[align=center]صباح ومساء (هالكشرات) كل أبوها


ولو إني داري انكم مادخلتوا الموضوع لعيوني..لكن كله على شان طاري سولاف يهون..




بس والله ياجماعة الربع أنا لا شفت الممثله السوريه سولاف فواخرجي (تحلل صواميلي

واتخزبق) وتلقاني لاشعورياً منلحط قدام التلفزون فـ مايكون من (الوالده) إلا فصل الفيش

والدعاء بأن تعود بها السنين للخلف لكي ترزق بولد بدال اللي ضاربات فيوزه واللي هو

أنا ..

شباب بنات .. هذي القصه تجدونها على ثلاث فصول .. يعني اللي يتعب من القراية يعرف وين وقف

بأرسلها على ثلاث دفعات لأنها طويلة وعلى شكل مجلد

_____________________



<< مدخل حصري لـ نـازف >>


قالوا تحبه ؟! قلت: بالحيل بالحيل * قالوا توده؟! قلت: ما اود غيره ..

قالوا تريده ؟! قلت: بالحيل بالحيل.. قالوا تعزه: قلت آه بالحيل بالحيل ..

قالوا تتمناه؟! قلت: يلعن أبليسكم لكم ساعة طايحين فيني أسئلة!!


توكلوا على الله عشان أبدأ القصة


_____________________________


( الفصل الأول )

- لحظات ماقبل الحسم -

كان ياماكان .. ذات مساء رفحاوي جميل .. وكنت في طريقي متجهاً إلى وسط رفحاء الخضراء

بالتحديد ( سوق العلاوي ) حق الخضار والفواكه ..

وكان معي صديقي وحبيبي أبوفهيد _ ستعرفونه لاحقاً

والعلاقة بيني وبين هذا الصديق تمتد لبطون التاريخ .. وذلك قبل 27 سنه أي أول ما انولدنا

في اسبوع واحد .. وهذا رابط من الممكن أن يفيدكم بمعرفة ابوفهيد بشكل أكبر

http://www.rafha.com/vb/showthread.php?t=30915

وكان يسولف لي عن مغامراته في سوق ( الغزل ) ومواعيده الغراميه مع ( بنات الهوى ) ..

وانا ( فاغرُُِِ ُ فاي ) >>- أي رايحن فيها ورايح وطي ورايح كشنه بالكشري مع سواليفه

وهذه بعض سواليفه مع بنات هواه

-- تصدق يانازف، أمس "دلول" أهدتني دب مكتوب عليه أحبك يا عذابي !!

-- تصدق يانازف ، هذا البوك اللي في يدي .. مهديته لي "تغريد" الربوع اللي طاف !!

-- تصدق بالله يانازف "هدى" سددت فاتورتي حقت الشهرين اللي راحن وفيها ألفين ريال !!


وانا قاعد أستمع له و ( مبلم ) لدرجة اني قطعت اشارتين حمراوتين بس الله ستر علينا


ـــــــــــــــــــــــــــــــ


ترن .. ترن .. دق جوال أبوفهيد .. ناظره وقال: يلعن أبو اللزقات ياهووووه ..

شف يانازف !! طالعت شاشة الجوال ومكتوب فيها : النشبه يتصل بك !!

قلت من هالنشبه ؟! قال: هذي" ابتسام" الله ياشيخ ياخذها .. أنواع الازعاج كل يوم عشرين مسج

وستطعش ستين اتصال .. سميتها نشبه ولا قمت أرد عليها .!!

قلت في نفسي : إيه بلا والله من العز اللي انت فيه .. يحق لك تطنش !! مو زيي منقطع


شاف ابو فهيد بقاله قال وقف وقف .. وش أجيب لك معي؟ قلت : أي شيء ..

نزل ابو فهيد البقالة وجواله عندي بالسيارة ..

قعدت أهوجس.. الحين أنا أزين من ابوفهيد بألف مرة .. وشعري أنعم منه وأرتب ..

وسيارتي أحلى من سيارته .. ومع هذا البنات عنده وانا ( متلحط ) بس شلة الاستراحه التماسيح!!

إيييييييييه الله يا أم كلثوم صدقتي يوم غنيتي من ألحان السنباطي وقلتي: (الحظ لا منه

استقعد.. وش يفكك منه ياوليدي (


ورجاءاً لا أحد يسألني عن هالأغنيه لاني سألت "السنباطي" نفسه عنها ولا عرفها!!

ترن .. ترن .. قطع هواجيسي اتصال جوال ابوفهيد .. ناظرت الجوال وأثر "النشبه" يتصل بك!!

زحلق علي ابليس زحلقه مايسويها المنتشري لا أنفرد به القحطاني وقالي:

رد .. رد واسمع الصوت العسل .. انت في حياتك ماسمعت الا صوت حرمتين:

أمك لا قامت تدعي عليك.. وشغالتكم لا قالت: جيب شماغ انته .. انا فيه يكوي ..

شلت الجوال..ظغطت على السماعه الخضراء وقلت بصوت رومانسي حنوووون عاطفي حااد:

ألوووووووووووووه .. واحتريت الرد العسل والصوت الدافيء واذا بصوت أجش مكر مفر مقبل
مدبر معا .. يخترق طبلتي:

-- وينك فيه ياهالسربوتي تاركن بالمستشفى ساعتين وتدوج في هالشوارع !!

من الخرعه سكرت السماعه وقطيت الجوال وقلت الله ياخذك ياهالزلووووخ يابوفهيد.. أجل

(أبوك) خليته ابتسام >>- طلع النشبه أبوه

ركب ابوفهيد ومعه بيبسي يشربه وعطاني (برراية خضراء أم مرايه) !! قلت: خير ان شالله ؟

قال: انت مو تقول جب لي أي شيء !!

قلت: أقول ترى ابتسام تحتريك بالمستشفى يالنصاب !! ( رمقني ) بنظره حاقده وخذا جواله

وجلس ساكت وهو عيونه حمراء وبحر أمواج خدوده قاعده تتلاطم من قوة التهزيئه
اللي عطيتها له


وفجأة إذا بنا على أعتاب السوق الجميل سوق العلاوي للخضار


V
V
V[/align]