ماعليك / ماعليج زود فسروها لي

[الحسن المثير]

مرحبااااااااااااااااااااااااااااا

الموضوع بصراحه أحب الكل يشارك فيه

في تمام الساعه التاسعه صباحا ليوم السبت الموافق 16/12/2006 وكل وحده منا (( انا والبنات)) قاعده على مكتبها والمدير بسابع نومه دفيان وماعليه <<<<< قصة حياتج اخلصي

المهم دار النقاش المذكور أدناه بيننا (المعذره لان الكلام بيكون بالعاميه )

النقاش هو (( اذا احد جاك ومدحك وقال انت الطيب وماقصرت وفيك الخير وانت البركه ....الخ )) بهالحاله لابد من حضرة جنابك ترد عليه برد يليق بالكلام الي قاله عنك والرد المعروف بينا هو كلمة (( ماعليك / ماعليج زود )) ياترى شنو معنى ماعليك / ماعليج زود وهل الكلمه صحيحه تنقال للرد على المدح ولا تعتبر مسبه ؟

وعشان أوضح أكثر

مثلا مثلا قلت شخص ما انت ماقصرت وتعبت معانا مثلا فيرد ويقول لي ماعليج زود شنو يقصد بكلمة ماعليج زود هل يعني يزيد من مدح نفسه ومايقدر يرد علي لان مدحي له كفى او يقصد اني ماازيد عليه لا بطيب ولا شنو تفسيركم اتمنى الرد للي يعرف المعنا

وفيه كلمه ثانيه لمن نقول تشتاق لك العافيه هل صحيحه بعد ؟؟

[ليث]

انا اللي يمدحني طبعا استانس اول شي وماقوله ماعليك زود اقوله انت واحد من كثير يمدحوون>> ماعليكم زود




اللي اعرفه ان كلمة ماعيك زود

تنقال للمدح وللمسبه


واحد يقول انت طيب""">>> الرد يكون على التقدير ماعليك زود بالطيب يعني انت اطيب



واحد يقول انت غبي>>> الرد على التقدير ماعليك زود بالغباء يعني انت اغبى


تعبت

كمل رفحاوي

[الكاشف]

معنى ماعليك زود : يعني وأنت كذالك سواء كانت في المدح أو في السب بعض الأحيان ،
ومعنى تشتاق لك العافية :بما أن صاحبه يقول له مشتاق لك ولا أستغني عنك ( إختار له العافية لأن الكل مشتاق لها والكل لا غنى له عنها )
لكنني غير مقتنع بعدم معرفتكم لما سألتم عنه لسبب قرائتي لبعض مواضيعكم

[الميزان]

[align=justify]

مابين الكلام المحلى والمملج(على رواية ماعليج ) كانت المنزلة بين المنزلتين هي ضوال الكلام من ضَالَ يضول ولا أعلم أضولا ام ضوالاً والتي درجت حينما سكت أهل البلاغة.. ولئلا يطول الكلام فأعتقد ان نعيش نشوة من ضوال الكلام هنا[/align]

[أبو هيا]

ماعليك زود كلمه ماهي زينه..يعني كانك تقول للشخص اللي امامك انت ماتزودني بالطيب اي انا اطيب منك والمفروض اذا قال لك احد والله انك كريم وطيب تقول له ادري اني كريم وطيب...

بالنسبه لكلمة تشتاق لك العافيه هذي ماهي زينه يعني تتمنى ان العافيه تبعد عنه وتشتاق له من بعيد..

انا اشك في الموساد الاسرائيلي هو اللي نشر هالكلامات هذي..وفيه بعد بيض الله وجهك وشلون يعني تدعي على الرجل بالبرص..وفيه بعد فنجالك عندنا وشو فنجالك عندنا...وفيه بعد عز الله مقامك تبرير للكسل في النهوض...

الملخص انها تدور في النفاق الاجتماعي يعني تلقى واحد مايسوى ريال يقول لواحد عفن والله انك ونعم ويرد عليه العفن يقول ماعليك زود..
تحياتي لكم

[رفحاوي]

[align=center]
ليث

هههههههههه سلامتك من التعب ...


الحسن المثير

معنى ما عليك زود يعني انت اطيب مني وماكو احد افضل منك ...

يعني مدح ...

لكن مع مرور الزمن وتطوروا الناس وتعلموا استخدموا الكلمة للسب ...


