روائـــــــــــــــــع مسفرالدوسري

سهالات


لو هجرتيني .. سهالة
لو جفيتيني .. سهالة
ولو ظلمتي حتى حبي
ظلمك بعيني عدالة
إنتي مو أول حبيبة
في محبتها تخون
وإنتي مو أول حقيقة
تجرح أحلام الظنون
وإنتي مو أول سراب
تنخدع فيه العيون
إغدريني ياللي قلبك
راضع ألوان الغدر
إهجريني
وأدري بعدك
مالي من بعدك عمر
بس شسوي مالي حيلة
القدر أمره أمر
مالي إلا..
أمسك إيدين الصبر
وامشي من همي أردد :
" لو هجرتيني سهالة
لو جفيتيني سهالة
ولو ظلمتي حتى حبي
ظلمك بعيني عدالة "




اشتقتِ لي

ولهتي لوْ شويّ علي؟!

إشتقتي لي؟!

قوليلي:

وشلون المسا.. من غيري

وشلون الصباح

وشلون يَمرّ.. يومك عليك

باهت، وبردان، وحزين؟!

ولاّ يمرّ من بعدي روعه وممتلي؟!

حسبتي إن الفرقا ما بيني وبينك.. للأبد

ولاّ ابتسمتي في سرك وقلتي هالزعل

مهما يطول

سحابة صيف أكيد.. أكيد بتنجلي؟!

ولو تسمعين أغاني حنا نحبها

ما يشاغبك قلبك يقول:

عشاني إتصلي عليه

وحشني صوته

ضحكته

حتى جمر كلامه واحشني.. وابيه

عشاني إتصلي عليه

عشاني أرجوك أسألي

حبيبتي..

ما شاغبك قلبك علي؟!

بالله قوليلي الصحيح: اشتقتي لي؟!

أمانه ودّي أسألك

طول الفراق.. فكّرتي فيّ؟!

قعدتي مرّه بغرفتك.. تتمنظرين..

وكنتي بكامل زينتك

وقلتي لغنج أنوثتك:

ودي يشوف تسريحتي

نفسي يشم هذا العطر

ويقوللي رايه فـ «الروج» الجديد

وأيّ اللي أحلى.. هذا..

ولاّ «روجي» الأولي؟!

ودي يشاركني دلال أنوثتي

ويضمّني

ويمسح على راسي بحنان

هو يدري إن لمسة ايديه..

فيها حياتي ومقتلي!!

حبيبتي فكّرتي فيّ..

وانتي على تسريحتك

اشتقتي لي؟!

ما اكذب عليك

أنا كثير إشتقتلك

عمري أحسه من غيرك خلي

لا أرضي أرض

ولا نجوم..

تزيّن الليل بسماي وتعتلي

ضايع وينقصني انتماء

لاني لأحد.. ولاني لي!

أنا كثير اشتقتلك

حبيبتي..

ما اشتقتي لي؟