قصة زواج واحد عام 1379هـ فكاهية ابي رأيكم ؟؟؟؟؟؟؟

[فهد محمد]

قصه زواج واحد عام1379هـ فكاهيه اعطوني ارائكم

--------------------------------------------------------------------------------

ياجماعة بس من وين ابداء.........
كان عمي جالسن(جالس) مع ابوي وانا جالسن اقهويهم فوق ذيك السهلة ( الرمل ) بالحايط ( المزرعة ) وماغير يدردبون من هالقهوة .. وتعبت وانا اصبلهم بس مااقدر اقولهم شي .......... وهم يسولفون – يعني طق حنك- بالنخل واللقاح والبقر وكانت بقرتنا معشّر (حامل )والبقرة الثانية الحمراء والدة وجايبة عجلة ماهنا حليلها وزين خشيشتها
وقال عمي لأبوي انا البقرة اللي عندي معطي (تبي الثور) وعلى طاري الثور وراه ماتزوج هالكبون –وهو يّشر علي –( خوش مناسبة)
قال الوالد : توه بزر يارجال مايعرف شي
قال العم :ذابزر الله يهديك هذا طعرن كبر الحمار ولاهب ضاره العرس زوجه بس وخله يعقل ويمسك الأرض وانا اخوك
وانا جالس اطالع فيهم ومنبهر مدري وش القصة وادخل في جو, وابداء اهوجس وافكر ...ومن شدة التفكير انسد حت علي جنبي وتوسد ت يدي ,,,ولا صحيت الا بالزبيرية- حقت الوالد- تصكني مع خشتي وهو يقول قم قامة وجعن يوجعك انت ماتستحي على وجهك تنسدح قدام الرجال
ونا افز واقول سم طال عمرك وقلبي يغلي واضرس من الحمق...
المهم قال ابوي اجل رايك سذا اجل ابدور بنت الحلال للولد_ ولا اخذوا رايي ولا جابو اخبري _
وانا ضاق صدري وجلست افكر وشلون ابدخل على المرة(المرأة) وانا مااعرفلها ولاادري وش يقالبها
وجاء الليل ورقيت للسطح علشان انام ...وانسدحت بفراشي (والله من زين الريحة) وانام ولا صحيت الا باللي يشوتن مع رجلي ويقول قم صل ...واقوم اصلي وارجع انام على غير عادتي ولا اصحي الا بحرارة الشمس والذبان تدودي على خشتي
قمت ورحت اتقهوي مع امي بالعريش (الصالون) وقالت ابوك يبي يزوجك بنت ابو سعد
قلتلها يمه انا مااعرف العرس ولا اعرف للمرة وبعدين ابو سعد ذا وجهه يحوم السبد تقل مطينة يبي من يواسيه وجسمه متنفخ مع كل مكان تقل سبالة .
قالت طيب وش السوات ياوليدي ابوك ملزّم وهالحين يجهز الروشن (غرفة النوم الرومنسية ) لك
قلت : هذا كله من عمي هالملقوف حسبي الله عليه هو وبقرته اللي فطنته (ذكّرته) للعرس
دخل علينا ابوي وقال : هيش ردت عليه الوالدة : سم
وقال تراى زواج هالكديش بعد يومين !!تقل مالي اسم قلت يبه انا ماودي اعرس
قال : اقطع وخس وحنا مشاورينك (ياروحي على الديمقراطية)
___
اه لوتدرون وش حصل بزواجي ووشلون شكل البنيه
lمالكم بطوله السالفة
المهم خطبلي ابوي وحدة ما اعرفها(اكيد ماتعرفها ياهاللبناني) وحددوا موعد العرس يوم الأثبين الموافق 1/7/..........(ماودنا بالفضايح)
وحصل حالة استنفار بالعائلة الكريمة حيث قام الأهل يستعيرون من الجيران والقرايب والمعارف (بس مهب الوزارة) زوالي (سجاد) وقدور وتباسي وبيلات وفناجيل واباريق ودلال ومباخر ويكتبون تحت كل وحدة اسم اصحابها
ويوم جاء الأثنين وصار مسيان, رشوّ الأهل العريش (الصالون)و البرحة اللي قبال البيت وفرشوا الزوالي وشبو النار وحطوا البخور والأباريق الكبيرة والدلال وشبّو على العشاء (ذبايح) طبعا بالبيت مافيه طباخ زي هالوقت
