اخو جديد.. هل من مرحب او(عاااازم)

[البدر الساطع]

وعليكم السلام ورحمة من الله وبركاته
أهلا وسهلاً فيك معنا بالمنتدى يا اخيذة ضحى
في انتظار مشاركاتك الهادفه 0

[الأسلمي]

حياك الله اخيذة ضحى وهلا ومرحبا
ولي كم يوم اقدم اصبعا الى الكي بورد ثم اتبعه باك سبيس
الله لا يورشعك مسلم
هد شوي والعزايم تجي بس اصبر
وعندي اقتراح قلته للاخ / همام يحطون لك { عضو متورشع جدا} لكنه قال
نهى الرسول صلى الله عليه وسلم عن الجلوس على جلود النمور


اخوك / الأسلمي

[فواز]

وعليكم السلام ورحمة الله وبركاته


يا هلا والله بأخيذة الضحى .. ويا مرحبا فيك


الله يستر من ( تورشعك ) والله يكفينا هالتورشع ..

اسمع أنا بعيد خطوة .. لكن شكلي أبي أجي لرفحاء علشان أعزمك .. بس تراني ما أعرف سالفة الذبايح .. ( بلنا حدى هالمطاعم ) أنا وأنت واللي تبي ... ( بس لا تكثر )

بس لا تجيب ( دايخ ) ترى يمكن نذبح .. ( هو رجال شراني ) وحنا ما لنا بالشر ..


والله أني رد عليك ومرحب بك لا وأبي أعزمك .. بس عساني أسلم منك .. ومن ( ضحويتك هذي )


يا عمدة عطني خبر كانك فاضي علشان أجي الأسبوع هذا .. وإلا نأجلها ...

[اخيذة ضحى]

أوووووه " دايخ " جابه الله .. يا هلا .. اسمع لاتكتب شين عقب اليوم لمدة غير محددة .. بعدين أحدده لك .. لأن الناس التهوا ب(ماضوعك) عن العزايم .. ما يصير .. اركد شوين .. أدوختنا .. بس انا اقترح توزع على معارضينك ( صارت سياسة ) توزع عليهم حبوب بنادول .. أدوختهم .. الله يكفينا شرك .. ولا تليّشت من كثر هالردود واللي يردون .. اهب يا عللك ما تفيد ..
اسمع انت تقول : غديّ خاص .. يا خوي يا صار خاص أدري يبي يصير ( دجاج ) .. هذي مثل قولة بعضهم .. من عشا البيت .. طيب .. يمكن عشا البيت أكا الليلة .. فول ! .. انت من قلت خاص أوجعن بطني .. بس أنا عاذرك لأنه إن صار عام خلق الله تبي تجمع عليك يبون يشوفون من هو انت ، لكن أنا أقول .. طليّ .. وأقلط عليه لحالي ما عندي مانع .. ونعزم الاسلمي .. يستاهل مشرفنا .. هاه يمكن يطلع لنا شين من هالمنتدى .. فلوس جوايز .. بس يالاسلمي من هالحين العشا قلطتين .. انت ودايخ القلطة الثانية ..
وعلى فكرة قبل ما أنسى
تدري إن بعض الربوع مستانسين إنك عطيت معلومات عن نفسك بهالرد .. تلقاهم الحين متجمعين .. وحالتهم يسولفون بينهم ..
أتوقع سوالفهم كذا :

