع ساعه بيدها وساعه بكعب الجزمتها من القهر ..واني لو قدامهم أشتكو لي عن طريق الحاسب الآلي اللي في راسي .لين افصل اللوورد .عن الاكسس .ويضيع رفيع بين كف.غرض بنك .ووكفخت قسط سيارة .المهم انه مراره وحسيتها .. وادري انه فيه كثير فعلا عاله على زوجاتهم ولا يستحون ولا في وجيهم ذره من المرجله ولا بغيتو تتعرفون عليهم روح اقرب سوبر ماركت جنبكم بس يكون كبير لنه من طبع .الثعل يحب البراحه ..وخلو عيونكم على باب الخروج دايم (( والله ولقيت شغله للملاقيف يا رفيع )) ..واذا شفتو لكم رجال واقف على باب الخروج اعرفو ان مرته جالسه تحاسب عند المحاسب..وهو ينتظر تدفع وتطلع له والثعل قايلها ناسي البوك في البيت وتشوف المحاسب يناظره من بعيد بنص عين ويقول اخس على هيك شنبات ((محاسب لبناني من ضيعة المنفوحه ))المهم اني عشت مرارة .الرسايل ولا تخيلت انه ممكن يكون فيه رجال يقبل على نفسه انه يكون عالة على زوجته المهم..انه الازواج وخاصه الايام هذي .بدت نفوسهم تدنى بشكل غريب وطبعا معروف السبب وهو حالت التضخم الرهيبه اللي نعيشه وارتفاع الاسعار ..وثبات الراتب وربي ماشفت عسكري منظبط في شغله مثل الرواتب عندنا .لايقدم خطوه .ولا يقدم خطوه (( وراك ماقلت ولا يرجع خطوه قلهااا يا جبان قل انه متمرد في الرجعه )).المهم ان الازواج .بدو يتاجرون في رواتب ذا المسيكنات ..يلعن ابو سلسفيلها من ذا الكذب اللي لو يوزعه على الرياض وضواحيها اشتكت الشرقيه من النقص اللي عندها في مخزون الكذب منه وربي اسمع ان اكثر من بنت مهديدين بالسجن والسبب ان ازواجهم .بكل قباحه وعدم غاريه مركبين على ظهورهم ديون بنكيه واقساط سيارات وكروت فيزا الخ الخ ( وعلى الله احد يسئلني وش الخ ) المهم ان البنت مسكينه دجت .والله من كثر الكفخ ماعاد تبي غير شباصه تربط ابها شعرها. اللي تناثر بالارض كلن يدوسه اشوي ..وصارت من ردا زوجها تنكشف للقاصي والداني ولا جيت للزوج ولا هو لاعن سلسفيل ابون جابها ..تشوفه في نص الشهر ماغير يزابد ويخانق كنها سيلانيه .وعليها 20000 ريال غرامه تأخير ..ويبغا يبرد كبده فيها .تشوفه نص الشهر ..للأتفه سبب سب ولعن وقام يحوس في مريرها ..ولا جا اخر الشهر .تشوف البسمه من الشق للشق .والله لو بتسوي دعاية لمعجون سنسداين ماهوب لاقين انسب من هالوقت الحلق دايم مفتوح والضروس تلق ولوتفلت في وجهه اخر الشهر قال ياربي يدوم علي مرش مويه الورد .يااربي ..في حياتي مانغسل وجهي .غسيل تشطيف .بذا المويه.نعنبو دارك يابنت .وحارمتني من نص الشهر من ذا المرش؟ (( والله لو تعطيك على كل عشره ريال تفله في وجهك ماكفتك عشرين الف ريال في ليله))المهم ان الزوج تجده خدام قرشها .وعاد تعال لا جا اخر الشهر وجات المسيكينه وقالت له ..