حينما تكون الحيـاة مجرد مسرحيـات

[align=center]السلام عليكم ورحمة الله وبركاته


تمهيد :

عزيزي القارئ .. هل تعلم أن حياتك ليست سوى مسرحيه ؟؟ <<--- هل تعلم انك تسمع بشد

الإنتباه في المقدمات!! :D

هل تعلم انك تعيش في مجتمع تهيمن عليه المناظر الكذابه ؟؟ ..

هل تعلم انك مجرد أداة يسوقها التميلح و الترزز ؟؟ .. هل تعلم أن الزرافه لا تنام في اليوم

الواحد سوى 9 دقائق على الرغم من طول رقبتها !!

هل تعلم أني زرفت المعلومة السابقة (حقـت الزرافه) من إذاعة المدرسة رغم أنه ليس لها

داعي في موضوعنا هذا ,,,,,,,,,!!!! :ang



تنويه :

الموضوع طويل جداً فلذلك اللي ماعنده (لياقه قرائيه) أنصحه بنسخ الموضوع للوورد

ومن ثم قرائته على مهل وبالذات اللي إتصالهم لازال (سلكي) مو ألقاه بكرا لاجت

فاتورته مرتقعه يقول كلها من مسرحيات (عاش واقف) وقد أعذر من أنذر !!!! :note:


أتفقنا


على الله توكلنا





أبطال المسرحيات :حسب ظهورهم على خشبة المسرح


عاش واقف

مدرسة المثنى ابن حارثه الإبتدائيه

بلدية رفحاء

جامعة الملك سعود

أبو رجل على رجل

التلفزيون السعودي

سوق الأسهم

المرور

محكمة الرياض

فتاة الدمام

الشحاد الكشخه

والعديد من الشخصيات والجهات الأخرى اللني يعنيها الأمر اللتي كان لها تأثير

واضح في هذه المسرحيـــات










المسرحية الأولى :


في مدرسة ابتدائية حكومية صغيرة , كئيبة و مريبة في نفس الوقت !! ..هناك بدأت دراستي..

<<-- ما حسيتوا إني غازي القصيبي وأنا أقول هناك بدأت دراستي !!:D

لم تكن المدرسة تحوي أي وسائل تعليمية أو تربوية .. كان شكلها من الخارج أقرب إلى

المقبرة منها إلى المدرسة !! ..

كانت واجهة المدرسة تحوي على القليل من الأشجار الميتة وفي داخلها الكثير من

الكتابات المشينة .. لم يكن هناك أي معامل للتربية الفنية مثلا ً أو النشاط عموماً !!أو غرفة

للتربية الرياضية حتى !! ..

فلم تحوي المدرسة إلا معمل واحد لمادة العلوم والذي بدوره كان يحّوي على عدد

من القوارير المليئة بالحشرات و الثعابين التي لم تتحرك منذ أمد الدهر ولم تستعمل إلى

يومنا هذا !!ولازلت اسأل نفسي إلى يومنا الحاضر مــا فــائـد تــهـا !!!! :no

ذات يوم دخّل علينا مدرس التربية الفنية الفصل وقال لنا : يا طلاب من عنده أعمال أو

رسومات أو على الأقل خطه زين ويعرف يخط ومستعد يشتغل معي ؟! ..

رفع عدد من الطلاب أيديهم وكنت أحدهم ..

قال لنا المدرس : يالله اجل تعالوا معي .. نظرات الغيرة من زملائنا الطلاب لم تكن أوضح منها

قبل هذا اليوم .. فمن قدنا طلعنا من الدرس !! .. خرجنا من الفصل ومشينا خلف المدرس

إلى أن وصل إلى غرفة المدرسين عندها قال لنا : بعد أسبوعين يبي يجينا مدير التعليم ..

ونبي نفتح غرفة التربية الفنية ونبي نـ ...

لم ننتظره حتى يكمل كلامه وقاطعناه بصوت واحد : يا أستاذ عندنا غرفة فنية؟! 8O

رد علينا المدرس : إيه عندنا .. المهم يا طلاب نبي نفتحها وننظفها ونعبيـها رسومات و

لوحات وأعمال

.. من فيكم يبي ينظف ومن يبي يرسم ومن بيجيب أعمال ؟! إيه صح وقبل لا أنسى ترى

الشغل هذا عليه درجات و لا تخافون بعطيكم ورقة موقعة مني أنا.. والمدير عشان تطلعون

من الحصص وتشتغلون معي!!

رجعنا إلى الفصل والفرحة تعتلي محيانا .. وبعد أن دخلنا بدأت الأسئلة والعبارات تنهال علينا

من كل طرف

( هاه وش سويتوا ؟! - وش صاير ؟! - أحلى من قدكم فآتتكم حصة الرياضيات ! ناقتي يا

ناقتي .وهلم جره )

.. جلسنا في مقاعدنا وبدأ كل طالب يخبر من بجانبه عما حدث ..


وبعد عدة دقائق دخل علينا مدرس التربية الرياضية وقال لنا : يا شباب أي واحد يجيب لنا

عمل للتربية الرياضية سواء كان صحيفة أو مجسم راح يلعب في الدوري ... قاطعناه وقلنا

بصوت واحد: بس حنا ما عندنا في المدرسة دوري كوره يا استاذ ؟! .. رد علينا : هاه !! ..

