بيالة شاهي !!

[أشـــوفك حلـــم]

~ المشهد الأول ~

.

.

رئيس دولة + رئيس دولة

الأول : وش أخبار دولتك ..؟

الثاني: الأمور فيها تمام بس مشكلة هالحدود مأرقتني شوي وما تخليني أنام !

الأول: أنتم لسه ماحليتوها ..؟!

الثاني: يا خوي أنا احصلها من الحدود أو الشعب أو .. أو ..

أقول :

صب شاهي بس !!

~ المشهد الثاني ~

.

.

وزير + وزير

الأول: وش أخبار وزارتك ..؟!

الثاني: الأمور فيها تمام بس العجز المالي شوي مأرقني وما يخليني أنام !

الأول: للحين ماعرفتوا الخلل ..؟!

الثاني: أنا احصلها من العجز أو الإختلاسات أو .. أو ..

أقول :

صب شاهي بس !!

~ المشهد الثالث ~

.

.

مدير + مدير

الأول: وش اخبار إدارتك ..؟!

الثاني: الأمور فيها تمام بس تسيّب الموظفين شوي مأرقني وما يخليني أنام

الأول: للحين ما عالجت الوضع ..؟!!

الثاني: أنا أحصلها من الموظفين أو رؤساء الأقسام أو .. أو

أقول :

صب شاهي بس !!

[أشـــوفك حلـــم]

~ المشهد الرابع ~
.
.

/موظف + موظف
الأول: وش أخبار شغلك ..؟
الثاني: الأمور فيه تمام بس موضوع الإجازة شوي مأرقني وما يخليني أنام
الأول: للحين ما وافقوا لك عليها
الثاني: أنا احصلها من الأدارة أو المراجعين أو .. أو

أقول :

صب شاهي بس !!

~ المشهد الخامس ~
.
.

مواطن + مواطن
الأول: وش أخبارك اليوم ..؟
الثاني: الأمور تمام بس مشكلة الشغالة شوي مأرقني وما يخليني أنام
الأول: للحين ماجتك التأشيره ..؟
الثاني: أنا أحصلها من من مكتب العمل أو الإستقدام أو .. أو

أقول :

صب شاهي بس !!

~ المشهد السادس ~
.
.

زوجة + زوجة
الأولى: وش أخبار عيالك ..؟
الثانيه: الأمور تمام بس هالولد اللي ما توظف شوي مأرقني وما خلاني أنام
الأولى: للحين ما حصل وظيفه؟؟
الثانيه: انا احصلها من وظيفة الولد أو خطبة البنت أو .. أو

أقول :

صبي شاهي بس !!

~ المشهد السابع ~

.
.

عامل + عامل

الأول: كيف كفيل مال أنتا ..؟
الثاني: كويس بس هذا مشكل راتب يسوي تفكير ومافي نوم
الأول: ليش هو ما يعطي راتب ..؟
الثاني: انا مشكل كفيل أو مشكل بيت مال أنا أو .. أو

صديق :

جيب شآهي !!

~ المشهد قبل الأخير ~

.
.

غريب الوطن + ( .. )
( .. ) : هــا بشرني كيف النوم معك ..؟!
غريب الوطن: والله النوم زفت ولله الحمد ! كل يوم احس فيني النوم أقوم أنام بس ما أنام !
( .. ) : لا تفكر كثير أنت تحب

غريب الوطن : أنا أحصلها منك أو من الطلبات أو من الدوام اللي باقي له اسبوع أو .. أو

أقول :

صب شاهي بس !!

~ المشهد الأخير ~

.
.

كل الناس بكل فئاتها ومكاناتها الأجتماعية تعاني من هموم تؤرقها وكل واحد همومه
على حجمه وكلن ( يصب شاهي على قد البيالة او كاسه اللي بيده ) !!

وإلا تعالوا عندي اصب لكم شااااهي

[احمد الجري]

على قولت اخوي كل عنده همه الي على قده وقد مسؤلياته
بس تدري شلون ............... صب شاهي

[عروووبة]

عروبة + عروبة
هاه وش اخبار العروووبة

اقول هاتى ابريق شاي
وامرحي ...!!!!


اعجبتنى كاسات الشاي
والله يعين كل مسلم على همه
لكن والله وبالله وتالله
لو كل إنسان اتعض من هموم الناس لهان عليه همه
فما يوجد هم الا وجد من اهو اكبر منه

والحمد لله على كل حال

[ابومحمدالزوبعي]

بارك الله فيك أخي اشوفك حلم على هذالموضوع
أعجبني المشهد السابع

أقول صب شاي

[سعود الشمري]

هذا حال الامة الاسلامية والعربيه

شاي وقهوة ولافكروا بشي ضايعين فيها


كان الله في حالنا ورحمنا الله



مبدعنا القدير كل الشكر والتحايا لشخصك الكريم على ابداعك

[رفحاوي]

الجنرال + رفحاوي

رفحاوي : وينك يالجنرال ؟!
الجنرال : موجود ...
رفحاوي : موجود وين وحنا ما نشوفك ؟!
الجنرال : انا القاه منك والا من وزارة العمل والا ... والا ؟!
أقول :
صب شاهي ...
رفحاوي : سيّر علي وأبشر بالخير ...

مشكور أخوي الجنرال على بيالات الشاهي ...

[أشـــوفك حلـــم]

على قولت اخوي كل عنده همه الي على قده وقد مسؤلياته
بس تدري شلون ............... صب شاهي

صدقت اخوي احمد كل عنده همه ويشوف همه هو الاكبر

كل الشكر لك اطيب تحية

[أشـــوفك حلـــم]

عروبة + عروبة
هاه وش اخبار العروووبة

اقول هاتى ابريق شاي
وامرحي ...!!!!

اعجبتنى كاسات الشاي
والله يعين كل مسلم على همه
لكن والله وبالله وتالله
لو كل إنسان اتعض من هموم الناس لهان عليه همه
فما يوجد هم الا وجد من اهو اكبر منه

والحمد لله على كل حال

ربي يسلمك اختي الكريمة

ويجزاك الرحمن الجنان

عروبة نورتي المتصفح

اطيب الاماني لك

[أشـــوفك حلـــم]

هذا حال الامة الاسلامية والعربيه

شاي وقهوة ولافكروا بشي ضايعين فيها


كان الله في حالنا ورحمنا الله



مبدعنا القدير كل الشكر والتحايا لشخصك الكريم على ابداعك

اخوي سعود

الله يعدل الحال ان شاء الله قادر على كل شيء

وللامانه الموضوع ليس لي لكن مما تصفحت بس نسيت اكتب تحت الموضوع

اخوي سعود

نورت المتصفح ياالغالي

[أشـــوفك حلـــم]

الجنرال + رفحاوي

رفحاوي : وينك يالجنرال ؟!
الجنرال : موجود ...
رفحاوي : موجود وين وحنا ما نشوفك ؟!
الجنرال : انا القاه منك والا من وزارة العمل والا ... والا ؟!
أقول :
صب شاهي ...
رفحاوي : سيّر علي وأبشر بالخير ...

مشكور أخوي الجنرال على بيالات الشاهي ...

هلا بالغالي رفحاوي

موجود وانا اخوك

بس اكثر الاوقات اكتفي بالتصفح و القراءة
و

مشاغل هالدنيا الله يكفينا شرها


ما نستغني عنكم لا خلا و لاعدم

اطيب الاماني لروحك الطاهره