أنا وسولاف فواخرجي ... وأبوفهيد

[align=center]صباح ومساء (هالكشرات) كل أبوها


ولو إني داري انكم مادخلتوا الموضوع لعيوني..لكن كله على شان طاري سولاف يهون.. :note:

http://www.mrkzy.com/uploads/2c11226ebb.jpg


بس والله ياجماعة الربع أنا لا شفت الممثله السوريه سولاف فواخرجي (تحلل صواميلي

واتخزبق) وتلقاني لاشعورياً منلحط قدام التلفزون فـ مايكون من (الوالده) إلا فصل الفيش

والدعاء بأن تعود بها السنين للخلف لكي ترزق بولد بدال اللي ضاربات فيوزه واللي هو

أنا ..:\

شباب بنات .. هذي القصه تجدونها على ثلاث فصول .. يعني اللي يتعب من القراية يعرف وين وقف

بأرسلها على ثلاث دفعات لأنها طويلة وعلى شكل مجلد

_____________________



<< مدخل حصري لـ نـازف >>


قالوا تحبه ؟! قلت: بالحيل بالحيل * قالوا توده؟! قلت: ما اود غيره ..

قالوا تريده ؟! قلت: بالحيل بالحيل.. قالوا تعزه: قلت آه بالحيل بالحيل ..

قالوا تتمناه؟! قلت: يلعن أبليسكم لكم ساعة طايحين فيني أسئلة!!


توكلوا على الله عشان أبدأ القصة :D


_____________________________


( الفصل الأول )

- لحظات ماقبل الحسم -

كان ياماكان .. ذات مساء رفحاوي جميل .. وكنت في طريقي متجهاً إلى وسط رفحاء الخضراء

بالتحديد ( سوق العلاوي ) حق الخضار والفواكه ..

وكان معي صديقي وحبيبي أبوفهيد _ ستعرفونه لاحقاً

والعلاقة بيني وبين هذا الصديق تمتد لبطون التاريخ .. وذلك قبل 27 سنه أي أول ما انولدنا

في اسبوع واحد .. وهذا رابط من الممكن أن يفيدكم بمعرفة ابوفهيد بشكل أكبر

http://www.rafha.com/vb/showthread.php?t=30915

وكان يسولف لي عن مغامراته في سوق ( الغزل ) ومواعيده الغراميه مع ( بنات الهوى ) ..

وانا ( فاغرُُِِ ُ فاي ) >>- أي رايحن فيها ورايح وطي ورايح كشنه بالكشري مع سواليفه

وهذه بعض سواليفه مع بنات هواه

-- تصدق يانازف، أمس "دلول" أهدتني دب مكتوب عليه أحبك يا عذابي !! 8O

-- تصدق يانازف ، هذا البوك اللي في يدي .. مهديته لي "تغريد" الربوع اللي طاف !! :think:

-- تصدق بالله يانازف "هدى" سددت فاتورتي حقت الشهرين اللي راحن وفيها ألفين ريال !! :eek:


وانا قاعد أستمع له و ( مبلم ) لدرجة اني قطعت اشارتين حمراوتين بس الله ستر علينا


ـــــــــــــــــــــــــــــــ


ترن .. ترن .. دق جوال أبوفهيد .. ناظره وقال: يلعن أبو اللزقات ياهووووه ..

شف يانازف !! طالعت شاشة الجوال ومكتوب فيها : النشبه يتصل بك !!

قلت من هالنشبه ؟! قال: هذي" ابتسام" الله ياشيخ ياخذها .. أنواع الازعاج كل يوم عشرين مسج

وستطعش ستين اتصال .. سميتها نشبه ولا قمت أرد عليها .!!

قلت في نفسي : إيه بلا والله من العز اللي انت فيه .. يحق لك تطنش !! مو زيي منقطع


شاف ابو فهيد بقاله قال وقف وقف .. وش أجيب لك معي؟ قلت : أي شيء ..

نزل ابو فهيد البقالة وجواله عندي بالسيارة ..

قعدت أهوجس.. الحين أنا أزين من ابوفهيد بألف مرة .. وشعري أنعم منه وأرتب ..

وسيارتي أحلى من سيارته .. ومع هذا البنات عنده وانا ( متلحط ) بس شلة الاستراحه التماسيح!!

