العنوان : باركوا لي انقبلت بجامعة الملك سعود !!!

[متمدد ورى الشمس]

تمت اضافة هذا الموضوع دون تغيير تلبية لرغبة اخوكم "متمدد ورى الشمس "
المشرف العام

كاي شاب طموح في هذا البلد المعطاء شديت حيلي بالثانوي وكنت اتمنى ادخل كلية الهندسة ... مو عشان شي بس لاني جيد بالرياضيات والفيزياء .. وفعلا جبت نسبة تؤهلني ادخل حبيبتي السابقة الهندسة ... ويوم جاء موعد التقديم قررت الرحيل لعالم المجهول

غيرت زيت الهايلكس وعبيتها بنزين و اخذت معي ملف فيه صوري من اول ابتدائي الى ثالت ثانوي واوراق كثيرة وصور وتابعية ابوي وتابعية امي ( لا تعلمون الاحوال ان امي عندها تابعية ) وادق سلف وعلى الرياض ... وبعد كم ساعة وصلت الرياض .. يا كبر الرياض ويا زينه .. وتعرفت على البخاري عن كثب ... المهم يوم جاء الصبح واجيهم وبعد انتظار كم ساعة جاني الدور واعطيهم ملفي وبعد ثواني قال لي وين شهادة حسن السيرة والسلوك؟ قلت نسيتها وبعدين مكتوب عندك درجاتها وتغني ( كنت على نياتي ) ومن زود التفاؤل قلت اقبل ملفي واجيب لك شهادة حسن السيرة والسلوك قال هذا النظام انت ما تفهم ؟ قلت لنفسي يا ولد لا تخرب على نفسك ... كلها كم مية كيلو وتجيب له هالورقة المهمة .. وارجع لهايلكسي وادق سلف واجيب لهم شهادة حسن السيرة والسلوك المهمة بعد ما طقيت مشاوير ما لها داعي الله يسامحهم

سؤال : ليش ما يعطى الموظف الثقة بنفسه عشان يتصرف مثل هالامور ؟؟ وش فيها لو قبل ملفي وكسب بي معروف؟؟

ما اطول عليكم انقبلت بالهندسة واستانست ... يعني خلاص انتهت مشاكلي مع الجامعة وحددوا لنا موعد خاص بالمستجدين

جيت وبعد ما نادوا اسمي خذوا السند وعطوني ورقة القبول ( نسيت اسمها ) وقالوا رح عب نموذج تسجيل المواد ... واحد من السنة اللي قبل لي قال لي سجل فيزياء عند حافظ حميدة ورفيقكم حافظ هالاسم يوم جيتهم قالوا اكتب 105 ريض و103 فيز و101 كيم ومحد سالني من تبي تدرس عنده ... طبعا ما فهمت وش قصده وما كان معطيني وجه يمكن لاني بدوي ... مدري المهم مطنش ... ويوم شفتهم هاللون قلت ما يبي له حياء و اسبب لهم صجة حتى مشوني وقالوا رح للكمبيوتر ... والله المشكلة وين الكمبيوتر؟ المهم دليت الكمبيوتر واخذ النموذج وقال تجي بعد الظهر

جيتهم بعد الظهر.. ويوم جاء دوري جلست على كرسي دوار مرتفع مرة ماعرف وشلون انزله ... جلس يطقطق بالكمبيوتر... وبعد شوي قال معليش يالشيخ ( ما حنا متعودين على يالشيخ ) انبسطت وتمددت على الكرسي الدوار ... قال معليش يالشيخ ما طلع لك الا 9 ساعات صراحة ما فهمت قصده وقلت احسن حل مارد عليه حتى يقول لي قم .. كلم خويه اللي شغال على الجهاز الثاني كم رقم الشعبة اللي فاضية عندك ؟ قال له رقمها 1234 ومن شين حظي طلعت ما تعارض معي... قال لي رفيقي مبروك حظك زين سجلت لك 13 ساعة طلع مسجل لي 103 فيز ومارست معه سياسة الصمت

اخر شي قال لي خذ جدولك ومبروك 13 ساعة ... قلت الله يبارك فيك مع اني مدري وش السالفة

يوم شفت الجدول والقى فيه رموز وارقام وابدا باللجلجة والاسالة وش معنى هذي ؟؟ ووش .معنى هذي ؟؟؟ ووشي هذي ؟؟ّ!!

كنا نضيع اول اسبوعين من الدراسة بالحذف والاضافة لكن الحين حظهم زين بالنظام الجديد يجون جدولهم جاهز

سؤال : ليش ما يؤخذ راي الطلاب والمتضررين بحل مشاكلهم ؟؟

وسلامتكم

اخوكم / متمدد ورى الشمس

[سعووود]

معقوله اللي قروا هالموضوع
اكثر من200 واحد ولا واحد كتب رد...

مع اني مافهمت نص الكلاااااااااااااااااااام!!!!
بس مبروك 13 ساعه يامتمدد ورى الشمس

[همّام]

سؤال جيد
ليش ما يؤخذ رأي المتضررين في حل مشاكلهم ؟

طبعا الاسباب كثيره قد يكون النظام صريح فلا يستطيع الموظف مساعدتك بسبب تقصيرك انت وليس تقصير الموظف .
ومنها ان بعض الطلاب ليس لديه الادراك الكافي لحجم المشكله وابعادها
أو لا يعترف مثلا بوجود المشكله . ولو اجتمعت عليه الجامعه بأكملها وحضر رئيس القسم والعميد والموظفون .
وساقوا اليه الآيات والأحاديث والعادات والتقاليد
واستشهدوا بأشعار العرب وحكاياتهم .

فمثل هذا لايجد مشكله فكيف سيجد حل لشئ هو أصلا غير موجود في تصوره .
وبالنسبه لنقص الشهاده أنت استخدمت أصعب الطرق وأكثرها كلفة ومشقه .
فهناك بريد ممتاز ونقل جماعي . وممكن أي واحد مسافر بالطائره يعرفه أي قريب لك يأخذها وتستقبله أنت في مطار الرياض أو عبر الجوال تعرف مكانه في الرياض وتقابله .
الله يسامحني واياك هذي مشكلتك الخاصه حليتها بهذه الطريقه كيف لو أخذوا رأيك في المشاكل الأخرى ؟؟؟؟؟؟؟؟؟

[سراب]

السلام

مبروك يامتمدد ورى الشمس وعقبال ما تمدد بالبهو الرئيسي على فكرة ترى في مكان خاص بشباب رفحاء بالبهو عند النافورة .........

الله يعينك على سنوات الدراسة والغربة لكن تذكر ان الميات من شباب رفحاء جربوا قبلك البهذلة واكيد انت ما انت اردى منهم ...........

الله يوفقك في مشوارك الجديد وعقبال الدكتوراة يا بش مهندس.......

اخوك سراب