طيب مهي مشكلة نسوي لكم واحد

.. بس لا تنسون جيبوا الأعمال في أقرب وقت !!


بعد حوّالي الأسبوع والنصف أصبحت المدرسة نظيفة برا قة .. تشع نوراً من كل جهة ..

فأصبحت واجهة المدرسة مقاربة لقصر الأفراح بعد أن كانت مقبرة مهجورة .. بل كان

ينقصها لوحة " تم الافتتاح " لكي يحسبها الناس محلاً تجارياً .. نظفت الممرات وتم إزالة

جميع الكتابات (المشينة) و علقت اللوحات الفنية على جدران جميع الممرات التي سوف

يعبر مدير التعليم منها ... وبالطبع تم تجاهل الممرات الأخرى التي لا يمر منها إلا نحن الطلاب

افتتح معمل التربية الفنية وكان يحوي على العديد من الأعمال الفنية والرسومات .. معمل

التربية الرياضية حوى بدوره على العديد من المجسمات والمنشورات الرياضية .. تلك الفترة

كانت أفضل مرحلة قضيتها في المدرسة .. فلم ندرس في اليوم إلا حصة ً واحده !! ..

وباقي اليوم فيذهب إما في تعليق الصور على الجدران أو الرسم وعمل الأعمال !!!


في اليوم الذي سبق الحفل.. أرسل مدير المدرسة رسالة مع الطلاب إلى أولياء الأمور كتب

فيها :

( أعزائي أولياء الأمور .. نفيدكم بأن يوم غد سيقام في المدرسة حفل كريم .. سيشرفه مدير

التعليم لذا ندعوكم مشاركتنا الحفل .. وللمعلومية فقط ! ترى فصل الصيف دخل له

شهرين فـ يـاليت لو تغيرون ثياب عيالكم الشتوية واللي الأرض أنظف من كمومها .. وقبل لا

أنسى ترى حصة الرياضة بكرة ملغـية!!فيا ليت ما يلبسون الطلاب تكميله رياضيه تحت الثوب ))

في اليوم التالي و بعد حضور مدير التعليم .. وانتهاء الحفل الكريم .. عاد كل شيء إلى وضعه

القديم .. وأغلقت المعامل ونزعت اللوحات والتصاميم .. وكأن شيئاً لم يحدث !!

وعدنا للدراسة في المدرسة القديمة..



وأغلق الستار وانتهت المسرحية !!


طبعاً هالمسرحية بالذات كان لها أثر سلبي على أهالينا .. فصاروا يرفعون الأكواب الزينة

للعزايم والمناسبات ويخلوننا نشرب بأكواب جبن سايل !!! )


إلى متى نشرب الحليب بأكواب الجبن ؟؟








المسرحية الثانية :


كبرت وبلغت سن الشباب وكأي شاب كنت اجلس في الشارع مع أصحابي في الحارة ,

كان شارع حارتنا قديم وإنارته سيئة و مهترئ جداً إلى درجة أن السيارات تفضل المشي

على الرصيف بدلاً من الشارع!!..

في حارتنا وفي وسط الشارع كانت هنالك حفرةَ كبيرة بمقابل منزلنا بالضبط .. لن أكذب لو قلت

إنها إحدى أبرز المعالم في الحارة .. فـ بسببها لم نكن نعاني من مشقة في توصيف بيتنا لأي

شخص , حتى عمال التوصيل التابعين للمطاعم لم نكن نقول لهم سوى " بيتنا قدام الحفرة "

وبعد عدة دقائق نجده عند الباب , وزيادةً على أن الحفرة معلماً من معالم الحارة فهي ملعب ومرتع

لأطفالها أيضا .. كنا نجلس بالقرب منها ونلقي فيها الحجارة حتى نملئه , ثم بعد ذلك نخرج الحجارة

ونعبي الحفرة مرة ً أخرى <<--- خلاص خلاص يا إبن الناس درينا أن الحفرة مهمة !! :lol

ذات يوم وأنا في طريق العودة من المدرسة إلى المنزل , تفاجأت عندما دخلت الشارع ولم أجد الحفرة!!

التفت يميناً وشمالاً لكي أتأكد بأنني في نفس الحي الذي اقطن فيه !! وتفاجأت أكثر عندما رأيت

الأعلام و الإنارة والتي لم تكن موجودة سوى في الشوارع الرئيسية وحتى جابوا لنا هذيك اللي

كنا نحلم فيها من يوم اننا صغار , العمود اللي يصير في أخره دائرة حمراء مكتوب عليها كلمة ( stop )

قلت في نفسي " ربما أنا احلم!! " قطع حبل أفكاري وتساؤلاتي صوت شتم وسب , التفت لأجد جارنا

واقفاً أمام منزله وهو في حالة يرثى لها ..

ذهبت إليه وسألته : وش فيك عسى ما شر ؟! , رد علي وهو غاضب : الله لا يبارك في العدو قل آمين ,

رديت عليه : آمين .. بس وش صاير لك ؟! ووش صاير للحارة ؟! لا تقول لي انهم يزبطونها عشان يطرحونها

للاكتتاب !! ,:think: رد علي : لا .. لا .. هم دفنوا الحفرة و زفتوا الشوارع وغيروا الإنارة عشان فيه مسؤول كبير

يبي يمر من هنا .. رديت عليه : طيب وش فيك معصب كذا عاد !! ..