إيييييييييه الله يا أم كلثوم صدقتي يوم غنيتي من ألحان السنباطي وقلتي: (الحظ لا منه

استقعد.. وش يفكك منه ياوليدي (


ورجاءاً لا أحد يسألني عن هالأغنيه لاني سألت "السنباطي" نفسه عنها ولا عرفها!!

ترن .. ترن .. قطع هواجيسي اتصال جوال ابوفهيد .. ناظرت الجوال وأثر "النشبه" يتصل بك!!

زحلق علي ابليس زحلقه مايسويها المنتشري لا أنفرد به القحطاني وقالي:

رد .. رد واسمع الصوت العسل .. انت في حياتك ماسمعت الا صوت حرمتين:

أمك لا قامت تدعي عليك.. وشغالتكم لا قالت: جيب شماغ انته .. انا فيه يكوي ..

شلت الجوال..ظغطت على السماعه الخضراء وقلت بصوت رومانسي حنوووون عاطفي حااد:

ألوووووووووووووه .. واحتريت الرد العسل والصوت الدافيء واذا بصوت أجش مكر مفر مقبل
مدبر معا .. يخترق طبلتي:

-- وينك فيه ياهالسربوتي تاركن بالمستشفى ساعتين وتدوج في هالشوارع !!

من الخرعه سكرت السماعه وقطيت الجوال وقلت الله ياخذك ياهالزلووووخ يابوفهيد.. أجل

(أبوك) خليته ابتسام >>- طلع النشبه أبوه :lol

ركب ابوفهيد ومعه بيبسي يشربه وعطاني (برراية خضراء أم مرايه) !! قلت: خير ان شالله ؟

قال: انت مو تقول جب لي أي شيء !!

قلت: أقول ترى ابتسام تحتريك بالمستشفى يالنصاب :lol !! ( رمقني ) بنظره حاقده وخذا جواله

وجلس ساكت وهو عيونه حمراء وبحر أمواج خدوده قاعده تتلاطم من قوة التهزيئه
اللي عطيتها له


وفجأة إذا بنا على أعتاب السوق الجميل سوق العلاوي للخضار


V
V
V[/align]

[align=center]^
^
^

( الفصل الثاني )

<< لحظات ماقبل الحسم >>

دخلنا سوق العلاوي للخضار .. شريت كم حزمة خس على جرجير مع كراث وبطاطس على كوسه ..

وطماط وكرتون بردقان مصري وتفاح أحمر وعنب احمر عشان احس اني (مودرن) وولد نعمه

وطبعاً مانسيت الخيار لأني من النوع اللي يحب المكرووونه موت .. ولا تسألوني وش دخل

المكرونه بالخيار لأني باختصار: أكره الحمبص



وهنا اشتدت وتيرة الاحداث ..

قاعد أحاسب راعي المحل ..فـ مر من جنبي شبح !! هالشبح ياجماعة الخير ( لحس ) مخي!

خلاني بدون شعور أطلق تصفيره من شفايفي واقول: أويل حالي ويلاه .. يووووووه !!

دققت النظر .. وأثاريها بنت .. عليها عباية كتف مخصرة .. http://up.z7mh.com/upfiles/5oP98789.gif

ياشيخ ألعن من خصر حرمة (بباي) زيتونه :D

والطرحه يلعب به الهواء .. والنقاب ياقلبي على النقاب .. يذبحك ذبح الشاة بدون سكين ...

والعيون كل الكحل اللي بمحلات أبوريالين مكبوب فيها..والجوال (معلق) بالصدر بحركة سرياليه ..

هذا غير الزخارف اللي باالأكمام والدناديش اللي في جوانب العباة !!

طبعاً خلاف العطر اللي ريحته (شقت) خشمي وطلعت من بؤبؤي

أخوكم في الله ( بلم وفيوزاته ضربت ) وصرت زي ماقال الشاعر في كتاب النصوص :

مرحوم يا ضبٍ على الخط مدعوس ** له سبعة أيامٍ ومحدن درى به


قعدت أتمقل فيها .. أتأمل.. أناظر.. متعجب!! وفجأة ..سددت لي نظره !!

و طاحت عينها بعيني.. ومن لهفة الموقف طاح أخوكم على بسطة الخضار حقت البياع ..

حسيت أثناء سقوطي بضحكة بانت في عيونها العذاب ..

