من عذابي قلت لعيونك هــــــلا
ياهلا بك ياعذابي ياهــــــــــــلا
مايكفي لوعتي بك من غــــلاك
رحت تبعد عن عيوني ياغـــــــلا
تحسب إني سالي مثلك وأنــــا
في هواك الله حسيبك مبــــتلى
مايسليني مكان ولا زمـــــــــــان
لا ولا غيرك حبيـــــــــــــــب لا ولا
قلبي اللي مايطيع لمن بغـــــــاه
من نظر عينك تعهد بالــــــــــــولا
صار لك بالقلب مرباع ومصــــــيف
يوم غيرك عن مرابيعه جـــــــــلا
فيه لك مقيال عن حر الزمـــــــان
والدفا عن برد شمله بالخـــــــــلا
**/ قصيده مختاره لكم للشاعر الأمير خالد الفيصل **