رد علي : اليوم الصبح والعمال يشتغلون ويزفلتون الشارع شافوا باب القراج حق بيتي مفتوح ..

وأنا الحوش حقي ما يواجه .. فخافوا أن المسؤول يمر من الحارة وباب بيتي يصير مفتوح ..

رديت عليه وانا مستغرب : طيب وش دخله ؟! .. قال لي : زفلـتوا حوش البيت .. قال أيش .. ما نبي

نخاطر ويمر المسؤول وباب بيتك مفتوح!! لأنه منظر غير حضاري! ..

رديت عليه وقلت : أحمد ربك يا رجال أن عيالـك مهم في الحوش ولا كان زفلتوا رجل واحد منهم بعد!! :-:



ويغلق باب القراج.. أقصد ويغلق الستار!![/align]



يتبع

أرجو عدم الرد حتى أنهي كتابة ثمان مسرحيات بصيغة ردود على هذه الصفحه

[align=center]

المسرحية الثالثة:


تخرجت من المرحلة الثانوية و تم قبولي في الجامعة , فرحتي كانت لا توصف فـ لقد تم قبولي من بين

الألاف و خطوت خطوةً مهمة نحو المستقبل .. أتتني التهاني من الأقارب .. ولا عجب في هذا ولكن الشيء

المستغرب أن البعض كان يدعو لي بالعون والنجاة والفكه من الجامعة كما لو أنني ذاهب إلى سجن أو راحل

إلى علاج .. تم تحذيري من الجامعات و ظلم الدكاترة وما يحدث من مشاكل .. ولكني لم أعبأ بما قيل لي

لأن التعليم العالي كان طموح بالنسبة لي وهدف لا بد من تحقيقه! بعد أن درست وتوغلت في ثنايا الجامعة

رأيت وسمعت عن أشياء لا تخطر على بال بشر .. من ظلم وتعدي على حقوق الطلاب و تسيب و استهتار

بالنظام .. طبعاً كلنا عارفين وما ننكر الضغط اللي يواجهه الدكاترة والموظفين ..

بس هالضغط ما يخلي الأمور توصل لأنهم ينجحون طالب متوفي من بداية الترم !!

ولا أنهم يحرمون الطلاب المنتظمين في الحضور من دخول الإختبار!!

وتعلق أسماء طلاب ساحبين ملفاتهم من الجامعة بلوحة من لهم أحقية دخول الاختبار !!

وما أعتقد أن الضغط بيشفع للدكتور بأن يدخل على الطلاب وبكل عنجهية يقول : أنا أدرس الترم هذ (ست)

قاعات غير قاعتكم خمس منهم اشتكوني عند العميد وش تنتظرون انتم ؟! ,

وأظن ما فيه عذر للدكتور بأنه ما يصحح أوراق الاختبارات ويحط لك بدافع الشفقة درجة ( د = مقبول ) بدال

ما يصحح الورق ويعطي الطلاب على قد تعبهم وجهدهم!!

الضغط ما يسمح لهم بأنهم ينزلون لك مواد وبعد ما تدرسها تكتشف أنها محطوطة لك بالغلط ومالها دخل في

خطتك الدراسية.. وبعد ما تكلم رئيس القسم يقول لك : شف يا عزيزي .. دراسة مواد زياده عادية جداً ..

ومفيدة لك وما تضرك أبد .. أهم شيء انك ما تتخرج واتت ما خلصت المواد المطلوبه منك ..

خخخخخخخخ !! <<--- بالله هذا كلام واحد إداري !!


تخيلوا طالب خلص مستوى كامل ولما أنتقل للمستوى اللي بعده ما قدر ينزل مواد وقال له الموظف انه عندك

أربع مواد رسوب من المستوى السابق ! .. طبعاً هو كان ناجح ومعه الأوراق اللي تثبت وكل شيء كان موجود

.. ومع ذلك جلس ترمين ( سنة كاملة ) رايح راجع عشان يعدلون الخلل اللي ما كان للطالبالمسكين أي دخل فيه!!



يوم كنت في المستوى السابع كنت مثل أي طالب جامعي فرحان بقربه من التخرج ولازم يطبع سجله الأكاديمي

ثلاث مرات في الأسبوع ,

دخلت مره على مكتب المسؤول عن الطباعة وبعد ما طلبت منه سجلي الأكاديمي قال لي : أنت طالب جديد وتوك

مسجل عندنا مالك سجل أكاديمي !! ..

قلت له وش لون أنا طالب جديد وأنا لي أكثر من أربع سنوات أدرس عندكم !! أطبع لي السجل لو سمحت

بعد ما طبع لي السجل لقيت معدلي صفر وكأني ما درست ولا ترم ! .. رحت للعميد وقلت له السالفة ونادى هو

بدوره المسؤول عن إدخال البيانات وأستفسر منه عن الموضوع وبكل بجاحة ابتسم وقال يمكن سقط سهواً ..

و فعلاً كما يقال شر البلية ما يضحك اكتشفت أنه فيه 15 طالب سقطوا سهواً مثلي ..

وأبشركم تم علاج هذا الخطأ بسرعة خارقه وتم التعديل بعد ثلاثة أشهر فقط !!

أذكر كان عندنا دكتور في الجامعة .. مشهور بالشـر و الظلم و ترسيب الطلاب وعنده طلاب ما بقى لهم ويتخرجون

إلا مادته هو بس !! .. وجلسوا عنده حدود السنة أو السنة ونصف .. يجون للجامعة ويدرسون مادة وحده بس !!