شالني أبو فهد والبياع وهم (يسموون)علي .... وقال لي ابوفهيد بخبث ابليسي ماكر :

نازف .. الغزال يلزمك أو تتركه لحبيبك أبو فهيد؟

نقزت وقلت : أبوفهيد بلاش تكفى حكي أهل العصابات ترى تخوفن.. وش تقصد ؟

قال: لا تستهبل معي.. البنت عينها عليك من يوم دخلت السوق..يعني ياتروح تظبط أمورك معها..

أو تتركها للي يفهمون هالشغلات .. وطق على صدره !!

نقزت ببراءة تثير الشفقة وقلت: لا لأ في ذمتك وفي صلاة امك وابوك .. الله يفضخ عيونك

ان ناظرتها. . أنت عندك تغريد وهدى وغيرهم..

خل هذي لي أنا ( طقيته ) قبلك .. ضحك وقال بمكر وخبث!! : ياهنيك فيها ياشيخ..لعيونك تركناها..

بيني وبينكم ترددت . لأني ماعمري عشت كذا موقف ,,. قعد يوسوس لي بليس عن يميني وابوفهيد عن يساري وهو يقول:

الحين تواجه كلب مسعور .. وتعجز تروض مهرة جت تتحرش فيك ..

حسيت انه استفزني بيني وبينكم والكلام للجميع .. رحت طاق صدري وقلت:

أنا ولد ابوي !! إرس ياترس واعتدل ياملف .. اليوم يومي وانا راعي العلياء


طلعت قرطاسة علك ابونعناع غندور وكتبت الرقم وتحته اسم: لؤي


ولأول مرة في حياتي العمليه..قربت من البنت ورميت الرقم.. وجيتك أركض للسيارة وابوفهيد

وراي وانا أقوله أنحشنا انحشنا ولا تسألوني عن الجرجير وكرتون البطاطس لأني نسيت


اسمي وقتها



........................


مر يومين على القصه هذي .. ويأست من اتصال ( الغزال ) اللي ماطلع من بالي أبد ..

أيقنت أن البنت تركت الرقم بالأرض وطنشت ..

وفي تمام الثالثة فجراً .. ترن .. ترن .. (طبعاً نغمة موسيقيه بس مقدر أكتبها قلت : ترن ترن وافهموا )

رقم غريب كان واضح أنه رقم موبايلي .. قلت: ألو؟ جاني صوت حنون حنون خلى جوالي (يموع) في يدي ..

ألووووووه ... هاااااي .. الأخ لؤي ؟ ؟ قلت: لا .. إلا صح أنا لؤي نعم ؟

قالت: وش هالحركات ؟ قلت : أي حركات مافهمت ؟ ---> عمري يالبريء :p

قالت: الترقيم اللي بالسوق أو تسوي ناسي ؟ قلت : آها ذكرت بس والله آسف ..

قالت:وين اصرف آسف هذي فيه !! قلت بحنية مستفيدها من ابوفهيد الداشر :

والله آسف..ليت تعذريني..اختي عيونك وفتنتها الله يعلم خلتني أسوي شيء أول مرة أسويه بحياتي..

(( بيني وبينكم حسيت أن البنت تسلكت واستانست بالمدحه..رحت مزود عليها العيار ))


قلت : حشا مو عيون هذيك.. هذيك أسلحة دمار شامل راح بوش يدورهم عند صدام وهم بعيونك !!

صدقيني أول ماشفتك قلت مستحيل تكون هذي إنسانه مثلنا ..

هذي أكيد لوحة من لوحات بيكاسو طاحت منه وهو يتمشى في بالعلاوي !!

(( البنت داخت .. وبديت أحس ان صوتها قام يرعد .. واخوكم في فن التسليك إستاد ))

قامت تضحك بدلع وقالت : الله اسلوبك حيل..حييل.. حيييل يجنن !! دمك بالمرة خفيف ..

رحت مزود العيار مرة وحده وقلت: فيه نصراوي مات ابوه قال كله من الحكم !!

ضحكت بصوت عالي:ههههههههههههااي الله يرجك يا لؤي ..

قلت: هاااه !! من لؤي ؟ قالت: ههههههههههههاا ههههه هذي بعد مرة حلوة..

من غيرك قاعدة أكلم .. الله يرجك لؤي!!