[/align]

[ذيب حرض]

رفحاوي وليث أنا معكم في التفسير

[الحسن المثير]

ليث

كل الشكر لك ولتوضيحك وجزاك الله خيرا

الكاشف

أسعدني مرورك ولكن ماقصدك بأخر كلامك بعدم معرفة حضرتكم لما سالنا عنه بسبب قرائتك لبعض المواضيع ؟

كول 2005

؟؟؟؟ !!!!! لم أفهم ماتعنيه وشكرا على المرور

حمود 18

شكرا لمرورك ولتعليقك وبالنسبه لتعليقك اتفق معك في بعض الكلام وأختلف معك في البعض الخر

رفحاووي

شكرا لمرورك ولكن للتوضيح ماقدامي احد مجرد تغالط في الكلام بيني أنا ورفيجاتي فقلت لهم بنزله بمنتدى ونشوف منو يتفق معنا في الكلام ومن يختلف ومن يبدي شي جديد

واحب أقولكم اليوم لمن رديت من الدوام سألت أمي الله يخليها لي ويخلي أمهاتكم لكم فقالت هي للمدح فمثلا قلتي لاحد ماعليج زود أي محد أطيب أو أزود منك أو منج بالطيب

شكر ا للمرور

[فارس بلا جواد]

السلاااااااااام عليكم

كلمة ما عليك زود اكثر ما نقوله اذا قالك الواحد ( والنعم)

ومعناه : ما عليك زود يعني ما ازود عليك بشئ بالنسب او الطيب او الفزعه او المكانه

وليس المقصود منها انك افضل مني لأن الرجال يقولك والنعم او ماشاء الله عليك طيب او راعي فزعه

فترد عليه تقول ما عليك زود يعني ما ازود عليك بشي والهدف هو ابداء التواضع من جانبك

فاذا مدحك شخص منت قايل له ماني طيب مثلا ومنت قايله اي والله انا طيب ايضا ؛فلازم يكون ردك

مناسب بين النفي والاثبات وتبين للشخص انك متواضع له وان مدحه لا يجعلك تتكبر و لا تهضم حق نفسك......


وما عليش المشاركه متاخره لني ما دخلت المنتدى الا بعد ردود الشباب..


فاااااااارس

[فارس بلا جواد]

نسيت... ابضرب لكم مثال:

الحين لو يقابل شخص عادي احد الامراء فجاء ذكر الامير وسمع الناس يقولون هذا الامير فلان ابن فلان

وقال هالشخص هذا للامير والنعم اكيد الامير يرد عليه ما عليك زود<طبعا اذا كان متواضع والا المتكبر مايرد اصلا>

وش قصد الامير برده -ماعليك زود-؟؟

هل يقصد انك افضل مني ؟؟!

طبعا لا؛لأن فيه تناقض هنا كيف هالشخص افضل منك وهو مواطن عادي وانت امير لك مكانه وهيبه وربما نسب!!

هذا المثال فقط للتوضيح ان المقصود بهذه الكلمه ليس انك افضل مني بل معناه لا ازود عليك بشي وانما الناس سواسيه

عند الله.........

[فلاح ولد منيـرة]

............... الاشراف ................

يجب ان لا يقود الحوار للتلفظ بالالفاظ النابية


سيتم تعليق عضويتك لمدة عشرة أيام

[البرّاق]

[align=center]دخلت الموضوع ابي ازود عدد مشاركتي فقط
تسان مافيه مانع
[/align]

[الكاشف]

الحسن المثير/
أقصد أن المواضيع التي قرأتها لكم فيما سبق تدل على ثقافتكم ومعرفتكم وأكبر بكثير من طلبكم توضيح ( ما عليك زود ، وتشتاق لك العافية ) بنظري لبساطتها والكل يعرف معناها ولا تبي من يسأل عنها 0 وشكرآ

[الحسن المثير]

فارس

شكرا لمرورك ’’’’ أقنعني تفسيرك ولكن بضرب المثل على الأمير

دام أمير مااعتقد بيقول ماعليك زود اما بيقول تسلم أو جزاك الله خير الا مارحم ربي

ودمت بعافيه

[الحسن المثير]

............... الاشراف ................

يجب ان لا يقود الحوار للتلفظ بالالفاظ النابية


سيتم تعليق عضويتك لمدة عشرة أيام

[align=center]فلاح

لأول مره ترد من غير ابتسامتك المعهوده
شكرا لمرورك ،،،، من تقصد بتعليقك وأي ألفاظ نابيه ذكرت
ارجو التوضيح[/align]