وانا رقيت فوق للطاية(السطح) ورحت للصهريج (الحمام ) اللي مجهز جنب الروشن (غرفة النوم) اللي يهبل ارضيته اسمنت وجدرانه طين وعلى الجدار مراية ملصقة بجص... بس مانقصه الا البانيو وبدل الدش حاطين طشت بوسطه طاسة للغرف
المهم دخلت اسبح ومعي خيشة بصل حمراء (فاضية طبعا) وادخّل فيها صابونة ام عنز واكرف جسمي اللي ماله خبر بالسباحة , واسرح شوشتي بشنبو احمر اصلي .يوم خلصت واطق ذيك الفنيلة العلاقي(اجحدها يافنيلة علاقي)ام بقرة وسروال السنة ابو حبل والبس ذاك الثوب الأصفر الملكي المكفوز مع اكمامه ومخبون من تحت ثلاث خبنات علشان اذا كبرت افكهن( سياسة اقتصادية )
واطق ذاك الشماغ الجديد (حق العيد) شماغ العقل ابو ربثه اللي واقف من النشاء حق الشمغ الجدد اذا التفت مايتحرك بحيث ان راسي يتحرك وهولا؟؟يعني اذابغيت التفت انحرجت!!!!!!
المهم جو الماعزيم وانا خايف مادري وش القصة ومدري وش يصير عليّ
وش اللي يبي يواجهني
وقاموا النشامى ( شروى من يقراء ) عيال عمي )الملقوف) وعيال الخال يصبون القهوة والشاهي للرجاجيل ويسوّون حركات من وراي مهب حلوة!!!!!!!!!! والوالد متحمس ماغير يومي بخشته ويشّر بعيونه اذا فيه احد ماصبوله او قهوه وكل شوي مطلع من مخباته كسرة عود ( بخور ) ويحطها على الجمر ويجلس ينفخ فيها......!!!
يوم قّلّطو العشاء قام الوالد وقال اقلطو الله مير يحييكم ويبارس بالساعة اللي جمعتكم!! والنشامى عيال العم ماقلطوا مغير ماسكين غراش(طياس)الماء واللبن وبعضهو ماسكين المناشف(الفوط) عند البزابيز
يوم تعشوا قامو يغسلون من البزابيز اللي حنا (انحن) شاكينها بالبراحة حوالي اثنعشر بزبوز على جهتين وشابكين بأطرفهن ليّ اخضر مقلم باسود(مخطط باسود) مادينه من البرسة (المسبح )
وغسلو الجماعة وكل واحد قطعله منقاش من خوص النخل وهو ماشي وبداء يتاغر ويتنقش وقال : انعم الله عليك يابو اليد..ثم مسك الجادة (يعني ذلف)
وجاء خالي ابو المدام ومسك يدي ودخلني على البنية ...والقى عندها مره (امرأة) جالسه يسمونها جماعتنا ربعيه ( بكسر الراء و بتشديد الياء ) اذا دخلت على العريسة تعطي انت هالربعية المقسوم من الدراهم علشان تذلف عنك........المهم دخلت على المدام .يوم شفتها تفاجئت , مادري هي زينة اولا ؟؟؟؟؟؟؟؟لأني ماعرف للحريم!!!!!!!!! (بس الوكاد انها شينة) ولفت نظري فيها انها دبية ومتنفخه مع كل مكان صايره تقل سبالة ( تقول اكلودا الشمالي ) وعليها فستا ن ضيق مادري وش لونه (ذوق أي كلام) وجلست اناظرها وافكر!وشلون زارٍة الزرار حق هالفستان !!!!لكن اتوقع ان اهلها سادحينها على الأرض و واطين على بطنها لين زروه(صكوا الزرار)
واناظر المكياج والقاها محنية يديها , والأصابع عليها ذاك الدايج (مثل المناكير بس انه اسود ويربص بفنجال ويغط فيه الأصبع )و الرجل مخضبة !!!والتسريحة آآآآآهـ هـ هـ بس جديلتين بينهن شقوة ،والخشة ملطوطة بديرمان !!!يعني ماتقول الا نوال الزغبي أو احسن شويّ على بالها ذوبتني والله يذكرك يابو برغش بالخير يوم سالفة امهات الركب السود....وطاقة ذيك النعال الخضر البلا ستيك وذاك الرش رش اللي يوم شفته انقهرت لأنه بفلوسي وعليها صاير يحوم السبد
لليلة الدخلة وعجائبها ...
وش قلتو اكمله بس ابكملها ؟؟؟؟؟؟؟؟؟؟؟؟؟؟؟

