خايف عليها من الثرى غطاها والا الحصى حافيه اخاف اذاها
اكرم عليها بالكفن يا مطوع *بالبيت ضل فراشها وغطاها
اكرم عليها بالكفن هذي أمي *و اشهد عليها بما عطت يمناها
هذي الضحى والليل يتحرونه *هذي السماء و نجومها تنعاها
هذي السوالف مثلنا تبكيها *والأرض تنشد عن اثر لخطاها
هذي الكبيره كبر هذي الدنيا *هذي العظيمه جل من سواها
ابكي عليها مو نهار و ليله *و لا سنه تمشي واعد قضاها
ابكي عليها كثر ما شالتني *و كثر الحنين اللي اختلط بغناها
وكثرالأسامي و كثر من سموها و كثر النجوم و كثر من يرعاها
ابكي عليها من القهر يا دنيا *من لي أنا من لي عقب فرقاها
من فتحت عيني و لا خلتني *شوفوا ولدها بالقبر خلاها
هل التراب بوجهها ما قصر *شفتوا ولدها كيف هو جازاها
لوها مكاني كان ما سوتها *لكن اعز عيالها سواها
يا الدود شفها ذابله جنّبها *انا ولدها و حاضر وافداها
قطعني هاك اللي تبي من جسمي *بس الكريمة لا تجي بحذاها
و وصيك أمانه قل لها تعذرني و تكفى تروح تحب لي ما طاها
ابيها تغفر لي مثل ما كانت *كل خمله مني بطيبها ترفاها
يالله عساها بالنعيم الخالد *و عساها في جنة عدن سكناها
يا فضو هذا الكون يا هو خالي *يا ضيق هذي الدنيا يا مقساها
يا مر طعم فراقها يا مره *ماني مصدق ارجع ومالقاها
وشلون اجي غرفتها وما هي فيها وش عذري لسبحتها ومصلاها
شقول انا لدولابها وشنطتها *واذا سألني مشطها وحناها
وعباتها ومي زمزم ومصحفها *والمبخره ورشوشها ودواها
الكل في غرفتها متفقدها *حتى الجدار مفطّر و يرجاها
الكل يبكيها مهو ناسيها *يالله صبرني و شلون انساها
ياليتها ماراحت و خلتني او وسعت لي بالقبر وياها
*
القصيدة للشاعر / الحميدي الشمري
..
.
http://www.youtube.com/watch?v=4Mx4G...yer_embedded#!
