لي بنت عّمً ماوطت درب الادناس ولا دنّست يوم النساء يدنسنّي
قصيده طالما تغنى في بعض ابياتها الناس قديما ولم نعرف صاحبها الا انه رمالي وقد زودني باسم صاحب القصيده الاخ محمد بن فهيد الرمالي ينسبها عن احد احفاد الشاعر وصاحب القصيده هو (شرعان بن فهيد بن فاران الرمالي والقصيده مؤّثره ومحزنه حيث اعترف بخطاءه ولم يجد التسامح من عمه الموجود في العراق في ذلك الوقت رحمهم الله جميعا فأِليكم ابياتها بعد اضافت ماعرفه منها مسبقا .
[poem=font="Simplified Arabic,5,black,bold,normal" bkcolor="white" bkimage="" border="double,4,red" type=0 line=0 align=center use=ex num="0,black"]
ياراكب ثنتين يشدً الاقواس = من عند رمان الحجر زرفلنّي
مافوقهن الا الدويرع وجلاس = وسفايف بين اربعه يلعبنّي
توجهن من عندنا حين الادماس = ومضى سواد الليل مابركنّي
حطن علم عذفا يسارً من الراس = والظهر مع ورد الحفر يشربنّي
وحطوا لهن مع هثلة الحضر بلاّس = عن الحضر والي بالخلا يسرحنّي
وليا لفيتوا عند مدقوق الالعاس = الجادل الي بالمحبه محنّي
قولوا على حبل الرجا نطوي الياس = والبيض غيره كلّهن يحرمنّي
لو يندوي جرحي دويته بدوفاس = ولا بنيّة رفاف البيت منكم ومني
والله يعلم بالخفايا والاوجاس = حب بدا من صغر سنّك وسنّي
ياعم يالي طعت بي هرج الانجاس = طاوعت هرج الناس واخلفت ضنّي
اطعت بي هرج دايس ودواس = وعوارض صدّقتها وابعدنّي
ومن لاخذا من درس الاسلاف نبراس = تمضي حياته بالجفا والتمنّي
واقفيت ادير بضامري كل هوجاس = على وليف بالحشاء غاب عنّي
تبكي خواطرهم الى جيت عساّس = ماتقل انا منهم ولا صار منّي
ومريت دار ماتقل جته الاوناس = ونّيت ودموع العيون اذرفنّي
وجيت المراح الي به العشب محتاس = عشب على مطرح وساده معنّي
محذا سماد النار ومشاقة الراس = وثلاث لايبكن ولايمبكنّي
لي بنت عم ماوطت درب الادناس = ولا دنست يوم النسا يدنسنّي
ضربتها وانا احسب الضرب نوماس = وخليتها من ضيعت العقل منّي
ياناس كيف العين تبكي على ناس = كيف العيون بلا رمد يسهرنّي
لو ينشكي حبه على الطير قرناس = جاه الضحى بمويكره مستكنّي
ولو ينشكي حبه على قّب الافراس = عيّن نهار الكون لايفزعنّي
ولو ينشكي حبه على ذيب الاخماس = يسرح مع الطليان مايجفلنّي
ولو ينشكي حبّه على حمر الاطعاس = صارت شجر وحنطة يوكلنّي
ولو ينشكي حبه على الميت ياناس = يقوم من تحت النصايب يونّي
وحتى النجوم الي مع الجو غلاّس = لو ينشكي حبه لهن وقّفنّي
ولوان جبّه وام سلمان وضراس = يدرن بما بقلبي لحبه يكنّي
تلقى سهل جبّه هضاب ومنحاس = وحتى الجبل بالقاع صار متثنّي
نطيت راس ضراس واوميت بالراس = ومالوم طراد الهوى لو يجنّي
وهلّيت دمع العين واوميت بالرّاس = ورافقت كور العيص لين ابعدنّي
وابعت نفسي عن شبا كل وسواس = والبعد احلا من حياة التمنّي
انا زبون الحرد للخيل مدباس = لاكلشن شهب الشوارب نخنّي
نفسي تشوم عن التلبّح مع الساس = ولا عاش منهو عن خصيمه يكنّي
من شيدوا زبنه على غيد واغراس = اليا نسيت رسومهّم ذكّرنّي
ياعم انا لي طلبت الراس للراس = ياعم شوف ارسومهم ما محنّي
ياصار ماربعك على الرأي جلاس = وجنحان طيران السعد يلفحنّي
تصير دوم للصقاقير مدواس = مثل الذي يسمع صفير المغنّي
والله لولا بكرة يبو نوّاس = حبه سكن وسط الضمير ومحنّي
والله يلو ماتبيني فلا باس = لاكنّ خبثات النفوس اطردنّي
والحمد للي خالق كل الانفاس = واعطا وساع القاع مافيه منّي
دار بدار ولا مناجات الانجاس = ياصار في يمناك لعينك تقنّي[/poem] القروي