المهم دخلت على البنية واثرها جالسة على طرف ... وكان عنده وحدة يسمونها جماعتنا ربعية ( بتشديد الياء ) مهمتها تجلس عند العروسة واذا دخل العريس _ اللي هو انا _ يعطيها مبلغ وبعدين تذلف غير مأسوف عليها _ وش ذا الثقافة هالكلمة مايجيبها ولا استاذ جامعة _ المهم دخلت وعطيت هالعجوز المرتزه عندها المقسوم وذلفت وانا افرك بيديني مبسوط (يحق لي عريس ) وانا اقرب للبنية على استحياء واتنيوط سجادة الصلاة من فوق الرف واصلى ركعتين واذا ركعت اويز ( اويق) عليها من تحت ابطي مطفوق اول مره يعرس... واقوم وقرب لمها وتصها مع جبهتها ومامداني ادعى الوارد الا وهي تصك يدي بغت تكسرها وانا اصرخ ذيك الصرخة .. بسم الله وش السالفة وش فيه وهي ماترد على من الحياء . بس الحقيقة اناظر الجسم من وراء العبات واقول في نفسي انت متاكد ان هذي بنية لا تصير بس هذي الربعية والبنية هى اللي طلعت المهم حاولت افتش وجهها وبعد عراك دام عدة ساعات قدرت افتح وجهها واول مافتحتة وانا انقز تقل مقروص واسمي بالله وجهها تقل وجه شيطان وهي تعطين ذاك الابتسامة يوم قطر سعبولها الله يخلف ماهنا سنون توقي ( بتشديد القاف ) سنونها صايرة تقل جواد بقر وانا ارد عليها بابتسامة على الجنب زي حقت الأفلام . وجاني عقر البقر وماقدرت اهج ( اهرب ) وبيني وبينكم انا خفت منها بس شسوي مضطر اجلس لاني لو هجيت بيمصعني ابوي مع اذني ويرجعني يمها.
وجلست انا ضرها وافكر وقول في نفسي وشلو ن تبي تنام جنب هالسعلوة والله انك ميتن قلبك ... المهم رضخت للامر الوقع وقمت وفسخت بشتي وعلقته على مسمار مطقوق على الباب مع ورا.
اخاف يجيه شي بعدين نبلش مع مطوع المسجد لاني مستعيره منه وهو نايم عندنا ذيك الليلة علشان يطمئن على بشته
وافسخ (.... لا يمكن الوصول الى هذه الصفحة...)
المهم جت حّزت النوم وهي بدت تنود ( تنعس ) ويطرخ راسها من النوم
ودخلت اصبعها في اذنها وتحركه بسرعة وتثاوب وتطلع اصوات من حلقها ... يو قضت دخلت اصبعها في خشمها وتفركه ومابقى الا شوي ويطلع مخها...... ( امر عادي )
قمنا ننام ونجطلت هي فوق المنام بعد ان قامت بـ( لا يمكن الوصول الى هذه الصفحة .......
اذا ودكم بصراحه اكثر علموني وانا افك الشفره..) وسحبت الشرشف تبي تتغطي مادريت الا والشرشف ينشق من شطوب رجلينها وتحتحت هالشطوب على الفراش شحنة تراب وانا ابلعها واسكت واقول في نفسي وش هالنعومه الزايده ياكلودا........ خلها على الله
وانا اجي واندس معها وانا خايف بس الحقيقة قلت في نفسي لازم تموت قلبك يمكن البنات كلهن كذا (معذور ماكد شاف بنت ) واتصّبر حتى طلع الفجر واقوم اصلى طبعا بدون سباحه
واقابل ابوي وقالي وش الاخبار
رديت الاخبار دمار يايبه .
الوالد _ افا ياذالعلم وش به
_ قلت يبه البنت توحش ( تخوف ) ولاهيب زينه
الوالد_ البنت تككككككككككككك ( عادي الوالد يطنز بكلامي ) هذي بنت اجاويد وابوها يذر على الجرح ويبراء .. قم بس لمرك وخلك رجل لاوالله ادودسك ( عادي ديمقراطية) وش بها البنية قلي
وانااقول له يبه كل شي فيها
الوالد _ هأهأبس( كلمة انكار ماهي ضحكة ) وش بها
اول شي يبه البنت سوداء سنها ام جيراننا مزنه
الوالد _ ياوليد البياض وانا بوك مانفع الحمار اهم شي انها بنت رجاجيل وابوها وجه رجال وبيض الوجه وبعدين البنية سنعة وانا ابوك تعرف تطزز وترق وتصبب وتقرص وتجرش وتسوي قشدة وماهنا شي ماتعرفه
( استغل الفرصة شاف ابوه لين ) بس يبه انا ابعرس على ابوها والا عليها وبعدين كلن يعرف يرق ويطزز وبعدين حنا مانوينا نسوي مشروع تسمين وهي بعد ماتعرف تسوي كباب وكفته وحمص ومتبل..
زي الناس ( ايه يالشامي)
اقول يبه وراه مانروح انا وياك يم ديار هالبنات الحمر ونطق على وحده ونجي....... ولا دريت الا بالعرجد مع ظهري واثرها الولده وجع وش هالهرج ياولدالشر ...... والوالد بدت تتقاطر سعابيله .. قلت امزح يمه _ الوالده اشوى ..
الوالد _ (ماقدر يرد ) اقول قم بس ود البقرة لثور ابو سعد وعظ على شحمة لاوالله ادودسك هالحين بعد بعد صارلك راي ياهالكابون
وبعد ماتجي طف مكينة الماء واعدل الساقي على حوض الكراث علشان امك ...
وانا اصرخ باعلى صوتي لا لا لا لا مابيها ويصكن ذاك الكف يوم رشق سعبولى بالجدار ( انتو خابرين لاثم دايم مفتوح والسنون طالعة 10سانتي)

