المسابقه الشعبيه . اتمنى مشاركه الجميع

بسم الله الرحمن الرحيم

السلام عليكم ورحمة الله وبركاته ...... وبعد

احب اطرح عليكم مسابقه وهي من وجهة نضري شيقه والهدف منها هو اكتشاف مواهب بعض كتاب الشعر
علما بان مده السابقه ثلاثه اسابيع .. والجائزه هي اشتراك انترنت لمده شهر مفتوح وهي جائزه معنويه اكثر منها ماديه , امل من الجميع المشاركه ,
كيفية المسابقه ,.
هي عباره عن بيتين شعريين والمطلوب هو اكمالها على نفس الوزن والقافيه بستة ابيات بحيث تصبح قصيده من ثمان ابيات . وفي نهاية المسابقه يتم التصويت من قبل الاعضاء وافضل قصيده تكون هي الفائزه
وتــــــــقـــــــبــــــــلـــــــــو تــــــــحـــــــــيـــــــــاتـــــــي

اخوكم \ كورن فليكس

@@@@@@@@@@@@@@@@@@@@@@@@@@

انا بدعت القاف من حــر شوقي ................................
...............................يوم الهواء مثلي على البال مشتاق
يالي زرعت القلب بقصا خفوقي .................................
............................... مدري متى الايام تعطف وتنســـاق

@@@@@@@@@@@@@@@@@@@@@@@@@@@@

ملاحظه / امل المشاركه فهذه المسابقه للاكتشاف وليست للتقييم

مع تمنياتي لكم بالتوفيق .

الأخ كورن فلكس
فكره جميلة وأنا لي طلب منك لو تكرمت
الاشتراك المفتوح لمدة شهر أنا أتبرع فيه كمشاركه مني في هذا الفكره الجميله
قل تم

الغالي همام

اولا شاكر ومقدر على تثبيت المسابقه واخجلتنا بمدحك للفكره اما

بخصوص طلبك ياخي السالفه على ماقالو ماهي مستاهله لاكن تدري

وشلون انا اتبرع بالاشتراك وبعد اعلان الفائز نطرح مسابقه ثانيه تكون

من نصيبك واقدر لك هذه البادره وهذا التشجيع وان دل على شي فانما

يدل على حرصك وحبك لموروثنا الشعبي وتشجيع المواهب المبتدئه

نحو الكتابه ..

وختاما تقبل ارق التحايا .

اخوك
كـورن فـلـيـكـس

اخوي كورن فليكس

مشكور اخوي على هالمسابقة الممتعة والشيقة بنفس الوقت


وكثر الله من امثالك


كما لا انسى شكر الاخ همام على تحمسه بالتبرع بالجائزة

ووفقكم الله


بس عندي مجموعة اقتراحات ودي اتناقش معك فيها


1- قلت اخوي يجب ان تكون الابيات المشاركة على نفس الوزن والقافية===> وهذا يعني ان اي بيت مكسور يستبعد او اي خطأ في القافية ايضاً.

2-انت قلت اخوي ان الحكم هم الاعضاء ولكن شلون يصير الحكم الاعضاء وفيهم من لايعرف البيت الموزون والمكسور؟:)


وعلى هذا اقول ان الحكم يجب ان يكون مجموعة من الاعضاء الذين لديهم خلفية بالوزن والشعر .. :)

هذي مقترحات بسيطة مني اخوي عاد انت تفصّل وحنا نلبس ولو تبينا نقلبها خواطر بعد على أمرك ههههههههههه:)

بانتظارك اخوي كورن فليكس


:)

تحية

بارك الله فيك حجي ابوفليكس
وانا مع الحجي الدماار الشاامل على الحكم ؟؟

وشلون نبدأ والا ننتظر ؟؟

الاخ الغالي الرقعي
شاكر لك كلامك الطيب اما بخصوص مقترحاتك وهل ستبعد المشاركه

الغير المزونه فاقول والقول لكم انها لن تبعد ولاكن اذا راينا ان هناك

قصيده افضل منها فتكون فائزه وهذه المسابقه وضعت لتشجيع اخواننا

للكتابه اما بخصوص التحكيم فالراي لكم وانا اراى انه في نهايه المسابقه

يرسل الاعضاء برساله خاصه لترشيح القصيده الفائزه من وجهة نضرهم

والقصيده التى تكسب اكثر عدد من الترشيحات تكون فائزه . واسف

على الاطاله ..

