السلام عليكم
نص جديد
اتمنى ان تتقبلوووه
.
يا نبتت الشيح ذمه لا تلوميني
عن طيحت الدمع يومنها توادعني
.
من زفرة الظرف ينكف ما يصليني
وإن قالي حجته ماهو بمقنعني
.
جفت بنا القاع لكن يا بساتيني
قولي لها الغيث له رب_ ويسمعني
.
وإلا انتي انتي كما انتي ما ترويني
انا خبات الحكيم وصعب ترمعني
.
اضحك على بليس لا حندة شياطيني
واخذ رياله ذهانه لين يتبعني
.
و اوصله للطريق ولا توصيني
فل اللكاعه معاي ولا يلكعني
.
إلا طريق_ مشيته بأول سنيني
منه عرفت الرغيفه ما تشبعني
.
دن دن يا فنان شرط انك تبكيني
وكانك عليمي وتر مابغى تصدعني
.
من دورة الوقت فيني ما يكفيني
والنصر عشقي واشوفه يالخوي يعني
.
حاله مثل حالة الشعب الفلبيني
سياسته ماش والاوضاع طرطعني
.
يبقى لك المجد يالشعب الفلسطيني
عن دون وادي النحل نحله ويلسعني
.
فيروز غنت لصبرك روح تهديني
من بكرة الصبح وسط الكرم تزرعني
.
وانا ذكرت الوفاء واغلى محبيني
وذكرت دمعاتها لحظة توادعني
.
همست قبل انتفارق حيل ضميني
قالت يا مجنون تكفى لا تضيعني
.
الوقت حكم وانا ماعاد يمديني
وعلى طريق العشم مابيك تدفعني
.
قلت البحر ماج ردت ذي شراييني
قلت الفضاء رحب ردت صعب ياسعني
.
قلت إن رحلتي ترى ماحد_ مربيني
قالت ليا طحت عندك كيف تجمعني
.
قلت اجمعك بالحنايا وروح مغليني
وافرع لك الصدر كان الصدر طاوعني
.
قالت لو إن الاماني ملك يديني
اعطيتك الروح يا روحي وتصنعني
.
قلت إن عطيتك خفوقي ما تخليني؟
ردت ابي دقته بالخووووف تسمعني
.
قلت إن عطيتك عيوني ما تخليني؟
ردت ابي حزنهن ل ضقت تمتعني
؟
قلت إن عطيتك وريدي ما تخليني؟
ردت ابي نبضته لشوق تدفعني
.
قلت إن عطيتك ( لهاتي ) ما تخليني؟
ردت ابي ريقها بالضيم ترضعني
.
قلت إن لضمتك بروحي ما تخليني؟
قالت على شرط إنك ما تضيعني
نايف الذعذاع