خذ يا عمري الراتب حطه لي في البنك (( قصدك يحطه في بطنه )) ويرد هو ويقول من عيوني لو بغيتي اني اني اودعهم لك في بنوك تايلند اودعت (( بدون حلف وربي في ذي مصدقك يا العفن )) عاد انا يوم شفت الوضع كذا وربي قمت اقيس المرجله باراتب يعني اللي ياخذ ربع الراتب كنه عندي رجال الا ربع واللي ياخذ النص يصير عندي نص رجال..عاد اللي يلهط الراتب كله ذا انا غاسلن ايدي منه اظن ماعاد ناقصه غير .يسئل .المصري اللي حول من سالم لسالي كيف الطريقة للعملية .وشد الوجه .ولاينسى يحط البيكب .في درج السياره وجنبه اقلام الروج .المهم تعالو اقولكم .كيف تعرف الرجال اذا مرته تصرف عليه ولالا خاصه لامشيت بالشارع…اول شي لاشفت لك رجال يمشي متأخر عن زوجته خطوه اعرف ان ملعون الخير يلف عليها ربع الراتب ..ولا شفته متأخر كثير وكل ماناظرته وراها نزل راسه للأرض اعرف انه ياخذ الثلث ولا شفته يمشي وراها بزر ماسكه في يده والثاني لامه على صدره اعرف ان ذا يلهط نص الراتب لهط …عاد هالمناسبه .يقول الكاتب المصري مجدي محروس الكاتب في جريدة المسائيه المصريه ان الراجل لازم يكون متعاون ولا يكونش متعجرف ومايدبلش كبد مراته ماهي دي برضو اللي وئفت معاك في شدتك ولازم يطاطي اشويه ماهي الدنيا اخذ وعطا فيها أيه لما تحكمك مراتك ؟ مش احزن من انوه يحكمك غريب؟(( انا اشهد انك تلهط الراتب كله لهط ولا خلصت قمت اتارع )) ويسترسل الكاتب الكبير يقول انا معرفش انتو ليه بتعتبرو الستات نسوان (( من يقول اعتبرناهم نسوان لا وربي والدليل هذا انت تجلس معنا من غير غطوة )) يقول دول رجاله.في المواقف ويسترسل يقول انا مثلا كنت احط الئرش فوق الئرش مع مراتي وكانت هي المسئوله عنانا كوولنا (( ايه ده فضحتنا يا مال القدري ))أي نعم مطلوب الزوجه انها توقف مع زوجها لكن بحدود بحيث ماتصير هي العامود اللي يرتكي عليه الرجال ومثلكم عارف عظم المره رهيف مارتكي عليه الا طايح .واعتقد يوم زوجها لك اهلها قصدو تصرف عليها ...وغير كذا ماهوب معقول الزوجه بتتحمل مسئوليته كا زوجه ومسئولة كالرجل في آن واحد .ولا كذا بنظلمها ظام عظيم في انها تكون مره ورجال في نفس الوقت على كذا ماعاد ناقصها غير الشيشه .وانها تجلس مع الرجاجيل وتهلي وترحب وتصب للرجاجيل القهوا وتوزع اربعه (بيلوت ) طبعا ذي ماهيب مهام الرجال .لكن مقدر اقول اكثر من كذا لانفضح بعضنا أنا اقول .ان الرجال االي يخجل من نفسه مايقبل انه ياخذ عرق مرته وكنه راعي قهوا واقف على طرف القهوا ناطرن مرته تخدم على الزباين وتجيب المحصول كل اخر نهار وفي نفس الوقت لحد يظني ارفض اسلوب التعاون لاوربي لكن التعاون له اصول واكبر اصوله العدل في التحمل والزوج هو اساس التحمل وللأسف كثير من الشباب صار يحسب الشهر على راتب الزوجه ..وبالاخير اختمها واقول ..يا مطمن الشارب أعرف انك متى ما كشفت ظهرك بانت جروحك ولا بانت جروحك لزم على الطبيب مداواك .( يارب يفهمون ) وكلمة اخيره بعد (( يووه صدقو يوم يقولون انك تحب الحكي اقول ا خلص بس )) خلاص