:::::::::::::::::

الغالي الدب الداشر
تسلم على كلامك الطيب وياليت تبدا وتتحفنا برواعك الشعريه .
وتقبل تحياتي


اخوكم
كورن فليكس

مشكور اخوي كورن فليكس على الايضاح


وبأنتظار المشاركات


:)



تحية

أعـترف بالجرح في داخل إطار حياتي اليوميه وإن تصنعت روح المرح والفكاهـه وسأحاول أن انقل لكم في هذه الأبيات المتواضعه الوجه الآخر للدب الداشر !!
وأدعو الجميع المشاركه وأختص بالدعوه لـ هرطمان – المختلف – الأصيله– حنين – الحبوبه وصـاحب الفـكره الأخ العزيز كورن فليكس

فــرحـة فــراق
انا بدعت القاف من حــر شوقي
يوم الهواء مثلي على البال مشتاق
يالي زرعت القلب بقصا خفوقي
مدري متى الايام تعطف وتنســـاق

وياللي وصل للقلب ,,, حبه عروقي
عدى غلااها عن بعيدات الآفــاق
أربع سنين ومالها من شروقي
ولابُد لو طـول مداهـا للإشـراق
الرَجَل ماترضى لغيره تسوقي
والقلب مايرضيه عـن مطره أبـراق
مآشوف مع غيره من الناس ذوقي
ولآشوف من غيره مع الناس الأذواق
عندي امل لو نام لازم يفوقي
مثل الأمل بالله فـي رجعـة أعراق
؟؟؟
؟؟؟
؟؟؟
تدرون لو نسيان حبه بسوقـي
حرام أنا لأشريه وأفرح بالأفرااق؟؟

الغالي الدب الداشر ..

ابداع ابداع ابداع صح لسانك على الرائعه اثرك شاعر ومتمكن وحنا

ياغافلين لكم الله . الله يبارك بالمسابقه الي خلتنا نشوف ابداعك

وياليتك

تستمر معنا بهالكلمات العذبه اما بخصوص طلبك مشاركه الاخوان

والاخوات فانا اضم صوتي لصوتك واتمنى مشاركتهم وانا بدوري سوف

اضع مشاركتي مع العلم انا لاتعتبر داخله في المسابقه فهي فقط

لتشجيع البقيه للكتابه وختاما تقبل تحياتي اخوي الدب الداشر .



اخوك
كورن فليكس

اعزائي اضع بين ايديك هذه الابيات المتواضعه تلبيه لطلب اخونا الدب الداشر مع العلم انا ليست من ضمن المسابقه وانما لاتشجيع البقيه للكتابه وهذا مااتمناه .


انا بدعت القـاف مــن حـــر شوقي ......................................
................................... يــوم الهواى مثلي على البـال مشتاف
يالي زرعت القلب بــقصــا خفوقي ........................................
...................................... مــدري متى الايــام تـعطف وتنساق
حرفك نقشته بين عيني ومـوقي ........................................
.................................... واسمـك بـدايـه حب يـانبض الاعماق
ياللي سكنت القلب اسقي عروقي ...................................
.................................... خـل الـهـوى دافي على الدوم دفااق
لــو الـقمر جـنـبـك جـمـالـك يـفوقي .....................................
............................... يخجل شعاع الشمس في وقت الاشراق
انــا عـلى حـبـك حـريـص شـفوقي ........................................
.................................... واهــل الـحـسـد تـرفع لـنـا رايه افراق
لــيت الـلـيـال السود تقبل طروقي ......................................
..................................... انـظم لـك الاشعـار مـن روح عـشاق
وان كـانـت ابـيـاتي لـكم ماتـروقي ..........................................
...................................... يـلعـن ابـو بـيـتـيـن على غيركم لاق


