ظاهرة المجاهدين ( البشمرقة) تعيث برفحاء فسادا

[مصطفى]

الحمدلله رب العالمين ولا عدوان الا على الظالمين
من مصطفى الى المجاهدين قاتلهم الله
السلام على من اتبع الهدى

انتشرت في الآونة الاخيرة ظاهرة خطيرة تفوق في خطورتها العدوان الامريكي على ارض العراق بل وتفوق في حجمها الاعتداءات الاسرائيلية على مخيم جنين ثم على القطاع باكمله.....
لا نطيل عليكم فهذه الظاهرة تتعلق بوجود مجموعة من المتخلفين او ان شئت (المرتزقة) على بلاد الوفاء (رفحاء) يعيثون فيها فسادا كيفما شاؤا ...فكم (فلقوا من شاب ) وكم (لفعوا من مسكين)وكم روعوا من اعزل....
علما بان اهل البلد متضايقون جدا من عمليات الاحتلا ل ومن تمشيط الحارات ومن بث الرعب في قلوب الناس.وليس بيديهم سوى الشجب والاستنكار لعمليات البشمرقة.
ولتسليط الضوء على هذه الظاهرة الخطيرة والتي يعكف عليها معهد ابحاث الفضاء (ناسا) لتحليل ابعادها النفسية على المجتمع ...وتطوعا مني اضقدم هذا التقرير المتواضع لعله يفيد الباحثين ويرعب المارقين...


المجـــــــــــــــــــــــــــــــاهدين

التعريف / مجموعة سرابيت فاضين شغل وفاهمين الاوامر غلط.
الاسم العلمي/ البشمرقه.
الشعار/ عقب الرشاش.( لانه افضل سلاح عندهم).
التعليم/ واحد متعلم فقط معه خامس ليلي ب من ابتدائية ابو جيزن في صامطه....
اماكن التواجد/ الشوارع وعند التجمعات.
المقر/ بجانب مكافحة التدخين.
العقلية/ صفر...
الذوق/ معدوم...
التعامل/ كانهم يتعاملون مع اليهود..
التفاهم/ بعد الضرب...
الحجة/ وين البطاقة....
الاخلاق/ تكرمون ....
الزي الرسمي/ مرنقط تقل شايف لك قطيع سلق....
المميزات/ لاتوجد....
الاخطاء/ حدث ولاحرج....
معلومه مهمة/ لديهم سيارتان سريتان (جمس) واحد ابيض والثاني الظاهر احمر ..واقفات امام مسجد العيد باتجاه مبنى قيادة قوات البشمرقه.
.................................................. .................................
وقبل ان نورد بعض القصص تسلية للقارئين وعبرة لأصحاب العقول لكي يحمدوا الله على نعمة العقل ننبه ان مافي هذه القصص حدث فعلا وليست من نسج الخيال ولولا التشهير لكتبت اسماء من تعرضوا للمواقف.........
1- مؤذن مسجد طالع الفجر يبي يأذن قالوا له وين يالحبيب قال للمسجد قالوا مافيه مسجد المهم انهم سمحوا له يأذن الفجر وقال (السلقة ) الراكب اليوم بس وبكرى مافيه ......
...... الحمدلله رب العالمين على العافية,,,,,,,,
2- على طريق حدق الجندة الترابي (اعوذ بالله حتى بالبر) الله يستر القاهم بكرى بحمام بيتنا ماسكين صرصور يحققون معه وين البطاقة...؟
المهم شايب سواق مدرسات بحدق الجندة وقفوه وقالوا نبي نفتش لكن كانت حدى المدرسات شقردية وقالت له انقلع..وتحمد ربه المدرسة شكلهم ما معهم رشاش والا العقب حق الرشاش يشوف شغله.....
بالله يامسلمين هذولا بشر اقسم بالله انهم حيوانات وسلق...
3_ مدرس برفحاء عند جامع سارة مسكوه ولفعوه وعلى الطريقة الخاصة (عقب الرشاش) .. والسبب ليش تناظر لنا كذا...
اللهم لا شماته.........
4-يحدثني احد المضطهدين من قوات الاحتلال البشمرقة انه بعدما تشرف بزيارة المعتقل وبعد ان اخذ له تفلتين محترمات + تهزييء انه انقهر: لكن ابو الشباب خرج منهم وهو يضحك ومنبسط ... بعد التحري عن سبب الوناسة اكتشفنا انه شاهد عشرة شباب منسدحين على الارض ومجموعة اخرى واقفين ورافعين يديهم واحد السلق معه رشاش وكل ما تحرك واحد اعطاه عقب محترم...
يقول صاحبنا....الله يذكر صدام بالخير.....
5- قامت قوات البشمرقة بمطاردة احد الشباب وحدوه حتى صدموا سيارته عند باب منزل ياسين العلاوي( وسيارته موجوده لأخذ العظة والعبرة عند بوابة البشمرقه). المهم انهم لعنوا خيره قدام خلق الله
وخرج لهم العلاوي وشاهد هذه المعركة واتصل بالمحافظ... وقدم شكوى رسمية على قوات البشمرقة مطالبا بالوقف الفوري والسريع للاعتداءات المتككرة .....
وهـــــــــــــــــــــــــــــــــنا تبينت المصيبــــــــة
طلعوا ان السلق ما معهم امر يمدون يديهم او عقوب رشاشاتهم على اي شخص... والمحافظ صرح بذلك ويقول اي شخص تعرض لاعتداء غاشم او عقب رشاش حتى لو كان بسيط وخفيف يتقدم بشكوى..
وسوف يحاكمون شرعا........
واننا من هذا المنبر ندعوا اي شخص اعتدي عليه ولو بكلمة سيئة انه يتقدم بشكوى رسمية..... وتفيد مصادرنا ان هذا الكلام صحيح ولا غبار عليه....
يـــــــــــــــا اهل رفحـــــــــــــــــــــــــــــــاء
كثرة الشكاوي عليهم سوف توقفهم عند حدهم .... او كل شخص ياخذ حقه بيده مثل السلقتين اللي موجودين الان بالمستشفى او اللي حولوه للرياض.... شدوا حيلكم فاما النصر واما الشهادة.....
اللهم بلغت اللهم فاشهد ... اللهم بلغت اللهم فاشهد ... اللهم بلغت اللهم فاشهد.......

