[align=center]
اتمنى ان ابو شنب ما يزعل من الموضوع ويتقبله بصدر رحب.
قريب لي ابوه كان ضابط بكتيبة الحرس الوطني اللي برفحاء فشل بالدراسة وطلب من ابوه يسجله عندهم بالكتيبة. الابو ما عارض لانه اصلا من الجندية ويحسب ان هالزمن مثل زمنهم ممكن ولده يترقى ويصير ضابط.سجل الولد وما داوم ويستلم راتب وهو بالبيت (محد يقدر يقول له داوم لان ابوه ضابط!!)
وبعد وقت ومن كثر ما يسمع من كلام ابوه واللي يجونه من حريسان عن الدوام تشوق انه يداوم وقال لابوه انه يبي يداوم باكر قال له الابو اوكي.جاء باكر و راح الولد لخوياه ويحضر عن عريف الفصيل (اللي كان له شنب اسوة بشوارب زملاه العرفاء) اللي اعطاه المهام الموكولة له (تصليح شاهي وقهوة ، تنظيف حمامات الله يعزكم ، كنس ،يحشون رغل من داخل الشبك الخ).
الولد كان مرفه ومدلع ومعوب بنفس الوقت. اول مهمة له كانت مشتركة مع ابن عم له تنظيف الحمامات وتصليح شاهي وقهوة لسعادة العريف (ابو شنب). قال لابن عمه ماعرف انظف الحمامات انت عندك خبرة نظفهن وانا ابي اسوي الشاهي والقهوة قال اوكي.
ابن عمه خلص من التنظيف خلال دقايق (خبرة) لكن رفيقنا المعوب ما سوى لا شاهي ولا قهوة. العريف قام يسال عن الشاهي والقهوة قال له ابن عمه تصليحهن على فلان (اللي هو رفيقنا). العريف ما يقوى على رفيقنا وقال لولد عمه رح سو الشاهي والقهوة.
زادت عباطة المعوب وبدا يتضايق منه العريف حتى انه جازاه. الولد شاف الجزاء وهو يركب سيارته ويروح للبيت ويوم جاء ابوه وهو يعلمه . زعل الابو وازبد وارعد ويمكن تفجر وقال ولدي باكر اوريك به علمن بس وين مكانه بالطابور. جاء باكر او ما جاء قولوا جاء وكان الابو هو اللي يدرب الكتيبة بالحصة الصباحية قال الابو : ياللي بالسرية الثانية الحضيرة الاولى يابو شنب اطلع برى الطابور ولف على الميدان تعرف وش اللي ببطنك.[/align]