:::::::::::::::: وســـــلامـــــتـــــــــــكــــــم :::::::::::::::::::::::

اخوكم
كورن فليكس

السلام عليكم ورحمة الله وبركاته
ماشاء الله عليكم وعلى اشعاركم الجميله

قد لا اكتب الشعر ولكن عندي جوانب من النقد التي تخطئ كثيراً
البيت الثاني
"يالي زرعت القلب بــقصــا خفوقي"
اعتقد ان كلمة "القلب" فيها خطأ ممكن المقصود "الجرح" أو "الحب" أو .......
لأن القلب هو الخفوق

هذه وجهة نظري ولكم فائق الشكر والاحترام

اخي الغالي همام
اشكرك على تفضلك وكلامك في محله وانا اوافقك الرائ ولاكن انا

اخذت البيتين كما قرائتهن للشاعر العملاق صالح بن سبيل في مجله

المختلف وذالك في صفحة الاهداءات واذا كان هناك اي خطا فاعتقد

انه من المجله وليس من الشاعر وانا بدوري لااتجرا بتغير اي حرف

ينسب للعملاق صالح بن سبيل واعتقد ان مايهمنا هو مايكتب بعد

البيتين ومايطرح من اخواننا المتسابقين . وختاما اشرك على تفضلك

بالرد والحرص على المسابقه يدل على اهتمامك بالموروث الشعبي

تقبل تحياتي .



اخوك
كورن فليكس

اخي / همام

وعليكم السلام ورحمة الله وبركاته
يا اخي لم تخطىء بل معك كل الحق في ملاحظتك
صحيح ان هناك امورا يصعب ملاحظتها وقد تكون مجالا خصبا لفلسفة المتفلسف سواءا كان شاعرا او اديبا او مثقفا الى اخره من اهل الفلسفة
لكن هناك امورا واضحة كوضوح الشمس في كبد السماء
فحتى الطفل الصغير الذي لم يكتمل عمره 6 سنوات الا 9 اشهر يعرف ان القلب هو الخفوق
ولكن كما تعرف فاغلب شعار هذه الايام اذا قال ما يسميه شعرا كانه يلقي على الناس تفاهته ووصاخته وغبائه المدقع في عمق التاريخ
ومع ذلك يجد له مستمعين من سفهاء الناس

سمعت شريط للخبل ( خالد المريخي ) مع الاعتذار الشديد لجميع الخبول ، وكان من ضمن ما سمعت بالشريط قوله:
لعنبوا جدهن ماحلى براقعهن
وبعدها عجت القاعة بالتصفيق والتصفير .
لا اطيل عليك اخي الغالي فنحن في زمن كما وصفه اخي الغالي / ابو شنب بانه يمشي للوراء.

تحياتي لك ولملاحظاتك السديدة .

الاخ رفحاوي
لما كل هذا الهجوم على الشعر والشعراء ياخى دامك ماتحب الشعر غيرك يعشقه ودام ان الطفل ابو ست سنين يلاحظ ان القلب هو الخفوق ليه مااتحفتنا وعلمتنا بهالمعلومه وللمعلوميه ترا النقد له اسلوب ومبادئ وطرق مهو دفش خذني جيتك وتعميم وليتك فطنت لشي ان اخونا همام تطرق للموضوع هذا وانتهينا منه وحنا اللحين في مسابقه يعني مهو وقت المناقشات وعلى قولتك ان الشاعر خالد المريخي قال
زاهياتن براقعهن وتزهاهن .................................
.................................لعنبو جدهن محلا براقعهن

وصار خبل واضن اني انا قلت .

وان كانت ابياتي لكم ماتروقي ,,,,,,,,,,,,,,,,,,,,,,,,,,,,,,,,,,,
,,,,,,,,,,,,,,,,,,,,,,,,,,,,,,,,,, يلعن ابو بيتن على غيركم لاق

والضاهر ينطبق على الكلام على العموم مشكور اخوي





كورن فليكس

المسمى (كورن فلكس)

اولا اعذرني فهذه اول مرة اكتب اسمك الغير مهضوم لدي خاصة وانه ولله الحمد الاسماء الجميلة كثيرة ولكن يبدو ان ذوقك سقط من عل على هذا الاسم !!!