طلفوح : غريبة ما هو فلان ؟
شلفوح : لا يارجال ماهو فلان .. أنا قلت لك ماهو أسلوبه .. بس .. حتى فلان ما هو هو !
طلفوح : أكيد ماهو هو .. هذا يقول متزوج . لكن من هو ؟
شلفوح : معقولة يكون فلان .. هو من شلّتهم ..
طلفوح : لا يارجال ..فلان عنده كمبيوتر من سنين .. وهذا يقول برده انه يرد من المقاهي لأن ما عنده كمبيوتر .
شلفوح : طيب ما هو يمكن تمويه ؟
طلفوح : والله معقوله .. يمكن يبي يضيعنا .. ولاّ وش حادّه يقول هالمعلومات ..
شلفوح : ما تعتقد انه فلان ؟
طلفوح : لا فلان ماله بهالسوالف .
شلفوح : ولا فلان ؟
طلفوح : لا فلان ما يعرف للكمبيوتر .
شلفوح : يا رجال هو أصلاً شكله فيه واحد يكتب له ، وهو يعطيه الكلام والمعلومات ..
طلفوح : لا لا ما أعتقد ..
شلفوح : طيب من هو ؟
طلفوح : والله يا خي أنا بديت أشك بك ؟
شلفوح : وشو !؟
طلفوح : صراحة نفس أسلوبك .. وانت من تالي بينك وبين ربعنا مشيكلات .. ؟
شلفوح : انت الظاهر بديت تخبّص .. انت يا خوي كان ما تدري .. شايفك واحد أكا الليلة بالمقهى ولا هي لك عادة !
طلفوح : وش تقصد ؟
شلفوح : أقصد اللي انت فهمته .. أنا من أول شاك صراحة بك .. خاصةً بعد .. روحاتك لا كالرّبع بمجيلساتهم ؟
طلفوح : أقول انطم ..
شلفوح : هاه .. احترم نفسك .
طلفوح : احترم نفسك انت .. لاأقوم عليك الحين . . اعطيك طراق !!!
شلفوح : تعجز ..



على فكرة المرة الجاية أبغى أقول لكم من هو " دايخ " ! انتظروا .. !




"البدر الساطع" .. اللي .. تقول تنتظر مشاركات هادفة!؟ عز الله هذي البلشة .. ياخوي المنتدى ..قوم .. مالَه لا عد ولا بد .. مسِكت علي أنا اكتب مشاركات هادفة .. أنا ما أعرف أكتب .. ليا صرت متضايق .. وانت ما انت ملاحظ انك ما أطريت العشا ..
إذا تبي تعرف من هو أنا اعزمن .. ماعليك ادل البيت .. لأنه ساطع ..



وأخيراً " الاسلمي : يالاسلمي لا تحسبنّ اني مثْلَ اشعَب ولاّ شبيهٍ للسنافي جحا
أنا مثل حرٍّ كفخ ثم دلاّ ياويلكم جاكم اخيذة ضحى
مطمطوا أو قشمطوا بعض الكلمات منشان ينوزن البيت
وبعدين تقول : اصبر .. ما تلاحظ انها كلمة( فضفاضة ) شوي .. إذا صار انت اللي مشرف بالمنتدى لا غدّوك ولا عشوك .. ولا سمعنا طاري شين .. يعني نبي نحصل حنا شي ..
على فكرة ترى مفتاح ( باك سبيس ) بلوحة الفاتيح ( بتاعتي ) (ماصْعُه)من اشتريته ! ما احتاجه !



يا " فواز " بيك .. هلا بيك .. وسهلا فيك .. الله محييك .. اسمع تقول الله يستر من تورشعك ولا ما تقول .. نبي نتورشع .. وش قاصرنا عن دايخ اللي انت تقول لا تعزمه .. هذا هو ممرسٍ على العالم .... ابلش هالناس .. ما أدري ليه ما ينثبر ..
وانت عزيمتك شكله رخوة .. ماش واضح انك ماانت جازم ..
وبعدين شف.. الضحى ماحد يسلم حتى المشرفين ..

لكن يمكن تلاحظون بعض ردودي على هالناس خفيفة وحليلة لأني ما كتبته الضحى ..
ولذلك اسمعوا :
1- اللي نرد عليه الضحى .. لا يلوم الاّ نفسه .. ويتحيزم ..
2- اللي نرد عليه غير الضحى أهون .. وبالليل تجي باردة .. ولك عليه.. ومانا حليله ..
وسلامتكم ..

[دايخ]

أخي:
أخيذة ضحى
عز الله انك بلشه صحيح . ان تركناك ابلشتنا وان عزمناك تشرطت علينا.
بلشنا بك ما ندري وش نسوي بك.

