من وين تختار زوجتك؟؟

[المرجوجه]

نصائح قيمة لمن يريد أن يتزوج سعودية فقط فقط ‍‍

من أي وين تختار زوجتك ؟ (( سياره هي..؟؟؟ ))


((منقول.. مع تعليقاتي..
والله محد جايبنا ورا غير التعليق.. أدري.. أدري.. ))




يقولون الأولين :



إذا بغيت وحده تمسك فلوسك ولا فلس يفتر . خذ : قصيمية
(( صحححححح ))


إذا بغيت تحس بمعنى الزوجة حتى لو يجيك مليون بزر . خذ : زبيراوية


إذا بغيت وحدة ما تدري من الرجال في البيت . خذ : حجازية
(( ههههههههه .. هذا حظه رايح فيها اللي ياخذ حجازيه .. والا اللي تاخذ حجااااازي.. ))


إذا بغيت الإتيكيت اللي ماهوب يم سنع . خذ : من الشرقية
(( هاه... لا .. ايتيكيت .. وعلى سنع .. ))


إذا بغيت وحده ما تدري وين ربي حاطها فيه . خذ : حايلية
(( احم.. أنا أشهد... ))


إذا بغيت وحده ، وينك فيه ؟ ووين بتروح . خذ : من الرياض
(( عاد معليه.. الأسئله هذي عند الكل.. ولا زم تنسأل.. أصلا لازم يقول قبل يطلع .. حاله حالنا.. ايه.. وبعدين ما فيها شي لين قال وين بيذلف..!! .. بيذلف = بينقلع = بيروح = سوف يذهب ))


إذا بغيت الرفله اللي توطي أي حاجه في البيت . خذ : سديراوية
(( رفله يعني ايش؟؟؟؟؟؟ ))


إذا بغيت ، ودني للسوق !! ودني لهلي . خذ من الخرج
(( ما أعرف منهم أحد .. لا تعليق.. ))


إذا بغيت سعة الصدر والوناسه . خذ : من الدرعية
(( انظر أعلاه ))


إذا بغيت ، ياربيه ودني للمستشفى مدري وشفيني . خذ : من شقراء
(( يتبع سابقه .. ما أعرفهم ))


إذا بغيت ، وش عندكم ؟ وش فيكم ؟ . خذ : حريملاويه
(( هاه.. وين هي فيه هذي؟؟؟ ))


إذا بغيت الملح والقبله والمراصيع والقهوة . خذ : حوطيه
(( معاها شوية نكت حواطه.. ))



وأخيرااااااااااااً :



إذا بغيت الملعنة والنكد . خذ أي وحده من اللي فوق !!!!!!



وبسسسسسسسسسسس...


هاه .. مين بتاخذون؟؟؟؟؟

شوفوا .. مافيهم وحده انمدحت.. اتكلوا على الله وخذوا وحده وانتوا وحظكم.. أقصد والبنات وحظهم..

[هرطمان]

المرجوجة انتي اعظم سبب في العنوسة
مرة تحطين على الرجال والبنات يكرهونهم .
ومره تحطين على البنات وتخوفين الشباب منهم .

وانا اقول الي يبي اولاده شجعان وكرماء ونجباء وشعراء وفصحاء واثرياء واقوياء وادهياء ويكون العزيز في قومه المطاع في عشيرته (الذليل في بيته) ياخذ وحده هرطمانية .
يطلعون عياله على خوالهم وهو طبعا ما يقول (برم) الا اذا ابوه هرطماني .

[د. كريزي]

ههههههههههههههههههههههههههههههههههههههههه

حلوة ...

حسب قاموس اكسفورد يقول ان الرفله هي التي لا تستطيع ان تسوي شي على سنع ويدخل في هذا اذا صبت الشاهي ملت الزوليه
وفيها نفاضة وهي ماسكة الدله ... وغيرها من الامور مثلا اذا جت ترقا تركب منظر على الجدار طاحت من على السلم ...

ا

[المرجوجه]

هلا فيك اخوي هرطمان..
والله يا اخوي انا مع وضد..
حسب الظروف.....
بس لين جينا للجد .. انا مع البنات وضد الاولاد ...
وعلى طاري العنوسه .. انا بفتح دار للعوانس... لو تعرف احد جيبه.. ..

يعطيك العافيه ..

اخوي د. كريزي .. يعطيك العافيه على الترجمه.. الحين فهمتها..


تحياتي لكم..

[دمعة]

الأخت المرجوجه

لكل شخص وجهة نظره ... والاولاد حالنا حالهم .... يعني فيهم وفيهم

والموفق من وفقه الله

ومعنى رفله يعني الكسوله اللي ماتسوي شي " مثلي "

والهرطمانيات لا تاخذون منهم ، مايخرب العروس والزواجات واكثر حالات الطلاق بالمحاكم من الهرطمانيات
شوفو صورة واحد منهم وتعرف الباقي

[المرجوجه]

هلا اختي دمعه ..

صدقتي والله .. الاولاد فيهم .. ألعن منا..

بس احنا اللي علينا العين .. ..

يعطيك العافيه اختي...

[المزيونه]

خوذوا من الرياض ولا تترددون
والعيب الي فيها موجود في كل البنات