رحت مصرفها قلت : ايه استهبل معك (( بغيت اجيب العيد لأني أول مرة اسمع بلؤي))

قلت: بليز ..بونسواغ ؟.؟ وش اسمك؟ ماتشرفت فيه ؟ ---> مسوي مثقف وهو أدلخ فرنسي

جاوبتني بدلع تبطي حليمة بولند تجي ربعه : إممممممم ماراح أقولك.. بس أول حرف (سيين ) ؟

قلت بدلاختي المعتاده أكيد (سكروب)

قامت تضحك بقوة وتقول الله حسيبك يالؤي من زمان ما ضحكت هالضحك قبل اليوم وااااو وناسه انت ..

اوكي را ح اقولك .. معك ((سولاف)) يا لؤي .. اسمي ((سولاف)) ..

المهم راحت ساعه وربع غزل ودلع وتنكيت..قمنا نسولف سواليف لين أقام الفجر !! قالت وهي مستعجله:

لؤي عن اذنك الوالد قام يصلي واخاف يشوفني أكلم.. بعدين أحاكيك أوكي؟ باي حياتي !!

طــوط طــوط ..

يالربع هي قالت حياتي ولا ماقالت .. أخوكم في الله ( غاص ) بفراشه ..ثم قام..ثم انسدح..

خذت الجوال..دقيت على ابوفهيد: سألته: الواحد لا كلم بنت..وحس برعشة ووده يحضن

وسادته .. وش اسم هالحاله ؟

قال بخبث ومسوي فاهم: ههههههه.. ههههههه .. صرت زميل مهنة يابو محمد..والله وحبيت!!

قمت مبسوط وصاير مهلبية بالبشمل .. تركت بوفهيد على الخط ماقلت مع السلامه!!

رحت المراية.. (سرحت ) قذلتي اللي متهاوشن بسببها أنا وأبوي لي شهرين ..

قمت أبخبخ على روحي من كل عطر اشوفه قدامي..

حسيت نفسي انسان ثاني.. انسان غريب .. رومانسي .. صرت اتسبح يومياً.. مو زي أول

ماأسبح الا بالأعياد

المهم ..استمرت المكالمات بيني وبين سولاف.. تدق دقة وحده وتفصل ثم أرجع أكلمها ..

صح ان الفاتورة ( تمحطني ) بس كله لعيون الغلا يهون

صرت شخص ثاني..رومانسي عاطفي..صرت ما أتحمل أشوف الدجاجة تنذبح قدامي مع اني

أول اذبح ضحايا العيد بنفسي

اصحى من النوم أغني مع بشير : كتمت الحب وأثر الحب ماينفع له الكتمان

أمشي وأدندن مع وحيد الجزيره بن سعيد : ياناس حبيت واحد والمحبه صعيبه

في السيارة مع طلال دايركت : سيدي قوم ماخبرت اللي يحب يهتني بنووم سيدي قووم ..

ولا يهون سلامة وعيسى وعاصي الحلاني وطارق التايب .. وش دخل الأخير ما أدري

صرت من الناس اللي يؤمنون بالحب من أول آلو ..

صار ابوفهيد يحسدني وانا اللي كنت أحسده .. مسج يروح مسج يجي واستمرينا مده على

هالحال[/align]

[align=center]^
^

(الفصل الثالث )

<< لحظات الحسم >>


تعمقت العلاقة الهاتفيه بين لؤي - اللي هو أنا - وبين سولاف ..

لدرجة اني رحت للسوبرماركت .. شريت مجلة فيها صورة سولاف .. قطعت المجله على طول ..

وخذت الصورة بس حطيتها بغرفتي ..

وصار المدعو ابليس لما أكلم (سولاف) على التلفون يشبك الصوت بصورة سولاف ..

تعرفون ابليس حركات وبارع في هالأمور..

صار بيننا عيش وملح وحب وغزل..والبنت عليها أسلوب مو سهل ..يعني بالعربي الفضيخ:تعطيك

مثلاُ: كنت مرة أكلمها عن واحد من العيال صار له حادث وتبرعت له أنا بدم ..

وسألتها: سولافتي على طاري الدم وش فصيلة دمك انتي ؟

قالت: فصيلة دمي.. لؤي موجب !!.. قلت : هاه.. يعني وشو

قالت: دمي غلاي ظماي كله لؤي..انت دمي انت كلي ياحبيبي !!