ويرسبهم وبدون حسيب ولا رقيب !! رغم إنه بعضهم مثل حالتي مغترب دراسياً ..اللي من الشمال واللي من

الجنوب رحنا كلمنا رئيس القسم وقال لنا : الدكتور فلان !! لا تكلموني فيه لو سمحتوا !! رحنا للوكيل وللعميد

حق الكلية وبرضوه نفس الكلام !! حتى أذكر إن واحد من أخوياي مكلم رئيس القسم بعد صلاة العشاء في

المسجد اللي عند بيته ..

لعل وعسى انه يفيدنا وبرضوه نفس الأسطوانه المسجلة " الدكتور فلان !! .. لا تكلمني عنه !!

بعد فترة سمعنا عن مؤتمر كبير لعميد الجامعة والمؤتمر بيحضره وجهاء البلد (اللي فيها الجامعه) وبعض

المسؤولين , حضرت أنا وبعض زملائي المؤتمر وبعد عدة دقائق من دخولنا بدأ العميد بالتكلم عن الجامعة

( نحن نفخر بأن طلابنا .. ونحن نفخر بأن جامعتنا .. ونحن .. ونحن … إلخ ) .. قام أحد الزملاء من مقعده وهو

غاضب وقال له : طيب بالنسبة للدكتور فلان !! .. تفخر فيه بعد ؟! ..

التفت عليه العميد وقال له : لو سمحت (مهوب) هذا وقته الحين !! .. أنا معه صحيح (مهوب) هذا وقته ..

هذا وقت انه يجلس يصور مع كل الموجودين ومن بكرة نفتح جريدة الجامعة ونلقى صوره معبية الجريدة ومصور

مع فلان وعلان !! .. هذا وقت انه يتكلم ويفخر للحاضرين عن طلاب ما عمره شافهم أو حتى يدري عنهم!! ..

صدقني لو استمر وضع جامعاتنا على كذا بعد كم سنة ياوزارة التعليم العالي تلقون نفسكم تدرسون الكراسي

والطاولات!! <<--- كلام كبيييير !!

طبعاً في مسيرتي في الجامعة شفت دكاتره مالهم مثيل ولا بديل وكنا نكن لهم كل احترام وتقدير, لا من أمانة

وخلق وحسن تدبير, ولا بعد وفوق هذا كله يحاولون تطوير الجامعه ! .. بس للأسف كانت توجه لهم الكلمات

المعتاده من زملائهم الحسودين والمتكاسلين " ليه ! - وشهولة ؟! - ماله داعي تسوي كذا! " .. إلى أن

يستسلم أو يمل ويصير مثل غيره إلا من رحم ربي !!



وتغلق أبواب الجامعه !! أقصد ويغلق الستار



يتبع[/align]

[align=center]المسرحية الرابعه :


تخرجت من الجامعة(بشق الأنفس) وتغيرت نظرتي للحياة وللمجتمع .. وصرت أبحث عن سبل المعيشة

بشتى الطرق و طوال اليوم ! .. لدرجة أني ما لقيت لي وقت اشتغل فيه! .. بعد ما قضيت مدة وأنا على

هـالحـال اكتشفت اني مجبر أقدم تضحيات عظيمة لأغراضي الموجودة عندي في البيت .. و اضطرّيت أبيع

كل السياكل والخرده اللي في بيتنا و أبيع المكيفات والأكبات اللي مالها سنع وبمساعدات من الوالد والوالدة

الله يشفيهم ويحفظهم وأيضاً مساعدة من شقيقاتي الله يحفظهم) طلعت لي بمبلغ 20 ألف ريال سعودي.

كنت كل ما أسال واحد وش المشروع اللي تنصحني فيه ؟! يرد علي وهو مطمئن سوق الأسهم لا يفوتك..

و بعد المشاورات اتكلت على الله ودخلت بفلوسي في الأسهم .. ما أخفيكم إني ما كنت مرتاح لها !! ..

لأني كنت أحس أني أبيع وأشتري الهواء !! .. يعني حتى لعبة المونوبولي إذا شريت فيها شيء يعطوني

صك له .. وتأخذ 200 في نهاية كل لفة وتقدر ترهن المحطات وتقدر . <<--- خلاص خلاص عرفنا أن عندك مونوبولي :D

دخلت في السوق والحمد الله مع إني كنت ما اعرف شيء فيه إلا إني كنت اكسب !! ..

ومع إني كنت ضد نظرية انك تخاطر برأس المال كله إلا إني خاطرت به ..

طبعاً المخاطرة برأس المال كله غلط صغير بالنسبة للي يبيع بيته أو يتسلف مبلغ كبير !! المهم .. في يوم

من الأيام فتحت جهاز الكمبيوتر على محفظتي الاستثمارية وما دريت ألا وكل شيء في الشاشة احمر حتى

أسمي بعد

طيحت سوق الأسهم كسرت ظهر الكثير وترتب عليها الكثير من المصّايب والمشاكل والخساير وزاد المصيبه

اننا نخسر من هنا والمعيشه تزيد من هناك على سبيل المثال السكن والعقار ..

وقبل مدة قريبة قريت عدة مقالات أغلب محتواها كان ( أننا نواجه مشكلة غلاء في المهور وأن أغلب الشباب

ما يبون الزواج وأنهم ليسو على قدر المسؤولية لفتح بيت !! ) ..

