و .. أدور وجه يشبه لي
وأدوّر وجه يشبه لي !!
تغيب الناس مثل الناس !
ولايبقى حزن غافل معاهم .. ماتنبّه لي
وينده صوت
وأحس انه يناديني
وكان .. الموت !!
وأثاري كان ينده لي !
وأجيه أمشي
وأجيه أمشي
وأجيه أمشي .. على مهلي ....!!!!
هنا وأرحل بلاي ولاأعرف لـ وين ؟!
.............. هنا وأفتش بصدري عن أحلامي
ويذبل في دروب الحالمين / التين
.............. وتيبس ضحكتي في وجه أيامي
{وحيد ومامعاي الا ثمان سنيـــن
.............. تنام بـ حضن ذاكرتي وأنسامي}
وأروح أفتح درايش وحدتي للبين
.............. من آلامي وبآخذني على آلامي !
يابنت .. أحلامي أحلامي بكتني لين!
.............. شعرت ان الدروب تضيق قدّامي !
وراميني العطش عند العطش ..للحين
.............. أنادي .. والظمى يطرد ورا الظامي !
قريتك نور في دفتر هوى المسكين
.............. ولمحتك أول الضحكات في الهامي!!
أنا المطعون من ياسي بلا سكين
.............. يبست .. ومابقى مني سوى عظامي !
ياطفله كلنا في هالعمر ماشين
.............. أشوفك .. بس أشوف الموت قدامي !
قبل تدري الجروح وقبل لا تدرين
.............. بأن دروب حلمي... خانت أقدامي !
وطفلك نام ..!
تعب يلقاك في الدنيا وقال: القاك في الأحلام
تعب يزرعك في عيونه ..
علشان الأمل قداااااام !!
تعب يلمحك في صوته .. !
وفي موته.. !
تعب يقراك للأوهام !
نساك انتي !!
نسى نفسه !!
نسى الدنيا !!
ونسى لاينام ..!
الشاعر بركات الشمري
