[poem=font="simplified arabic,4,darkblue,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
يامبعـدٍ عنـي ولانيـب راجيـك = دونك غراب البين رف الجناحـي
تبعـد وقلبـي بابتعـادك يناديـك = وان زدت خطوة زاد قلبي جراحي
عشر وثمان سنين والقلب يغليـك = لليـوم هـذا ماهنـا وإستراحـي
اغليك واغلي ناسك اللي حواليـك = واغلي على شانك ديار ونواحـي
واروح للبيت الذي كـان يأويـك = والقاه مظلم واكثر الرسم ماحـي
مهجور تلعب بالهبوب الشبابيـك = لو هو بشر من حر فرقاك طاحـي
انا ادري انه خالياً منـك يبكيـك = مار جبرتنـي ذكرياتـي إلحاحـي
واقول له يـا دار تبـت مبانيـك = حلو الحلايا وين وجّـه وراحـي
ماجابني واوجست ريبه وتشكيـك = واقفيت تلعب بي هبوب الرياحـي
رجعت للإطلال من شأن ماضيـك = اخاطب الجدران مانيـب صاحـي
اللي خذا عقلي رموشك وعينيـك = الله عطاك رموش مثل الرماحـي
بعيون مفتونك ولا أحـدٍ يحاليـك = ياسيـد كـل الغانيـات الملاحـي
الثلج والجمر الحمر بين اشافيـك = ذبـاح للعشـاق سـم ٍ ذحاحـي
لون العرق وقت الخجل فوق خديك = مثل الندى بالورد وقت الصباحـي
سحرك تعّدى كل ساحر يجاريـك = سحره محّرم وانت سحرك مباحي
ماحب ليلى قيس لو سمع طاريـك = وان صرت مثله ماعليه جناحـي
لعبت بي لعبٍ يسـرك ويرضيـك = لعب الاصابع في عقود السباحـي
ياليت لو ساعه من العمر ناسيـك = انساك لو الله كتب لـي نجاحـي [/poem]
للشاعر/ عبداللهـ بن محمد المفضلي
