بمناسبة قدوم سلطان الخير للبلد
عودا حميدا ياسلطان الخير
يا طير غرد , وازهري يا نواويـر *** يا شمس طلي , وانزحي ياغمامـــــــة
ويا نفس زفي للوجيه التباشــــــــير *** ويا جفن كف من البكا والندامـــــــــــة
من هالدقيقة ما للاحزان تبـــــــرير *** برجوع أبو خالد لنا بالسلامــــــــــــــة
ما دام (سلطان) الكرم حي وبخــير *** ما عاد ننشد .. لو تقوم القيامـــــــــــــة
بشت يذرّي عن عجاج المعاصـــير *** ووجه يرد ارواحنا بابتسامـــــــــــــــة
وكف يجود بلا حدود ومعايــــــــير *** وشهامة ما بعدها من شهامـــــــــــــــة
أكرم من اللي ما ياخذ الجود تبــذير *** واصدق من عتاب الخوي في خصامه
واشد من ضرب السيوف الشواطير *** واجلّ من وصف يحدد مقامـــــــــــــه
(سلطان) ياقرم يقود الطوابـــــــــير *** يا سيد الجيش السعودي وإمامــــــــــه
يا شوق تلعات الرقاب الغنـــــــادير *** يامنبر الدين الحنيف وحسامـــــــــــــه
جيتك وفي صدري وطن من تعابير *** وبخافقي حب الكويت وغرامـــــــــــه
لان الرفيق: يحن, ويحس, ويغـــير *** والصف الاوحد .. مستحيل انقسامـــه
شعب الكويت يكن لك كل تقــــــدير *** ويبّلغ الشعب السعودي سلامـــــــــــه
ويعاهدك مهما تدور المقـــــــــادير *** نبقى لكم مثل الفشق في حزامـــــــــه
لأن قد المملكة عندنا غـــــــــــــــير *** المحترم يفرض عليك احترامـــــــــه
واللي يوفي بالتزامه مع الغيـــــــــر *** عيب علينا ما نحفظ التزامـــــــــــــــه
يا جارنا اللي ما يجي منه تقصيــــر *** يا أكبر دروع اهل الجزيرة ضخامـة
أرض الحرم.مهد الكرم.منبع الخــير *** طهر الظبي. ستر العبي واللثامــــــة
يا قصة الكوثر, ويا زمزم البــــــــير *** ويا موقع أقدام الخليل ومقامـــــــــــه
أغلى ثرى تاطا به الرجل وتســــــير *** واكثر عباد الله ورع واستقامــــــــــة
إن كبّروا هزّ الفضا صوت تكبـــــير *** ولسجودهم في ناصيتهم علامـــــــــة
طول اللحى لوقارهم زود توقــــــــير *** وقصر الثياب ابهم .. جمال ووسامـة
أصحاب نهج ودينهم دين تذكـــــــــير *** وآمالهم تبني وطن من عدامــــــــــه
لان العمل يجمع شعوب وجماهيـــــر *** عمر الجهل ما عز للدين قامــــــــــة
ومن يدّعي الاصلاح لأغراض تدمـير *** ما اظن للرحمة صلة باهتمامــــــــــه
الموعظة تيسير .. ما هي بتعزيـــــــر *** وحنّا نميّز بالحلال وحرامـــــــــــــــه
ما للهدف من قتل الاطفال تفسيــــــــر *** وصبر على فعل الجرايم .. غشامــــة
أكثر من اللي صار.. وش عاد بيصير؟ *** المسألة وصلت حدود الكرامـــــــــــة
ما الله خلق في سمانا عصافـــــــــــير *** والحمد لله ما لنا بالرخامــــــــــــــــــة
جهّالنا عند المواجه مغاويـــــــــــــــر *** وافعالنا عزم . وثبات. وجزامــــــــــة
يوم الضعيف في الشدايد.. معيثيــــــر *** حنا ليا ضاقت.. نطشّ العمامـــــــــــة
نفزع بوجه المدفع بسيف وبعيـــــــــر *** ولا عاش فينا من يرد بكلامـــــــــــــه
يا مير ما يلحقكم الشك يامــــــــــــــير *** ولا غيركم يا اهل الزعامة زعامــــــة
الله مدّبر فيكم العدل تدبــــــــــــــــــير *** ومعكم يسود امن البلاد ونظامــــــــــه
وان كان للفتنة على الشعب تأثيــــــــر *** يمكن تزّود وحدته والتحامـــــــــــــــه
الحكم حكم الله , ولا فيه تغـــــــــــــير *** ودوامكم يا سيدي من دوامــــــــــــــه
والله لاعنتر.. ولا سالم الزيــــــــــــــر *** يقدر يزعزع بأرض الاسلام هامـــــه
دام الفهد طيّب ، وأبو متعب بخيــــــر *** والنايب الثاني رجع بالسلامـــــــــة
هلّت على الشعب السعودي تباشيـــــر *** وقامت على حزب الضلال القيامة
م/ن
