وش أنت من " شلة " ؟! .. ( كشتة على طريق ....... لا عادها من كشتة !! )
بسم الله ...
خرج " أبوطواري " و " عبدالعزيز السعد " للنزهة .. وقد أحضر " عبدالعزيز " معه هذه المرة جارهم الجديد " أحمد " وهو أحد الطلبة المستجدين في الجامعة ، ومجتهد في طلب العلم ..
......................................
أبوطواري : هاه يا بوسعد ، جبت عدّة الشاهي ؟
أبوسعد : هاللي تشوف ، خمس دقايق إن شاء الله والقهوة جاهزة ، إلا أنت جبت عدّة العشا ؟
أبوطواري : إي نعم ، جبت الدجاج المبهّر ، وعدّة الشوي كلها جاهزة في السيارة .. بعد ما نتقهوى ونعيّن خير أزيّن لكم العشا ..
أبوسعد : تعجبني يابوطواري ، .. بصراحة يا " أحمد " ، أنا وأبوطواري اتفقنا أخيرا على " توزيع المهام " ، أنا علَيّ السجاد والمتاكي وعدة الشاهي والقهوة والتمر والمكسرات ، وهو عليه العشا ، وش رايك ؟!
أحمد : ما شاء الله .. شي طيّب
أبوسعد : .. تذكر يا بوطواري ذيك المرة .. يوم تنسى الملح ؟
أبوطواري : وأنت .. تذكر يوم تنسى الهيل ذاك اليوم يا بوسعد ؟
أبوسعد : أيااام .. سبحان الله ، الدنيا ما تكمل !
أبوطواري : أقول .. انتبه للشاهي لا يعقد يا بوسعد
أبوسعد : لا حّول .. ما قلنا يا بوطواري كل واحد أبخص بشغله ؟!
أبوطواري : ايه بس انتبه للشاهي لا يصير علقم مثل ذيك المرّة
أحمد : الظاهر يا جماعة إن هذا الشغل المرتب ما جاء إلا بعد مشاكل من قبل !! ( يقالّه يمزح ! )
أبوسعد : أقول يا أحمد ، أنا وأبوطواري نصلح ، وخل عنك التحريش ، واحمد ربك اللي جبناك ، جاي وحتى الماء ما جبته !
أبوطواري : إي والله ، احمد ربك اللي جبناك معنا ، قهوة وعشا ببلاش !
أحمد : ياجماعة أمزح ، " ما تسوى علي هالجيّة "!
أبوسعد : ها ها ها .. ترى ما عندنا لعب ، إلا نمسّك الجادة وترجع بليموزين ..
أبوطواري : ها ها ها .. لا تخاف يا أحمد ترى نمزح معك ..
……………..
أبوسعد : إلا يا أحمد إيش آخر أخبار طلبك للعلم ، يقولون إنك دخلت دورة لحفظ صحيح البخاري ..
أحمد : الحمد لله ، الله يعيننا على طلب العلم ويرزقنا النية الطيبة
أبوطواري : سمّعنا آخر حديث حفظته ..
أحمد : أبشر ... قال ـ رحمه الله ـ : وعن ابن عمر رضي الله عنهما قال : قال النبي صلى الله عليه وسلم يوم الأحزاب : " لا يصلين أحد العصر إلا في بني قريظة " ، فأدرك بعضهم العصر في الطريق فقال بعضهم لا نصلي حتى نأتيها وقال بعضهم بل نصلي ...…..
قاطعه أبوطواري !
أبوطواري : أظن يا بوسعد إن المقصود بالحديث " الحث على الإستعجال " ، لأن الصلاة ما يجوز تأخيرها عن وقتها أبدا لعموم الأدلة ..
أبوسعد : لا يا بوطواري ، الصحيح .. إن الصلاة في ذيك الحال تتأخر حتى لو خرج وقتها ، لأن الآمر هو رسول الله صلى الله عليه وسلم ..
