" سويلفات " مواطن بسيط جدا ً ! >> محمد الرطيان

[سفاح الشمال]

" سويلفات " مواطن بسيط جدا ً !


يا خوي .. هالحين يقولون بالاخبار ان البترول تجاوز سعره الخمسين دولار .. ويقولون إننا نبيع حوالي العشر ملايين برميل كل يوم ... ويقولون ان الفايض – تبارك الله – حوالي الخمسطعش مليار ... وراهم ما يعطون كل مواطن مليون ريال ، ويدبّر عمره ؟!

طيّب .. طيّب ! ... يا خوي عاد تراني ماني غشيم ٍ بالحيل بأمور السياسه .. واعرف المليون بعيدن عن شواربي وشوارب أي مواطن مثل حلاتي ... أقول طيّب وراهم ما يوظفون الولد ويفكوني من شره .. مسيكين من كثر البطاله والعطاله بس يتخّم ويدوّج مع هالشباب اللي مدري وين يبون يقلعونه هم وافكارهم اللّي تخوّف !

طيّب .. نبيهم ينقصون أسعار بعض هالمواد الغذائية ..

أو يعفوننا من بعض الاقساط ..

او يلغون بعض الرسوم .

حتى الشون تلاوصله القصيبي هو ووزير الشون الاجتماعية .. لقولهم عاملن بنغالي بأسمي .. وهفوه ! ( اللي هفوه الشون ، ولاّ العامل هذا هو مقابلن يقلب وجهه عندي ! )

ألا على طاري القصيبي ، والله اني ذالن على العيال .. واحد يبي يكفر بكل شي .. والثاني يبي يكفّر كل شي .. والثالث اشوفه يجمع كتب القصيبي وطول ليله يقرا .. ولا جا الصبح قام يرطن عليّ بسويلفات ٍ مدري وش سنعه .. والله اني ذالن عليه انه ينجن !

عاد شف يا وليدي – انتم يالصحفيين ما تنومنون – كانك ناوي ٍتنشر هالحكي بجريدتك .. انا طالبك انك ما تعلّم بأسمي .. تخبر انا شايبن كبير بالسن .. ولو يصفقن حديهم كف على غفلة .. أخاف أنجلط !

ألا وش اسم جريدتك ؟... " الوطن " ؟!!

آآآآآآه يا الوطن .



محمد الرطيان

[الحرقاني]

شكرا لك على النقل

[رفحاوي]

[align=center]
آه يالوطن ...

كثير تسموا بك ووسخوووووك ...
[/align]

[واحد_مؤدب]

نقله نوعيه في كتابات استاذ محمد الرطيان و إبــــــــــــداع متـــــــجـــــدد ......

[ســــــــــعودي]

شكراُ على النقل

[ثاني التومي]

مشكور يالغالي

[المديرالسعودي]

سفاح الشمال
شكرا لك