قم قامة واناافز و اقول سم طال عمرك
رحت وديت البقرة لثور ابو سعد واقرعها( عادي يمكن الوصول الي هذه الصفحة ... تراهن حيوانات ) وجبتها ( علما اني عرّيس) ورجعت بعد مادخلت البيت مالقيت المره وادورها قلت اغاديها ( لعلها) هجت ( هربت ) مالقيتها بالبيت واطلــع والقاها بوســــط حــــوض التزت ( البرسيم ) جالستن تحصد ( امحك عريسه )
ومرت الايام والسنين وكل مادخلت على هالمرة حامت سبدي
بس انا مستغرب وشلون جاني عيال وانا مالي خلقها

لله في ذالك حكمة ويارب لك الحمد
آسف على الإطالة




ملطوششششششششششششششششششششششششششششش

[أنشودة المطر]

[align=center]هههههههههههههههههههههههههه قصه مضحكه مع اني مافهمت اكثر الكلمات
بس اللي من جد تنحت عندها ( جديلتين بينهن شقوة ،والخشة ملطوطة بديرمان !!!) ياليت اللقى لها تفسير
ومشكور أخوي على القصه [/align]

[align=left]ودمتم سالمين ,,[/align]

[رفحاوي]

هههههههههههههههههههههه

نهاية تحزن ...

كنت متوقع ان الشينة عمته ام المرة ...

