لاوالله الا راح منا فقيده=ياكبر بلوانا على بُعد ناصر
بسم الله الرحمن الرحيم
انا لله وانا اليه راجعون
لله ما اعطا ولله ما اخذ هكذا الدنيا نزول وارتحال
ولا راد لقضا الله
مافيه شك أن كل انسان لابده يفقد غاليه وينتابه الحزن على فراقه ولاكن هُناك اناس يفقدهم القاصي مع الداني واكبر دليل ماقالته زوجة عبدالله بن جحفل في زوجها ( بعض العرب موتته تخفيف = مار البلا مثل عبدالله)
(مرحوم يامهللي بالضيف = يامكثّر الهيل بالدلّه)
في هذا الاسبوع فقدنا عزيز علينا وهو والد زميلنا في هذا المنتدى الشاعر ابو بادي طيّب االله ثراه
فقد وصلتني هذه الابيات من الشاعر حلو المروّب مرثية بناصر بن شوشان الحصيّن عبر الجوال عن طريق احد الاخوه فأحبيت وضعها هنا للتّرحّم على والد زميلنا وهو يقول حلو
لاوالله الا راح منّا فقيده = ياكبر بلوانا على بُعد ناصر
اكتب عنه يالصحفي بالجريده = وعزّ الربيعيه بعدّة عناصر
الي تميّز بالخصال الحميده = كم واحد عما يسويه قاصر
عز لربعه بالضروف العنيده = يوم البداوه والزمان المعاصر
يبرك لجزلات الحمول الشديده = ياجنبوها مفرّكين الخناصر
جعل الجنان الي طلوحه نضيده = مثواه عند الحور هيف الخواصر
يالدود لاتاكل كفوف زهيده = خلك لطلقين اليماني مناصر
تم الكلام وكل معنا القصيده = اطلب عسى المعبود يغفر لناصر .
اللهم اغفرله وارحمه واجعل مثواه الجنه وللعلم ناصر هو راع القصيده المشهوره التي انتشرت على مستوى الخليج العربي قبل وسائل الاعلام والكثير يضرب بها مثل وهو لايعلم بصاحبها والتي يقول مطلعها
العسكريه عقب منصور تنعاف لو زاد راتبها
وسبق أن وضعت بهذا القسم كامله
تعازينا لزميلنا ابو بادي ولأخيه الاكبر ملفي .