أنا من وجهة نظري أشوف أن (المهور) مهي بذاك الغلا !! أو على الأقل الأغلبية منها أسعارها معقوله ..

اما بالنسبة لفتح البيت فأكيد ما راح نفتح بيت أو نعيل أسرة ..

إذا صار الواحد وهو عزوبي يالله يكفيه مصروفه!! أجل بالله فطورنا صحن الكبدة بعشرة ريال و طبق البيض بـ 18ريال

وجبن الكيري يوم حنا مغتربين بالجامعه ناخذه بريالين والحين صار بخمس ريالات>>- أبعدوك عننا مكرهين ياعم

(كيري) لاتظن إننا جحدناك !!


إذا صارت أغلب الوظايف الموجودة ما تطلب إلا جامعي وبتخصص معين ومعه خبره من ثلاث إلى خمس سنوات

وتشترط عليه إجادة اللغة الإنجليزية تحدثاً وكتابة بالإضافة للتعامل مع الحاسب الآلي وبراتب ألفين أو ثلاثة أكيد

ما راح نقدر نفتح بيت !!..

إذا صار القطاع الخاص يوظف السعوديين بألف وثمان مئة ريال في الشهر وتجبره يوقع معها عقد يقول فيه أنه

لو تركهم خلال أول سنتين راح يدفع لهم ست ألاف ريال !!..

طبعاً قمة القهر أنك تتخرج ومعدلك ممتاز(مو انا) و تخصصك مطلوب وما تلقى وظيفة .. بينما واحد ثاني متخرج

من تخصص مكتفي من عدة سنوات ومعدله متدني ويتوظف ويمكن يطلع له بعثه ويسافر ! عشان أبوه منصب

ويعرف فلان وعلان .. بينما أبو الشخص الأول ما يعرف إلا أمه بس!!


وهالحين أصحاب الشقق صاروا يرفعون الإيجارات على المستأجرين من 14 ألف ريال إلى 22 ألف ريال خلال سنة

وحدة !! مع العلم أنه ممنوع عليه زيادة الإيجار أكثر من 6% في السنة !! بس على ما قال المثل لا غاب القط

العب يا فار والحين مو فار واحد ألا فيرااان بس الله يرحم الحال ..

وفي الختام لهذه المسرحيه أحب أقول لكم وبحكم أني (شاب) وعاصرت الشباب أن أغلبهم ودهم يتزوجون ..

وإذا علي أنا ودي نتزوج كلنا .. بس أسمحوا لي أقولكم ما عندنا مهور أو بالعربي المهور أخذها الهامور !!


ويغلق الستار مرة اخرى !!!



نسيت أقول لكم أن المسرحية هذي كلها مكتوبة قبل زيادة الـ 5% التراكمية






المسرحية الخامسة:



تتوظف في إحدى الدوائر الحكومية براتب زهيد .. وبمنطقه غير منطقتك.. تبدأ تشتغل بذمه وتتعب وغيرك جالس

يقرا جرايد وحاط رجل على رجل وكل شوي يسأل " هاه ما جعتوا نطلب فطور !!

يصير لأهلك ظرف طارئ .. تروح للمدير وتقول له أبسافر لأهلي و يرد عليك بـ لا .. لا .. ما نقدر نعطيك إجازة من

ينوب عنك ؟! .. تقول له ينوب عني زميلي في المكتب ( أبو رجل على رجل وجرايد ) ..

يرد عليك المدير : لا .. هذاك ما يعرف شيء وما نستفيد منه ! .. ترجع للمكتب وإجازتك مرفوضة .. وبعد أسبوع

تتفاجأ بأن زميلك ( أبو رجل على رجل و جرايد ) مقدم على إجازة و وقع عليها المدير .. تروح للمدير وتكلمه و يرد

عليك بكل بساطه : خله يروح ويفكنا ... تراه ما يعرف شيء أبد!!

بعد مدة .. يدخل عليك المدير في مكتبك ومعه معاملة مستعجلة يعطيك إياها ويقول لك شف لي هالمعاملة ..

ترفع راسك والمعاملات مالية مكتبك وتقول له طيب عطها فلان ( أبو رجل على رجل وجرايد( شفه فاضي وما عنده

شغل !! .. يرد عليك ويقول : فلان ما يعرف شيء أبد !!


بعد مدة .. تدخل المكتب وتسأل عن فلان )أبو رجل على … إلخ اكيد عرفتوه عاد)

يردون عليك زملائك ما دريت فلان منتدب ..!! تروح وتكلم المدير ليه يروح فلان وأنا لي كم شهر قايل لك الإنتداب

هذا بالذات أبيه .. يرد عليك بكل برود : خله يروح ويفكنا .. فلان ما يعرف شيء أبد !!

والله يستر في الأخير لا يصير أبو الجرايد هو مديرك !!

مايمديه تدرون ليه!! لأني تركت الوضيفه له !! يعني إستقلت قبل أن يقيلوني




.. ويغلق الستار!!![/align]

[align=center]
المسرحية السادسة:


دايم وأنا أتفاعل مع أخبار الجرايد!! كان أي واحد يقول لي لا تصدق ما تقراه ترى أغلبه كذب!!