أبوطواري : لا يا بوسعد ، المسالة واضحة ؛ إذا كان في القرآن (( إن الصلاة كانت على المؤمنين كتابا موقوتا )) والرسول صلى الله عليه وسلم هو اللي نهى عن التأخير ، فكيف تفهم أنه يقرّ التأخير ؟! .. لا ، المقصود الحث على الإسراع فقط ..
أبوسعد : يا خي اللي أمَر بعدم جواز التأخير ووجوب الإلتزام بالمواقيت ، هو الذي أجاز التأخير هنا ، وهو المشرع .. والنص واضح وصريح ، والرسول صلى الله عليه وسلم لا ينطق عن الهوى إن هو إلا وحي يوحى ..
أبوطواري : هذا الكلام هو الدليل على أن المقصود الحث على الإستعجال والإسراع فقط .. لأن النصوص صريحة في عدم جواز التأخير .. والنص هذا ظاهره يتعارض مع عموم النصوص الأخرى ، فالجمع بينها .. بأن المقصود " الحث على الإسراع " وليس تأخير الصلاة فعلا ..
أبوسعد : مع احترامي لك يابوطواري .. لكن تراك ما تفهم هالمسائل !
أبوطواري : أنا اللي ما أفهم يا بوسعد .. وإلا أنت !؟!
أحمد : يا جماعة .. خلوني أكمل الحديث..
أبوطواري : أنت اسكت يا حمّيد ، ترى ما عندك سالفة ، مالك إلا يومين يوم تطلب العلم وأشغلتنا ..
أبوسعد : أقول يا بوطواري ، انت وش عرّفك بهذي المسائل ؟! حدّك سوق الخضرة ..
أبوطواري : الله يرحم والديك يا بوسعد يا فاهم !! .. صدقني لولا واسطة عمي كان إلى الحين في أول ثاني في الجامعة
أبوسعد : أقول لا يكثر خرطك ، يوم انك ما عرفت ترد على الأدلة حوّلت الموضوع للجامعة !
أبوطواري : أنا اللي غيّرت الموضوع وإلا أنت .. يا الغبي
أبوسعد : غبي ؟؟؟! .. أنا غبي يا لوح ..
أبوطواري : لوح ؟؟! .. أنا لوح يا .......
أبوسعد : .... .... .....
أبوطواري : .... .... ....
أحمد : يا جماعة .. الله يهديكم .. اذكروا الله ...
أبوطواري : ليه .. شايفنا يهود ؟! .. إلا نذكر الله قبل تعرف المسجد أنت ووجهك ، هذا أبوسعد أشغلنا بالجامعة مع أن تقديره مقبول !!
أبوسعد : اللي يسمعك يا بوطواري يقول متخرج وتقديرك ممتاز !! .. إلا الفصل الأول ، والثاني مقضبينك الباب ..
أحمد : يا جماعة الموضوع ما يستاهل !
أبوطواري : ايش ما يستاهل يا أحمد ، صدقني السالفة عناد ، هذا أبوسعد راسه يابس ويعاند مع إن الموضوع واضح ..
أبوسعد : أي واضح ! .. ألحين أجيب لك الأدلة مثل الشمس ، وتقول عناد !! .. إلا أنت اللي راسك مثل الجلمود ..
أحمد : لكن يا جماعة ، باقي الحديث يقول : .. فلم ...
أبوطواري : لا لكن .. ولا شي ... أنت يا أحمد معي ، وإلا معه ؟! يعني إسراع وإلا تأخير ؟
أحمد : يا جماعة ، لا تأخير ولا اسراع .. السالفة .....
أبوسعد : كيف لا تأخير ولا إسراع ؟!! .. تحسب الموضوع على كيفك ؟! .. لا ياحبيبي ، هذا الموضوع ما هو لعبة .. يا معي .. يا معه .. وضّح منهجك ..
أحمد : منهجي ؟؟!!!!!
أبوطواري : ايه منهجك ، إسراعي وإلا تأخيري ؟؟
أحمد : أنتم تمزحون يا جماعة ؟؟!