اسمع
عشي خاص يعني ذبيحة انا وانت والاسلمي نطلع عليه للبر ولا من شاف ولا من دري.
بعدين الله يهديك وش هالمحاورة اللي انت حاطه . والله اني ضحكت حتى (دخت) وتخبر انا (دايخ) بدون.

بعدين نبهتني لأمر خطير كنت غافل عنه جزاك الله كل خير.

وابي اسكت عن الردود لمدة بسيطة وترى اذا ما احد عزمك ابي ارجع .

السسسسسللللللللام

[المرجوجه]

وعليكم السلااااااااام والرحمه

هلا فيك اخوي..
ويا هلا فيك ساكن عندنا في الضحويات وغيرها..

احم .. ايش معنى .. أحوف؟؟؟؟؟؟؟؟

حياك الله .........................

[اخيذة ضحى]

" دايخ " اسمع أرسل لي رسالةٍ خاصة عن طريق الموقع ، عطن معلومات وافية عن عزيمتك لي ، وأبد لا تشيل هم ما نعلّم أحد لا أنا ولا الاسلمي ، أنا ما أعلّم لأسباب ( عاطفية ) ، والاسلمي أتوقع ما يعلم لأسباب ( مهنية ) ..
وبعدين انا احترت بردك الاول تقول (غديّ ) خاص وبالبيت ، وبالثاني تقول عشا وبالبر .. الظاهر تبي ترد – والله يستر – وتقول هالمرة : فطورٍ ما مثله .. وتقلّط لنا انا والاسلمي : جبن وزيتون وفول .. لكن اسمع أرسل لي فليسات الذبيحة .. آمن لك .. ونتفاهم على الفلوس أنا ومعزبنا الاسلمي !
على العموم لا تطوّل بالرسالة ، ولاّ ..!؟
بعدين اسمع ( ألْبد ) هالسبوع ياما تاضح الامور .. ترى الربع يستديرون يدورونك ماخلّوا أحد ما شكوا به حتى أبو تغريد .. ويا .. دايخ .. مرة ثانية .. ياعلّك ماتفيد .. تدري ليه ؟ لأن شكلك تخطط على أمور خطيرة .. هذا وانت دايخ شلون لو انت صاحي ... اطلب ربي انه يبقيك دايخ ..


يا " المرجووووجة " يوم انك حاطتن هاللي تناقز تحت .. ما تستحين مطلّعتن صورتك يوم انك صغيّرة !؟
والعزيمة أشوف ماله طاري .. ماش الاصيلة طلعت اطيب .. حصّلنا لنا على الاقل رغفان .. يالله لك الحمد ..
وبعدين انتِ دايم مطفيتن النور .. تدخلين .. وتكتبين : شكراً على (الماضوع) .. وتمشين .. والله العالم انك حتى القراية ماتقرينه ، ولا تدرين وشو الموضوع .. ايه من كثر سوالفكن يالحريم ما عندكن وقت .. معذورة !
بس الظاهر انك قريتي ( ماضوعي ) –غريبة- لأنك تقولين وش معنى : أحوف ؟ ما استفدنا شي !! انتن يالحريم أكثركن مايقرن وان قريتن ما تفهمن ؟؟ اللي من بلشة ..
وعلى العموم ياهلا باللي يرحبون .. وناوين يعزمون ..
اسمعي معنى ( أحوف ) : من حافَ يحوفُ حوفاناً فهو حايف وحايفة ومصدره حوفان ، وهي تدل على المباغتة .. يعني ( هجوم خاطف ) .. ما سمعتي قولي :
احوف انا الموقع على طلعة الشمس .. وانسل يامنَّه دنت للمغيبي

[المرجوجه]

السلالالام...

يا ذي الصوره اللي انا حاطتها.. ما أدري ليه جايبه لكم المرض..

ماعلينا.......
كويس انك علمتني معنى أحوف... (( نسيت اني سائله عنها أصلا )) ..
اما العزيمه كانك مستعد تسافر حياك .. عزيمتي فيها رحله
وبعدين ترى أفهم بس أحياااانااااااااااا تجي غلط احم.. أو العكس .؟. أحيانا .. أفهم ..؟؟ ما أدري..
ماعلينا....

سلالالالالالام.....