-
قصائد حمد الضوي
صغيرتي
صغيرتي.. يسعد صباح الفساتين
يسعد شقاوة نظرتك.. يافتوني
غنّى فضل شاكر مع احساس شيرين
كأن انا قايل لهم يعزفوني
كل عام وانتي حب ياشيخة التين
كل عام.. وانتي مسكنك في عيوني
ياللي بكى بفراقك..(العام عشرين)
رقص فرح(عشرين عام)بشجوني
قام يتنامى لك وطن داخلي لين:
استعمر اركاني ودمّر حصوني
واخذت لك حفنة مشاعر من سنين
بنيت منها سنين في وسط كوني
صغيرتي.. يااحلى ملاك ٍ من الطين
هالطين قطعه من رضا صدقوني
ايه اكبري بي لييييين مدري على وين
تاخذني الدنيا معاك..وظنوني
يسعد صبا العشرين..فعيون غالين
كل عام وانتي مثمره ياغصوني
-
مسافه
واضيعني واقول اني ف بالك
وارتب بك على دربي مسافه
واصدق كذبتي واجلس قبالك
واقول البحر..تشبه لك ضفافه
حلالي كلك..او كلي حلالك
تبين الصدق انا احب الخرافه
احب آعيش في واقع خيالك
خيال الواقع اعيتني عجافه
مدام ان الجفا يشبه وصالك
اكيد ان الوصل يصبح سخافه
يعيش من الهوى قلب متهالك
ويهلك من يظن الحب آفه
ويجهل لذّة الحب وخصالك
من يعاتب خفوقي في (حسافه)
حسافه لوظلوعي مو مآلك
حسافه لو مآلي لك.. كلافه
سنيت من القهر محجر ليالك
سلبت نجوم ليلك من عفافه
واناادمنت السهر في وسط شالك
الين الصبح اعياني جفافه
ولاني شفتني في وسط بالك
ولارتبت بك دربي مسافه
-
صار خير
جايزاني كنت قاسي ياحياتي
وجايز انه داخلك قلب ٍ كسير
والأكيد..أعمى وصرتي لي عصاتي
عقبها..من حبك أصبحت البصير
صرت أشوفك..وين ماطالع..جهاتي
كنتي النعمه..وانا جيتك فقير
جيتك اتسوّل غلاك وقلت هاتي
قلتي خذني..وانفرش دربي حرير
طيب ذاتك دلّني في طيب ذاتي
كان حلمي دلو..قلتي هاك بير
وابتدت رحلة وجودك في غلاتي
واكتمل نور الغلا بدر ٍمنير
وقتها لملمت في حبك شتاتي
لين بعثرني شذاك من العبير
عقبها غنيّت من لحن أمنياتي
صغت لك نوتة وفا عبر الاثير
كنت عاتب..صرت انا اعاتب سواتي
غلطه وراحت وانا آسف كثير
طمنّي قلبك وقولي لا تحاتي
وان سألك شصار..؟؟قولي:صار خير
-
يسلمو اسلام على القصائد الرائعه
والنقل المميز للشاعر الضوي
-
صح لسان الشاعر
وسلمت يداك
بو سعيد
دمت بخير
-
-
لاااااء
ياأجمل لاء من عقبك كرهت ال ايه
وصرت أحلم بعد بُعدِك ب ايّّة لاء
غريب..إشتقت للرفض وابي طاريه
والأغرب..ارفض ال ايه وابي إيماء
زرعتك حب في دربي وقلت أجنيه
جنيتك درب في حبي ومتّ إعياء
وصلتك تايه أتعبني سراب التيه
وتهت من السراب اللي حسبته ماء
وجيتك من عنا روحي معي:افييه
نفثت الهاء مع زفره على استحياء
لقيتك حولي احساس ونويت ابنيه
بناني حولك إحساسي على ماشاء
ياحلوه..جيتك وضحكي تعبت أرثيه
تعبت آردد لصمتي..ابي ضوضاء
وانا من يوم مارحتي..وايّة ايه
تسوّل بحّتك تطمع..تقولي لااااء
-
كن الرياض
كن الرياض بغيابك طافي ٍ نوره
والله لوانه تكلّم صاح يااااانوره
نوره وكن السحايب لاانتثر وبله
تبكي فراقك وتشكي من كبر جوره
يابخت جدّه وحظ الساحل الغربي
وآحس..كل الحجاز اليوم مغروره
تدرين لامن تلاطم موجه شيقصد؟
امواج بحره تصفّق فيك مسروره
وان هب عذب النسيم بوقت عصريّه
نادى الغيوم ولقاها منك مبهوره
قال آتنفس هواك ومادرى قبله
على نسيمك تعيش ورود منثوره
لا الليل ليل الرياض وقلت في نفسي
ياااارب تضوي علينابالسمانوره
-
المهالك..المها/لك
طمنيني ياحنونه في غيابي كيف حالك
وفي غيابك طمنيني عن حضوري كيف حاله
والا انا حالة عدوّك الا عقبك ليل حالك
كن حالي حال شايب فاقد ٍتالي عياله
وكنّي اللي زان حاله ثم جرّه للمهالك
للفراق..وللعذاب..وللهموم اللي فباله
آآه ياقلب المهالك..قللي شجاب المها..لك
وانتي من جيتي وقلبي معلن ٍ فيك احتفاله
كيف انا افتي في غلاتك والحنايا فيها مالك
عاقل ٍ من زود عقله لاعقل ساوى هباله
يسهر وآآآخر طموحه انه يمر بخيالك
لأنه اصلا ً وش خياله كان ماصرتي خياله
يعشق فراقه لأنه ينتظر عقبه وصالك
يكره فراقك لأنه ماعرف لذّة وصاله
مُمكنه ياقف برجوى تنفتح شرفة محالك
وش حلاة الممكن الاّ لاحصل فيه استحاله
ابحر بعينك واخاف من الغرق وارجع لجالك
وارجع اغرق في سواد ٍ جل من صور جماله
وارمي نفسي في يدينك واطلبك زيدي دلالك
وآخذك منك لقلبي ويتمادى في دلاله
واسرف بذنب المشاعر من حرامي في حلالك
الوعد مرسى السفينه والعذر موج الجهاله
كل هذا ماتبيني اسألك وشلون حالك؟
اتركي حالك واباسأل عن حضوري كيف حاله
-
يعطيك العافية
بو سعيد
هذا دليل على طيب اصلك ووفائك
تقبل مروري
