خيبت ظني في جميـع الهقـاوي
وماعادلي شـفٍ بنظـم القصيـده
كرهتني فـي لابسـات الغطـاوي
يارمز حبـي والصفـات الفريـده
صوتك بحسنة والتميـز رهـاوي
يطرب لي الأسماع مثل النشيـده
ماعاد تطربنـي جميـع الغنـاوي
وحتى الوتر واللي بعزفٍ يجيـده
إن جيت غاوي وان تنحيت غاوي
يا تاج رأس الشعر يا سيد سيـده
لوهـي تحقـق بالتمنـي منـاوي
لاما أتمنـى غيـر قلـب العنيـده
حيث الغلا بالقلب أمـرٍ سمـاوي
فرصتك تسمع من قصيدي جديـده
برّك إركابك في خفـوق النـداوي
واحطب ضلوع القلب وأشعل وقيده
قرب لها رسلان فكـر الهـواوي
وأقدع من خلاص المحبه وريـده
لو ترجع البدوان حرب وغـزاوي
من سبّتك ما ظل منهـم شريـده
سو الـذي تبغـا بليـا رجـاوي
حبك ملك وعروق قلبـي عبيـده
حتى العمى يوصف جمال المهاوي
وأبكم تغنى بطول شعـره وجيـده
كم من أصمٍ صار لإرضـاه راوي
وإن شافه المشلول يمشي بسيـده
ادري بأنه طـب سقُـم ويـداوي
إلا أنـا يسقينـي السـم بـيـده
الزين بلوى بـس هـذا بـلاوي
محدٍ قـدر يحكـم وثاقـه وقيـده