واخوكم لاتسألون عنه وقتها.. ( انفرش ) في سريره وجته سكتة عاطفيه..

ماصحيت الا على وقع سطل مويه بوجهي من الوالد وهو يقول: قم صل وانت منسدح كنك ثور ماعليه قلادة!!

والثيران في قاموس الوالد نوعين: واحد حبوب وهادي قدروا يلبسونه قلادة.. بس يظل ثور

والثاني: من زود هباله وخباله وثوارته ومطامره ماقدروا يمسكونه ويلبسونه قلادة..

وانا أتبع هالمدرسه في نظر سماحة الوالد ..

المهم خلونا الحين من سيرة الشايب..ونرجع لموضوع الحبايب


0 0 0 0


مرة من المراريت وأنا منسدح على جنب وأكلم الغلا سولاف ..

قلت : سولاف.. أبي أشوفك .. أبي أشبع عيوني بشوفتك لأني ما رويت من شوفة ذاك اليوم ..

قالت: أخاف مايعجبك شكلي .. وتقطع العلاقه ..

قلت: لأ وانا ولد أبوي .. أنا شفت عيونك ومستحيل ذيك العيون تكون على وحده شينه ..

وبالأخير لو كنتي شينه صدقيني أنتي توأم الروح ..لو فارقتك روحي تروح ..

انتي سكنتي قلبي من الوريد الأيمن الى البطين الأيسر ولا يهوون الشريان الأورطي

سولاف .. ارحمي عاشقِِ ِ على وشك الموت .. سولاف الشوق ظالم .. لاتفجعين أمي في ولدها..

قالت: والله عليك أسلوب وكلام مدري من وين تجيبه يخلي الوحده تذوب غصب ..

قلت : هالكلام جبته من مشاعري.. سولاف قلبي اللي نطق مو لساني

قالت: بس.. بس .. كسرت قلبي والله حتى انا نفسي أشوفك لو دقيقه ..ولهت موت عليك ..

قلت خلاص الوعد متى ووين ؟

قالت: اممممم بكرة المغرب بنفس المكان العلاوي مول

قلت أووكي .. باي عشان أبدأ أتجهز للموعد اللي سيكون خالداً في براثن التاريخ البشري ..:note:


_________


من بكرة ..رحت مظبط الشعر .. طاق الجنز .. مسوي سكسوكة لأن سولافتي تقول أحب الرجال بسكسوكة

رحت لولد عمي اللي توه مطلع من الوكالة كابرس رويال 2008 طلبته منه وقال خذه ..

( و ولد عمي على فكرة أخلاق حبووب وسمح ولسانه طاهر ومايسب أبد.. )



وصرت كل من شفته علمته اني بموعد (غزلنجي) .. وعلى بالي راعي غزل ووخر عن دربي ..

أتى المغرب الموعود .. وتوجهت للعلاوي.

وقفت بالمكان اللي أتفقنا عليه .. دقيت وجت سولاف تمشي وركبت

طبعاً لا غنى عن نصائح ابوفهيد :lol





مشيت لين و قفت بمكان مظلم ( أحم احم )

قلت :سلووووفتي شيلي الطرحه .. سمعت ضحكتها بقمة الحياء .. دخت بس مسكت نفسي ..

شالت الطرحه قالت: شووووف !!

قلت: من جد سولاف شيلي الطرحه مافيه أحد ..

قالت : لا تستهبل لؤي أنا شايلة الطرحه شوووف زين

وانا اناظر.. أطالع.. أتمقل.. أدقق ماشفت شيء ..

يوم ابتسمت لي وشفت (ضروسها) دريت انها شايلة الطرحه صدق 8O

معقولة سولاف كذا !! معقولة هذي اللي قصدت فيها عشر قصايد !!

معقولة هذي سولاف اللي دفعت 5 آلاف فواتير فدوة لها !!

مابينها وبين الكفر حق السيارة فرق اللهم ان الكفر فيه صواميل :-:

قلت: حبيبتي سولاف.. ترانا (غرزنا) ممكن تدفين السياره ؟!!

قالت: غرزنا في زفلت .. قلت بعصبيه وانا حاقد عشان فلوسي اللي طارت:

إيه غرزنا.. قومي دفي عشان اطلع السيارة ونروح لا احد يشوفنا ويشتبه فينا ..

