بانت حقايق حقدهم ..للشاعر/ عبدالله بن عبار
بانت حقايق حقدهم
عبد الله بن دهيمش بن عبار
[poem=font="Simplified Arabic,5,teal,bold,normal" bkcolor="transparent" bkimage="backgrounds/15.gif" border="double,5,sienna" type=1 line=0 align=center use=ex num="0,black"]
بديت بسم اللي به الناس بادين = سبحان خلاق الملا بيده الخير
الواحد اللي له عباده مطيعين = مجري هبوب الذاريات المعاصير
مولاي غيره مالنا عون ومعين = به نستجير ولا لنا غيره مجير
بسمه بديت القاف من عقب تفطين = هاضت روابع خاطري بالتفاكير
جاني خبر ماهو هقاوي وتخمين = علم ٍ سمعته يغضب البال وايثير
الصحف اللي ترسم ختام النبيين = تناولوا خير البشر بالتصاوير
بالمصطفى هازين ماهم مبالين = قالوا كلام وكل ماقيل تزوير
تطاولوا على الرسول الخبيثين = ولا عاد للمسلم حشيمه وتقدير
عدوان وأغواهم رجيم الشياطين = يالله عساهم باللظى والزمهرير
بانت بوادر خبثهم بالبراهين = وأكبر دليل أقوالهم بالتعابير
ومن قبلهم جند الخباث الملاعين = داسوا كلام الله بخف البصاطير
كتابنا المنزل تعفّر من الطين = وأسبابها منا تهاون وتقصير
فعل الملاحد زاد غيض الملايين = وفجر غضب كل الأمم والجماهير
الكفر اللي في حق الإسلام مخطين = عدوان شرع الله شباه الخنازير
الحاقدين اللي عن الحق مغضين = قاموا بفعل يكدر البال تكدير
يا المسلمين استيقظوا واحموا الدين = عن العبث والمهزله والمحاقير
اصحوا تراكم بالأعادي محاطين = وخوذوا إحاطة في جميع التدابير
مطلوب صد المجرمين المعادين = مايردع الباغي رسايل وتحرير
ما نلتجي لمرافعات المحامين = ولا نكتفي في واهيات المعاذير
الهرج مايشفي صدور المغلين = والخوف مافك الحمام المخامير
شدوا على العدوان ماينفع اللين = اللي استباحوا دينكم دون تبرير
تكاتفوا واستافوا الصاع صاعين = تاريخكم سطر على المجد تسطير
وجدودكم شجعان ماهم ذليلين = نالوا فخرهم بالسيوف البواتير
أحفاد فرسان الوغى بالميادين = صفوة صناديد الرجال المشاهير
وأنتم بعون الله ونصره قويين = ماراعكم لو يصدر الخصم تحذير
صونوا حماكم يا سطام المعادين = عن الطغاه أهل الخزا والمناكير
اللي يبون يغيّرون القوانين = جابوا نظام الغرب للشرق تصدير
للمنهج اللي يخالف الشرع عاصين =عاصين مانقبل عن الشرع تغيير
اللي هجموا لديار الإسلام غازين = بالطايرات وبأمهات الجنازير
باجوا بلاد وفجروبه براكين = هدوا قصور وسموا الهدم تعمير
حطوا من العزّل أهداف ونياشين = للمسلمين اليوم صاروا جزازير
هدوا مساجد فوق روس المصلين = ولا عاد في محرابها صوت تكبير
وسط السجون يعذبون المساجين = بعضودهم وضلوعهم صار تكسير
جابوا صورهم بالمحطات عارين = والكل شاف المهزله والمصاخير
حاطو عليهم شبك مثل الحياوين = وصنادق ٍ تشبه أقفاص العصافير
عدوا من الأموات لو كان حيين = في سجنهم لاقوا مهونه وتعزير
واللي جلوا عن دار الأجداد لاجين = يشكون من جهد البلا والمخاسير
عدوان دين الحق ماهم خفيين = مقصودهم واضح ولا يريد تفسير
من اجل توطين اليهود بفلسطين = الغاصب اللي دمر الشعب تدمير
المسلمين ليا ذبح منهم الفين = كنه ذبح فرخ الدجاجه من الطير
ولا اليهود ليا جرح منهم اثنين = الغرب ندد بالعجل دون تاخير
ان اعتدوا عن جرمهم غمّض العين = ويكيل للعالم بعدة معايير
هدم البيوت وجرف خضر البساتين = عنها تغاضوا في تكتم وتستير
فعل اليهود بشعبنا عندهم زين = يسرهم نوح الثكالا المحاسير
اللي سلب حق الضعوف المساكين = صفوا بجنبه ودعموه بملايير
واللي يدافع عن حقوقه له اسمين = إرهابي ومجرم ولا له مناصير
بانت حقايق حقدهم والمضامين = هم الجناه وهم سبب كل تفجير
الرب يعلم والمخاليق دارين = حرب الصليب افتوبها جرج وبلير
وأكبر مصيبه قول بعض الموالين = سموا دمار بلادهم حرب تحرير
يا مناصرين المعتدي فالكم شين = صرتم حرس للمجرمين ونواطير
بالهون والحقران والذل راضين = حلف وخدم لأنصار عازر وشامير
صرتم لتنفيذ أمرهم مستعدين = وصرتم تبع للي أودعوكم شعاثير
يدعون للفتنة وللشر ناوين = من أجل تاقع بينكم حرب تطهير
والنصر للي لحرب الأشرار داعين = بادوا من جيوش المعادي طوابير
اللي اسقوا العدوان سم الثعابين = يثنون دون المحصنات الغنادير
دون العقيدة والكرامة مفادين = نواصر السنة ايطال ٍ مغاوير
صيد الرجال المخلصين الميامين = الصالحين المصلحين المناعير
تذكروا ياللي للأفعال ناسين = المجد يكتب بالصحايف تقارير
لابد من يوم ٍ تميل الموازين = ويبين ذكر أهل الوجيه المسافير
القاف تم وكمل البيت ستين = وصلوا على مرسال رب المقادير[/poem]