وكنت أقول له مهو معقول يا أبو فلان ان كلها نصب ! يعني يكتبون الأخبار من روسهم ؟! يمكن فيه إضافات

ومبالغات بس بنسبه قليلة .. هذا كان رأيي .. لكن بعد ماصار لي هالموقف صرت ما أستبعد اي شيء !

وهذا هو الموقف :

في أحد الأيام وأنا أتسوق في إحدى (مولات) الرياض الكبرى , وقف بالقرب مني رجل ومعه ميكرفون

وقال لي : معليش يا طيب بس ممكن نسألك سؤال ونصورك عشان تطلع في التلفزيون ؟! ..

ابتسمت في وجهه وبعدها مررت يدي على شفاتي لكي ابللها ثم مسحت بيدي خصلات شعري المنسلة على

جبيني وجاوبته بكل اريحيه : ايه , وليش لا !! :k:

بعد ما وافقت على طلبه مد لي ورقة صغيرة والتفت على صاحبه المصور وناداه بأسمه " فلان .. يا فلان تعال وجب معك

الكاميرا " وبعد ما نادى صاحبه والتفت إلي..

و سألته قبل مايسأل وقلت : الحين وش هذي الورقة ؟! .. ضحك وقال لي أن هذا هو الجواب اللي تبي تقوله

الحين إذا جينا نصورك !!!

رديت عليه بأستغراب : يعني أنت معك السؤال و معك الجواب وانا بس مجرد (كومبارس) أو شخص يمثل لك

إجابتك ؟! إذا الدعوة على كذا ..اجل أحسن لكم تدورون على شخص مليح الوجه عشان يقول إجابتكم .. صح ؟!:no

أبتسم وقال لا يالطيب حنا ندور الناس اللي شكلها عادي جد وشكله مو إعلامي أو بالعربي مفهي!! :roll

رديت عليه بأستهجان : بعد بعد !! اسمح لي أنا بقول الجواب اللي في بالي والا ما راح أصور!! >> تكفى وافق:no

بعد ما قلت له كلامي هذا اخذ ورقة الإجابة مني وذهب يبحث عن كومبارس آخر!!

وللأسف كان هذا مذيع لأحدى القنوات السعودية والتي من المفترض أن تعكس لنا رأي الشعب لا أن تمثله علينا !!



وتغلق الأفواه مرة أخرى أقصدويغلق الستار مرة أخرى!!






المسرحيه السابعه :



الساعه 2 الظهر وأنت في سيارتك ومتجه للبيت بعد مراجعه متعبه لأحدى الدوائرالحكوميه , فجأة تطلع عليك

سيارة من أحد الشواع وتدخل عليك سيارة في طريقك مع إن أحقية الطريق لك ! تحاول تتفادها لكن ما باليد حيلة

تتصادمون ,,, تنزل من السيارة وتروح لصاحب السيارة اللي صدمك وتكتشف أنه سائق أجنبي ماله شهر في

السعودية ! , تتصل على المرور وبعد أمد من الدهر يجونك .

في بداية الأمر يحاول يقنعك العسكري بأنك تتنازل لأنه مهو فاضي ينزل ويخطط الحادث في الحر , ترفض عرض

العسكري السخي وبعد الرفض يضطر ينزل من السيارة عشان يخطط الموقع وبعد التخطيط يصير الخطأ 100%

على السائق . يسألكم العسكري هل معكم تأمين ؟! تردون عليه بالموافقه , بعده يرسم العسكري التخطيط

و يكمل باقي المحضر على (كبوت) السيارة وفي الأخير يطلب منكم مراجعة قسم المرور لكي يتم إكمال باقي

الإجراءات وعشان يعطيكم ورقة إصلاح السيارة .


من بكرة و في مركز المرور .. أول ما تدخل على مكتب الضابط يطلب منك تجيب رقم محضر الحادث , تروح للمكان

اللي بتاخذ منه الرقم وتتفاجأ بأنه قدامك طابور طويل , توقف فيه وبعد ما يوصلك الدور وتأخذ الرقم .. تفرح بأنك

خلصت من هالطابور وترجع لمكتب الضابط عشان تكمل إجراءاتك وتخلص لكنه يقطع فرحتك ويقول لك رح أوقف في

طابور ثاني ومعك رقم المحضر عشان يعطونك أوراق تقييم للورش.. تروح تقيم سيارتك في ثلاث ورشّ وبعدها ترجع

للمرور عشان يصدق لك التقييم .. وتجيب أسعار قطع الغيار مختمه .. وبعدين تبدأ مطاردتك خلف شركات التأمين

وقد تجلس بالشهرين أو الثلاثة وارجع للمرور خذ ورقة إصلاح طبعا ما يحتاج أقول لك لا تضيع رقم الحادث عشان ما

يتعيجز العسكري يراجع في السجلات ويمشيك سريع سريع ..

المشكلة ان كل هذا و الخطأ فيها مهو منك وتقرير المرور يفيد بذلك 100% ! ..

أيه صح نسيت أقول لكم وش صار على السواق .. بصراحه كل اللي سواه انه عطى المرور صورة من التأمين وبس!

يمكن تقولون أن هذا شيء طبيعي ولازم تأخذ الأمور مجراها بالشكل هذا وأن الطوابير والتأخير شيء عادي .. بقول

لكم تراني عطيتكم مثال على حادث بسيط وما فيه أي إصابات ..

طيب تخيلوا لما يجي مراهق يفحط ويصدم سيارة فيها عائلة ويتوفون!!!