[فهد محمد]

الاخت الانشودة شكرا لمرورك ,,,,,



(( الشقوة)) المعزل اللي ينصف الشعر [ قديم ]
(( الديرم )) أعرفة بس عجزت افسره



استاذي رفحااااوي عسى الزيجة اعجبتك

شكرا لمرورك,,,

[ضاري]

يخرب بيت ( الحويل ) من اين طلعتهم يافهودي ؟

ولا تدري [ فهودي ماتصلح لك ] منين جبت هالسالفه يافهههههههههد ؟

قصه مثيره وصدقني جميله وخاصة ( المعزل ) كانوا يسونه بعض الشباب [ الاتيكيت ] اللي ( بالمثنى بن حارثه )
أحسن قصه !! واحسن قصه !!

اكيد اخي فهد
اختنا انشودة المطر جديده وعمرها جديد والعمر كله يارب ، لازم تجيب هالسوالف اللي يطلع من راها غبار

تحياتي لك ولاتحرمنا من هالقصص

وياليت تجيبلنا قصه ددسن 79 ههههههههههههههههههههههههه

[فهد محمد]

ضاري الله يلعن ديكك والله مافهمت شي من الكلمة

اللي بين القوسين ,,,,,,,,,( الانيكيت ) لكن ابشر بعزك

والله لا ادوخكم بالمواضيع المغبرة مثل جو الليله ,,,,,






ضاري [ ماتنؤش ] يله ؟ الله يمرمط بلاعيمك ,,,

[ضاري]

يحقلك يالحبيب

ماتعرف [ الاتيكيــــت ]

اسمعي ياانشودة المطر مايعرف الاتيكيت من جيل الف وثلاثميه ورضمه

وش تبي ببلاعيمي لاعبهن هالعجاج

كعععععععععععععععععع.

[الزعيم]

يافهد ( الا تـــيكيت ) ماهي ( الا نـيكيت )


بصراحه قصة حلووووه . الله يرجك من زمان ما ستمتعنا ( بهيك ) قصص

استمررررر وننتظر جديدك .

[فهد محمد]

شكرا يادرتي الزعيم ولاتدقق ترانا حويييييييل ( ريغا )

شكرا لطلتك وياعلي ماذوق يومك وهالوجه مايرج ,,,,,,,

[فهد محمد]

تكفى يالجذع ضاري ترى مالك جيل

ماعاد باقي من جيلك غير ((( أبو قرش ))) ــ بتشديد الراء ــ واختفى

[ضاري]

يخرب بيت الاجيال

اسمك مكتوب على البيب حق التابلاين تدري وش مكتوب




[align=center]ذكريات
فهد محمد + ددسن 79 = حب للابد
ذكريات
ملعب ( نادي .. سانتس ) احبك يابو عقارب !!!!!
شراباتك مقروطات هناك شكلك لاعبلك مباراة ودابينك الفريق الثاني يحسبونك ( الحكم ) [/align]

[فهد محمد]

هههههههههههههههههههههههههههه

الله يرجك ياضاري اعلن استسلامي

مابعد البيب وسانتس شي

[الزعيم]

ذكريات
فهد محمد + شباب رفحاء عام 1395 هـ+ ددسن 75 = وناسة وبساطه










يالربع أحد يعرفهم ......

[فهد محمد]

ياقدمك يالزعيم !!!!!!!!!!!


تسلم على الصوره الله يذكر ذيك الايام بالخير -------------->>> ازعط



من اليمين : ضاري / كر وفر / الوميض / دار السناعيس / الزعيم / رفحاااوي

[ضاري]

الزعيم
شوف هذاك الأيسر اللي يناظر للكاميره مستغرب مايدري وشي هذا ( فهد محمد ) وشف التعبان وين صافط الددسن حقته ملمع الكفرات بسكر !!

تشوفون ددسن فهد وراه بالصوره

وهذي السياره الحمراء واقفين يصورون معاه حقت الزعيم جاي من لينه حيث أن لينه اشهر من رفحاء سابقا
جاي يحضر زواج فهد محمد وشف هذاك اللي يسلم بحراره تراه ( كر وفر ) و( دار السناعيس ) مايداني الكاميره متغيب وراء ، شف رجلينه وراء سيارة الرجيلي !!

مسكين ياصاحب الددسن 79 ملمع بسكر