هذا الزمن كله مصايب يا شمروخ_
--------------------------------------و لا للمصايب بالزمن غير أهلها
و اللي يفكر يالسنافي به يدوخ_
--------------------------------------تضيع هقواته و هو ما وصلها
أمر من حنظل وأحلى من الخوخ_
--------------------------------------متخالط مر الليالي مع عسلها
يا بو فهد وجه الحيا صار مشروخ_
--------------------------------------ما فيه ذمه ما تصدع جبلها
الستر، وين الستر و الكل مصلوخ_
--------------------------------------ناس تبرا ثيابها من عملها
بعض البشر من لعنة ابليس ممصوخ_
--------------------------------------شره على الطينه يزود بللها
و بعض البشر راسه من الكبر منفوخ_
--------------------------------------و هو عزك الله جزمة تنتعلها
يفداك ميت القلب أبو قلب مفضوخ_
--------------------------------------اللي يشوف النايفه ما نزلها
يكفي رفيق مثل شرواك مطنوخ_
--------------------------------------نفسه على الطولات يرزم فحلها
و الا القصيد اللي من الزيف منسوخ_
--------------------------------------زاد اعوجاج أحوالنا ما عدلها
بعض الحكي لو هو منمق و مطبوخ_
--------------------------------------ما سد جوع اللي ذبحها محلها
و المال لو به للبشر عز و شموخ_
--------------------------------------ما طول أعمار قصير أجلها
ما ساكن الفله مثل ساكن الكوخ_
--------------------------------------و اللي يغص بلقمته ما أكلها
و دنياك هذي ناسها ناس دلوخ_
--------------------------------------روس تدربى من جهلها لجهلها
هذي حرار المرجله كلها فروخ_
--------------------------------------مثل الحمام اللي سكنها دحلها
ما خلفوا لباسة الشال و الجوخ_
--------------------------------------إلا البنات اللي تبارق احللها
و مادام رعيان الزمن صارت شيوخ_
--------------------------------------خل الشيوخ اليوم ترعى هملها
للشاعر الكبير/ فيصل بن طواله