أنا لي صديق عزيز (من أهل الرياض) زميل دراسه جامعيه أعتبره مثل أخوي!! صار له حادث

صادمه واحد يفحط وتوفت زوجته و ولده الصغير -الله يرحمهم – وجلست القضية ست شهور الين ما وصلت

للمحكمة ! وبعد وصولها للمحكمة بدأ التأجيل اللي ما يقل عن شهرين .. وصدقوني ما فيه أشين من أنك توقف

قدام واحد قاتل أهلك.. ولما القاضي يطلب منه الأوراق يرد هالمراهق بكل بجاحه

ويقول : ما دريت أنكم بتحتاجونها ! .. وما يكون من (القاضي) إلا الرد بكل بساطه " تأجل القضية لمدة شهرين "!!


طبعاً كل هالتأجيل اللي صار للخصم ( المفحط ) وهو ما عنده أي واسطة بس كانت واسطته الوحيدة هي

(البيروقراطية) .. >> مدري منين جبتها

وأعتقد لو كان عنده واسطة كان الحين صديقي مسجون من اول يوم

وقايلين له: أحسن من قايل لك تطلع ومعك أهلك!! :ang



ودي أغلق الستار بس القضية ما انتهت إلى الآن! عشان كذا أبقول يؤجل غلق الستار لمدة شهرين [/align]

[align=center]


المسرحية الثامنة :


قبل فترة وأنا أمشي في إحدى مواقف مستشفيات الدمام لقيت قدامي بنت قالت لي الله يعافيك يالطيب أنا

جاية أسوي لأمي مراجعة وفلوسنا كلها راحت على الدكتورة والعلاج ونبي منك الفزعة يالأخو وما أبي منك إلا

قيمة التاكسي ..!!

أنا لا إرادياً دخلت يدي في جيبي ومديت لها عشرين ريال .. طبعاً كان السبب هو تحرك جانب الرحمه والأخوه

والرجولة وكان وفيه سبب ثاني وهو أني (خقيت) على البنت (وفهيّت) وعطيتها الفلوس وانا ما ادري :vmad

بس هذا سبب ضعيف جداً عشان كذا خلونا على السبب الأول أحسن وأوجه!!

بعد ما مديت لها العشرين ريال قالت لي بس عشرين ؟! :eek:

رديت عليها باستهجان لا تقولين لي حتى الشحاذة غلت بعد !! وبعدين وش فيها العشرين ؟ تدرين اني كنت

ناوي أخليك توقعين على إيصال إستلام على العشرين ريال.. :-: ورحت وتركتها



وقبل فترة وأنا في إحدى محطات الوقود جاء لمي واحد كاشخ ولابس لبس أحسن من لبسي .. لدرجة اني أول

ما شفته توقعت انه بيقول لي : والله أني رحمتك أنت وسيارتك هذي عشان كذا أبكتب لك شيك وأشتر سيارة

جديدة بددل سيارتك المهرقله !! بس الطامة الكبرى أنه عطاني هالورقة


http://www.mrkzy.com/uploads/a1b1ff43eb.jpg


قبل لا اعلق على الورقة أحب اقول لكل اللي شافوا علامة " تويوتا " على الدركسون أن سيارتي مهي شرط

تصير هيلوكس 96 يمكن تصير جيب لاندكروزر2008 مثلاً <<--- فضح نفسه :-:

ايوه وين وصلنا.. نعم يا اخوان عطاني ورقة ملونه ومطبوعة بالكمبيوتر ولا بعد تدرون وش القهر!!

القهر يوم عطاني الورقة طلع جواله من جيبه وأتصل وأبعد عني شوي عشان ياخذ راحته بالكلام ..

أنا على طول طلعت جوالي عشان أصور الورقة وبعد ما صورتها شفت جوالي وتذكرت أني أنا بكبري جوالي

مفصول ! ..

رجع لمي الشحاذ الكشخه عشان يأخذ ورقته .. مديتها له وقلت له : الله يرزقنا ويرزقك , وترى جوالي مفصول كان

معك شيء لا تقصر معنا الله يعافيك !!



بعد ما شفت هالشحاذ المتطور صرت ما استبعد أن الواحد وهو واقف عند الإشارة تجيه رسالة بلوتوث مكتوب فيها

( السلام عليكم يا صاحب السيارة أنا الشحاذ اللي واقف تحت عمود الإشارة , لو تكرمت عطني ما تجود به نفسك

على رقم الحساب المذكور أدناه )



فيه ملاحظة أنا ملاحظها ومدري يمكن أني غلطان أو بالأحرى أتمنى إني أكون غلطان .. الحين ليه اللي يبيعون

خضار و جح وتمر في الشوارع ما يمديهم يوقفون في الشارع ومعهم بضاعتهم إلا والبلدية طابه عليهم وينقلب

الشارع كله اصفر في اصفر!!!

صحيح انه غلطان ومخالف بس على الأقل أفضل من اللي يشحذون عند المساجد والإشارات واللي ما عمري شفت

احد يمسكهم أو يكلمهم حتى !!