هجومي كان على المتشيعرين والسفهاء وليس على الشعر وارجو ان لا تحور كلامي على كيفك وان لم تفهم شيئا منه اسال وستجدني مسرورا بالاجابة .

اتفق معك ان النقد له اسلوب واتمنى ان تتفق معي بان كل شخص له اسلوب ... فهناك اشخاص يحبون يغلفون رايهم بقدر كبير من المجاملة والتي تتحول بسرعة الى كذب وهذا شيء راجع لهم ... اما بالنسبة لي فاقول رايي مباشرة بدون النفاق المستورد .

اكرر لك ان انتقادي لاي كلام بذيء خارج عن الاخلاق واريد ان اسالك هل تعتبر (التلعين) شيء عادي سواءا كان بالشعر او غيره ؟!!

بيت الشعر واخر كلامك غامض لذلك لن اعلق عليه

اهدي لك نماذج من قصائد رائعة

http://www.rafha.com/vb/showthread.php?s=&threadid=4948

http://www.rafha.com/vb/showthread.php?s=&threadid=4838

http://www.rafha.com/vb/showthread.php?s=&threadid=4730

http://www.rafha.com/vb/showthread.php?s=&threadid=4807

كورن وعرفنا أنه كتب الشعر من أول يوم سجل عندنا
بس الدب جديــــــــــــــــــــــــــدة هالحركات
ماشاء الله رائع
والظاهر أن فيه بعد مواهب متخبيه مابعد كتبت
واللي ينقد يعرف يكتب;) صح همام؟

الله يقويكم وحلوه فكرة المسابقة

السلام عليكم
فكرة المسابقة جداااااااا رائعة فشكرا لك كورن
وشكرا لك اخي الدب الداشر على ما اتحفتنا به
اما انك تطلب مني ان اكتب فياليتني استطيع فهذا مجالا ليس لس فيه ناقة ولا جمال
ولدي ملاحظة صغيرة
وهي ان كثرة المداخلات والنقاشات ربما تقتل جمال المسابقة
أليس كذلك
اخوكم المختلف

انا بدعت القاف من حــر شوقي ................................
...............................يوم الهواء مثلي على البال مشتاق
يالي زرعت القلب بقصا خفوقي .................................
............................... مدري متى الايام تعطف وتنســـاق

ماحبيت أكمل على البيتين لأنهم يحاكون شخص أنا ماأقدر أحاكيه وصعب المعاني تطلع بغير وصف المشاعر
واستخدمت نفس المعاني والوزن والقافيه في الأبيات اللي كتبته
وكان مكن أكتبه بموضوع مستقل لكني حبيت أدعم أخوي كورن وأحيي حماسه للشعر

قصة ألم بالحنايا تلهب حروقي
وسط الضلوع وصار الحزن خفاق
ضميته بالصدر واحكمت صندوقي
بحبر الأسى والآه كتبت بغير أوراق
واليوم أبعلنها لمن كان لي صدوقي
بعد الوصل صرنا نوجس افراق
حبيت أنا من بالكرم دايم يسوقي
والكل يشهد له بطيب الأخلاق
زينة شباب رفحاء للخير سبوقي
وماكان أبد يقدم من له بالعمر فاق
حب (....) إلى هاليوم يسكن خفوقي
ويمد روحي بالعز مع كل إشراق
في كل ساعه ودقيقه يشتعل شوقي
طالت بي الأيام وما بيننا عناق
....
من بالهوا ياناس يسقي عروقي؟؟؟
بعد القبر ماضم عذب الأشواق

حنونة الماضي صح لسانك
شاعرة وحنا ماندري:eek::eek::eek:

مشكورة




اخوي كورن فليكس


وين هالغيبة؟ لاتقول زعلان ترى والله ازعل معك بس علمني

رد ياملا الغنيمة خلنا نتسابق ترى الشعّار توّهم تناطقو ههههههههه;)

:)