هي نزلت ولا ما نزلت .. رحت دايس البنزين وناصي ابوفهيد ولعنت خامس جدفه

قال: وش دخلني .؟ قلت: الله يلعن الغزل والمغازل وخرابيطك كلها ..

قال عادي تصير في احسن العايلات .. اليوم كفر بكرة تلقى قمر ..

قلت خل الكفر والقمر لك وتووووووووووووووبه ..



.................................................. .......................

حكمة العدد :


اذا رأيت في السوق امرأة وأعجبتك .. فأذكر لؤي واهرب :D


.................................................. ..........



(الفصل الأخير )



وهو أهم فصل ..


قبل لايجيني واحد منكم مدرعم ومطفي النور ومشغل السكن ويشربك بالبوري ويمشي 180 ..

ويطب فيني ويقول: يافاسق..تجاهر بمعصيتك .. ومن هالكلام ..

أحب أقوله: هد السرعه لاعدمتك .. لا تروح في الصبه ثم نبلش بك ;)

وقبل لايخش واحد من مشرفينا الغالين وينتف موضوعي

يالربع انا أوردت هالقصه الخرافيه اللي أختلقتها من بالي عشان شيئين :



1 - للشباب :

ترى الثقل زين .. مو كل ما شفتوا عباية مخصرة وعيون مكحلة درعمتوا ورااها

ترى المثل يقول : ياما تحت السواهي دواهي,,وياما تحت البراقع فواقع

ولا تصدقون ان الغزل فيه سعاده .. ترى مافيه الا الشقاء ..

قريت قبل كم يوم عن شاب متعلق ثلاثة أشهر بـ بنت في شات كتابي ..

ثلاثة شهور وهو يحب وفي الأخير صارت البنت رجال متنكر

يعني ركوووووود .. ركوود ترى الزعيم موجود



2- لأخواتنا البنات ..


ترى عباية الراس رووعه .. قمة الحشمه والاحترام .. تحفظين بها نفسك وغيرك ..

عباية الكتف واللثمه والخرابيط اللي من تالي مو عبايات ..

لأن ما عمر الزينه .. غطت زينة ..





فاصة أخيرة:


أكيد انها قصة خرافيه لأني لما أرقم بأرقم (نقوة) مو طقاقة --->:D أمحق ناصح..



جبت العيد ألف مبروك :lol [/align]

[align=center]
هههههههههههههههه

الله يونسك بالعافية أخوي لؤي ...

موضوعك خفيف دم وأنهيته بنصيحة مهمة ...

ملاحظتي هي الصورة لو يشيلونه الإشراف يسوون خير ...

مشكور أخوي نازف ...
[/align]

[align=center]يعافيك ربي رفحاوووووي

بس صورة هالطخمه :shy (أستر) صورة لقيتها لها بقوقل متحجبه الله يصلحه

وشين أحلى من شين :no

شكرا لمرورك خيوووووه[/align]

[align=center]ههههههههههههههههااي

واعليه كسرت خاطري من جد :p ..

ليش يعني الشينات ما لهم رب :shy !


:


نازف ..

تسلم .. و يعافيك ربي : ) ![/align]

روووعه وصفك لحالة الحب خياال وابداع


اسلوبك خطير اخوي

لاعدمــ

هههههههههههه والله دخت وانا أقراء لكن عندك اسلوب في سرد القصص وروايتها رائع لازم تستفيد من موهبتك هذي
يعطيك العافيه لؤي قصدي نازف هههههههههه

قصه جميله اخوي نازف واسلوب قصصي منقطع النظير ..

جميله القصص التي تجني منها الفوائد والقصص المُذيله بالنصيحه ..

دمت مبدعاً دوماً اخوي نازف .. لاعدمناك

القصه روعه سلوب قمه في الجمال
تشكر اخ نازف

روعة يانازف . يعطيك العافية خيووو

المعذرة يانازف انا مخيم هنا :)

لأني صراحة لم أقرأء أجمل من موضوعك في هذا المنتدى

وبالنسبة للغزل والمغزل بالعلاوي اعرف واحد اعجبته بنت بالسوق وتعرف عليها وتزوجها ويعيش الآن حياة سعيدة .

صدفة خير من الف ميعاد صح ؟

القصة حقيقة

قصه حلوه بس قريتها من قبل في المنتدى
مشكور