مع إن اغلبهم كذابين و القهر أنهم يطلعون دبل راتب موظف البلدية و دبلين اللي يبيعه بياع الجح الممسوك من قبل

البلدية وكله تحت راية ( أعطوني من ما أعطاكم الله )






نعم يا أخوان حياتنا كلها عبارة عن مسرحيات وإن لم تكن البطل فتأكد بأنك من الجمهور


ونأسف على الإطالة
















[/align][/color][/font][/size][/align]

رااااائع ،،، لقد استمتعت بقرائة إبداعك ،، صدقت حياتنا عباره عن مسرحيات ،،

ولقد دخلت في مسرحيات كثيرة وللأسف لم أكن البطل ،،ننتظر المزيد

[align=center]

اقتباس:

---

المشاركة الأصلية كتبت بواسطة 470-uwjSJ

رااااائع ،،، لقد استمتعت بقرائة إبداعك ،، صدقت حياتنا عباره عن مسرحيات ،،

ولقد دخلت في مسرحيات كثيرة وللأسف لم أكن البطل ،،ننتظر المزيد

---

شكرا لمرورك أخي لكزس وإن لم تكن بطلاً فأنت ضحيه بطوله قام بها أخر

فالحياة مسرحيات لاتنتهي[/align]

أما المسرحية السابعة والثامنة فقد كنتُ فيها بطلا لا كالأبطال بس لا تسألن وش صار علي في النهاية ..
أخي عاش واقف : لديك قلم يجيد فن الرواية وفن السخرية أمتعتنا بأسلوبك متعك الله بالصحة والعافية بس عاد بشر لقيت وظيفة .

عاش واقف


مساك الله بالخير


مسرحيات رائعة وأسلوب يجعل القارئ يعيش واقفا وسط أحداثها ويتساءل هل أنا المقصود ...؟!!

تحياتي

واحترامي

أخوك ولد الشايب

عاش واقف جميل ماكتبت من مسرحيات هي حياتنا للأسف

شكراً وعشت مبدعاً ياواقف ونسأل الله الا تتوقف عن هذه الكلمات وهذا الأسلوب المتميز

مسرحيات مصغره من واقعنا
ابدعت اخي عاش واقف
قلم بغاية الروعة والجمال

الله يفتحلك ابواب رزقه أمين.
وجزاك الله خير

الله يعين كل جامعي وينصرهم على هؤلاء الظالمين


الدنيا مسرح بس مسرح كبير

يا تفرح فيه او تحزن جايز يصير

اقتباس:

---

المشاركة الأصلية كتبت بواسطة هبوب الريح

أما المسرحية السابعة والثامنة فقد كنتُ فيها بطلا لا كالأبطال بس لا تسألن وش صار علي في النهاية ..
أخي عاش واقف : لديك قلم يجيد فن الرواية وفن السخرية أمتعتنا بأسلوبك متعك الله بالصحة والعافية بس عاد بشر لقيت وظيفة .

---

وانا بي شفايه ولازم اعرف وش صار

الف شكر لك اخوي هبوب الريح على كلماتك بحقي والله يعافيك ويخليك لعين ترجيك

أما الوظيفه ياليييييييييييييل ماطولك

اقتباس:

---

المشاركة الأصلية كتبت بواسطة ولد الشايب

عاش واقف


مساك الله بالخير


مسرحيات رائعة وأسلوب يجعل القارئ يعيش واقفا وسط أحداثها ويتساءل هل أنا المقصود ...؟!!

تحياتي

واحترامي

أخوك ولد الشايب

---

يامساء الورد وصباح الخير

وكلماتك الأروع ولأن أحداثها واقعيه فهي تخصنا جميعا وما كنت لها إلا محدثا بالنيابه
عن ضحاياها جميعاً

على راسي ياعيال الشايب جميعاً

ألف شكر لك ولمرورك الكريم اخوي ولد الشايب

[align=center]

اقتباس:

---

المشاركة الأصلية كتبت بواسطة الزعيم

عاش واقف جميل ماكتبت من مسرحيات هي حياتنا للأسف

شكراً وعشت مبدعاً ياواقف ونسأل الله الا تتوقف عن هذه الكلمات وهذا الأسلوب المتميز

---

ياهلا بالزعيم والزعماء مع إني (شبابي) بس الزعيم زعيم!!

مع الأسف هي حياتنا

شكرا لطيب مرورك وثنائك وصدقني مافي شي من قيمتكم ولاتحرمني زيارتك[/align]

[align=center]

اقتباس:

---

المشاركة الأصلية كتبت بواسطة عروووبة

مسرحيات مصغره من واقعنا
ابدعت اخي عاش واقف
قلم بغاية الروعة والجمال

الله يفتحلك ابواب رزقه أمين.
وجزاك الله خير

---

والأروع مرورك والإبداع تواجدك أوخيه عرووووووووبه

ويعلم الله أن قلمنا لايبحث عن تميز بقدر مايفضفض عن مافي

النفس بس خليها على الله

أمين أمين ياعروووبه والله يسمع منك ألف شكر لك

ولاتحرمينا تواجدك[/align]

[align=center]

اقتباس:

---

المشاركة الأصلية كتبت بواسطة شكسبير الرخيص

الله يعين كل جامعي وينصرهم على هؤلاء الظالمين


الدنيا مسرح بس مسرح كبير

يا تفرح فيه او تحزن جايز يصير

---

ياهلا بأخوة ميثاء وياهلا بأهل الحفر بيننا

عاد مو تمسك علينا ممسك من هالمسرحيات وتحطه بالمقارنات

بين رفحاء والحفر خخخخخخخخخ

والدنيا مثل ماقلت مسرح كبير

شكرا شكسبير على مرورك[/align]