أبوطواري : إيش نمزح !! .. يا حبيبي هذا دين ما هو لعبة ، .. أنا ماشي .. ضف أغارضك يا بوسعد ، الشرهة ما هي عليك .. الشرهة على اللي يمشي معك أنت وهالغبي اللي معك !
أبوسعد : رح باللي ما يعيدك ، قال ايش قال إسراعي !! الحمدلله على العافية ..
أبوطواري : إسراعي أحسن من وجهك يالتأخيري ..
أحمد : يا جماعة .. !
أبوسعد : وأنت يا أحمد .. رح شف لك ليموزين ، ولا يكثر كلامك ..
................................
وافترق الجمع .. وانقطعت العلاقة بينهم ..
...............................
وبعد زمن ..
...............................
عند شلة أبوسعد ..
واحد من الشلة : يا بوسعد ِ.. ممكن سؤال خاص شوي ؟..
أبوسعد : وش عندك ؟!
واحد من الشلة : يقولون إنك في يوم من الأيام كنت صديق لواحد من كبار شلة الإسراعيين
أبوسعد : أعوذ بالله ، من هو ؟
واحد من الشلة : أبوطواري ..
أبوسعد : أبوطواري ؟! .. أعوذ بالله ، لا صديقه ولا حاجة .. كنت أعرفه قبل يتغير منهجه ويصير إسراعي ، وبعد ما تبين لي مخالفته الصريحة لمنهج التأخيريين ، تركته غير مأسوف عليه ، وكتبت في منهجهم ـ حتى الآن ـ أكثر من عشرين رد نسأل الله الأجر والمثوبة ..
واحد من الشلة : لكن هالأيام .. محاضراته زادت !
أبوسعد : هذي المشكلة ، لا بد من الحذر منها وتحذير الناس من خطر منهجه ، صدقوني السكوت عنه خطر عظيم على الأمة ..
واحد من الشلة : طيّب وش الراي ؟
أبوسعد : أبداً " شويّة سوء ظن " ـ للمصلحة العامة طبعا ـ وتظهر " بجلاء " البلاوي في محاضراته وكتاباته وأفكاره .. ولو فتحت عينك على ما بين السطور ، وما تخفي الصدور ، عرفت إني ناصح لكم ..
.........................................
هناك ..
.........................................
واحد من الشلة : يا بوطواري ، هذا واحد مسكناه قبل شوي يعلّق إعلان عن محاضرة للشيخ أحمد ..
أبوطواري : الشيخ أحمد !! .. الله يالدنيا صار شيخ ! .. وش عنوانها ؟!
واحد من الشلة: " فقه الخلاف " ، لكن ثلاثة أرباع الإعلان كاتب حديث بالخط الأحمر العريض!
أبوطواري : هذا كتب المحاضرة في الإعلان !! .. اقرا الحديث ..
واحد من الشلة : مكتوب .. عن ابن عمر رضي الله عنهما قال قال النبي صلى الله عليه وسلم يوم الأحزاب لا يصلين أحد العصر إلا في بني قريظة فأدرك بعضهم العصر في الطريق فقال بعضهم لا نصلي حتى نأتيها وقال بعضهم بل نصلي لم يرد منا ذلك فذكر ذلك للنبي صلى الله عليه وسلم فلم يعنف واحدا منهم
أبوطواري : أحّول ، رجعنا لطير ياللي ! هذا شكله ما حفظ إلا هالحديث .. لحظة .. ، وش يقول آخر الحديث ؟!
واحد من الشلة : " .. فذكر ذلك للنبي صلى الله عليه وسلم فلم يعنف واحدا منهم " ؟!
أبوطواري : فلم يعنف النبي صلى الله عليه وسلم واحدا منهم ؟!
واحد من الشلة: اي نعم .. لم يعنف واحدا منهم ..
أبوطواري : الله يرحم الحال !! ... عطوني رقم أبوسعد ؟!
[align=center]_________________________________ [/align]