تحية

الله يعطيكم العافيه شباب وصبايا
صحت السنتكم وابدانكم
واشكر اخوي كورن فلكس على الفكرة الرائعة والرائده والمبدعة في عالم الشعر الشعبي

صباح الليل
كورن فليكس

بقا من روح المسابقه
نفس والا taem s up

رد مو تطنش
ترا محتاجين اشتراك

داري جاي ردي متأخر مررررررررررررررررررررررررره بس أعحبتني الفكرة وحبيت أشارك .....
معليش .....
( أكيييد بتجاملوني لأني عضو توي جديد :) صح ؟

يقول :
أنا بدعت القاف من حر شوقي
يوم الهواء مثلي على البال مشتاق
ياللي زرعت القلب بقصى خفوقي
مدري متى الأيام تعطف وتنساق

و أقول :

أنا بدعت القاف من حر شوقي
يوم الهواء مثلي على البال مشتاق
ياللي زرعت القلب بقصا خفوقي
مدري متى الأيام تعطف وتنساق
ياناس لو تدرن وش لون ذوقي
ماهو غزل والله غلب كل الأذواق
همٍ سرى بالدم داخل عروقي
حتى غدا لعيني من النوم سراق
أحداث تجري بين قتلٍ وبوقي
سبة عدوٍ ضد الاسلام بواق
القدس يشكي قال ضاعت حقوقي
ضاع الأمل من بعد تقطيع الأوراق
وبغداد شبت فيه كل الحروقي
تم السنة دمعه على الخد دفاق
كيف المشاعر بالتغزل تروقي ؟
و الوضع للي يطلب العز ماراق
تم الجواب و أطلب الله فوقي
نصرٍ عليه القلب وهن و مشتاق

لكل الإخوة المشاركين الشكر

اللحين فهمنا أنه فيه مسابقه


طيب ،،، وين الأبيات الأخيره

اللحين فهمنا أنه فيه مسابقه


طيب ،،، وين الأبيات الأخيره



ارجو تبيين طريقة المسابقه حتى يتسنى للجميع المشاركه بها بالشكل الصحيح

هلا والله بالجميع


مساكم اله بالخير

يالربع الظاهر المسابقه

انتهت من زمان انا قبلكم

سألت ومالقيت رد ومن زمان بعد

عالعموم اذا كان ودكم بمسابقه خلونا

نكلم المشرف العام يسوي لمنتدى الشعر مسابقه

دمتم بكل خير


برب

السلام عليكم ورحمة الله وبركاته
يعطيك العافيه ياكروز على هاذه المسابقه الجميله
واحب ان اتسالى معاكم بهاذه المسابقه فقد كتبت هاذ الابيات واتمنى ان تنال اعجاب كل من يطلع عليهى
انا بدعت القاف من حر شوقي.......يوم الهواء مثلي على النال مشتاق
يالي زرعت القلب بقصا خفوقي.......مدري متى الايام تعطف وتنساق
ومدري جريح الحب أمتى يفوقي....من صدمت الاشواق لصار ذواق
ذبحتني يترف تكفى رفوقي.......أرفق بحالي ورحم الي بالاعماق
ورحم قليبن صار يخفق خفوقي.....ياترف حبك ذوق من ضمن الاذواق
يترف خذها من حبيبن رفوقي.......أشيل حبك لو ضمير الهوى انعاق
ولو صار هم الكون موجود فوقي.....ولوسجلوني في سجلات ووراق
ضمن مجانين الشوارع وسوقي.....وقول للعالم جريحن ومشتاق

ومدري جريح الحب امتى يفوقي::::من صدمت الاشواق لاصارذواق
ذبحتني يترف تكفى رفوقي::::::أرفق بحالي ورحم الي بالا عماق
ورحم قليب صار يخفق خفوقي:::::ياترف حبك ذوق من ضمن الاذواق
يترف خذها من حبيبن رفوقي::::::أشيل حبك لو ضمير الهوىأنعاق
ولوصار هم الكون موجود فوقي:::::ولو سجلوني في سجلات ووراق
ضمن مجانين الشوارع وسوقي:::::لا قول للعالم جريحن ومشتاق