صيف الريــــاض

الصيف قـرب ثـم تزايـد بشوبـه
وجو الرياض اليوم وصّل لخمسيـن
ما عاد فيه احد ٍ يجـي يـم صوبـه
من حره اللي صـار كنـه براكيـن
غـدا علينـا يالسنـافـي عقـوبـه
لا موتر ٍ ينفـع ولا مكيـف ٍ زيـن
خلا الرجل يكره مـن الحـر ثوبـه
والبنـت تكـره ضيّقـات الفساتيـن
نوب ٍ حراره // نوب معها رطوبـه
واليوم لامن راح كنه عـن اسنيـن
خلا الشمالـي يلتفـت وش ذنوبـه
ويحسب اعماله من الزيـن للشيـن
ثم اجتمـع ربـع ٍ وعلـم ٍ حكوبـه
لا قررو شـي ٍ بـدو فيـه عجليـن
تجمعـو كــل ٍ يطـالـع جيـوبـه
سألتهم وش فيه ؟! // ردو بماشيـن
جهـز شنـاطـك دام دم العـروبـه
باقي بنا وصلـه وطعمـه وشفقيـن
الشـام كنـه يرتعـش مـن هبوبـه
وحنا ذبحنا الحـر وسـط المساكيـن
جو ٍ عليهـا يـا لسنافـي اعجوبـه
لامرت النسمه على شجـرة التيـن
نبغى نشوف المـا ونبغـى العذوبـه
ونرشف قراحه بين خضر البساتيـن
ونبغى نشوف التل وش هـم قروبـه
تغيـرو ولا علـى العـرف باقيـن
نسكن بوسط الشـام والديـر نوبـه
ونوبه على قسيون // نوبه على وين
لأن كــل الــدار دار محبـوبـه
وسكانها ناس ٍ مع الضيـف ذربيـن
قاع ٍ خضـار وكـل منهـم وطوبـه
بيرجعون بكـاش // ولا بعـد ديـن
وان فـرت الميـدان شقـرا لعوبـه
يصرف زهاب العايلـه والوراعيـن
يالله مشينـا والسنيـن محسـوبـه
والعمر يمضي بيـن ليلـه وثنتيـن
قلت اصبرو // كل ٍ يحـدد اسلوبـه
وانا مزاجـي غيـر وانتـم مقفيـن
كل ٍ يحـدد مشربـه وسـط كوبـه
وانـا بحـط السالفـة بيـن بيتيـن
الحر // والسافي // وزود الرطوبـه
في وسط داري كنهـا كحـل للعيـن
والزحمه اللي فـي طريـق العروبـه
تسوا الحدايق بين بـرزه وتشريـن




وسلامتكم


عبدالله عايد

الشاعر عبدالله مشكور على القصيده

صح لسانك يامبدع

أبوعاايد .. صح لساانك مليون ولا تهووووووون طال عمرك ..

صح لسااااااااااااااانك
وسلم بنانك