[الجنرال]

جزاهم الله خير.

ياخوي اول ما ننام باليل بسبب هالمبزره المالين الحارة لاخر الليل حتى قبل رمضان.

هالحين بعد الساعة 11 ما تشوف منهم احد بالشارع.

ومن ناحيت التعامل ان شاء الله بكره يعرفون الوضع ويلينون لان شكلهم جايين ومتحمسسين زيادة عن الازوم.

تحياتي.

[رفحاوي]

يا ناس خافوا الله باللي تكتبون
وحطوا الامور بوضعها الطبيعي
اذا افترضنا انهم سووا غلط
وش مقدار الغلط بالنسبة للصح ؟

اشكر اخوي الجنرال على توضيحه

[ابو شنب]

هلا هلا بمصطفي ههههههههههههههه

والله انك صويز

الا والله انك صاز

هالهمج هالغجر هالخبول يضربون الناس ضرب بسبب وبدون سبب
ونقول لهم لهالهمج متى استعبدتم الناس وامهاتهم جابتهم احرار

سمعت انهم لعنوا مترس واحد منهم

اجل فيه ادمي يجيك ويضربك قبل يسأل؟؟؟

حتى اليهود ماسووها

اخويي الجنرال هذا يسمونه عندنا حظر تجول

اوخيي رفحاوي
اوقتنك غديت
انت وش مدريك هاه؟؟؟؟
بلشان تجيب مقاضي ولياجيت للبيت بلشت بصب روب صب ايدام

الا مصطفى ماقال الا الصحيح

وصار لهم فايده لحيث انهم ادبو بعض هالسرابيت فلاكن الواحد اليوم مايضرب ولده وشلون يبد على عيال الناس

رفحاوي بالله تخيلهم يمسطون ابو ويرشمونه كفوف

انا اقولك هالبهايم متولمين للضرب
لياما بكره يجيبون مصيبه للدوله

[مصطفى]

[SIZE=6]الجنيرال[/SIZE]
اشكر مرورك ,,,, واقدر لك وجهت نظرك
لكن هل تتوقع ان مرئياتك لن تتغير لو انهم اوقفوك ::: وين بطاقتك.. وانت تحاول الجواب
جاك عقب الرشاش يمشي مليون,,,,,,,,,,,,,
استاذي رفحاوي العزيز
اولا ابارك لك تخطيك الفي مشاركه
ولا اخفيك اني اكن لك في صدري اكبر تقدير فتحياتي لشخصك الكريم
لكن لو انك ساكن في رفحا هذه الايام لرئيت ان كل ماكتبته صحيح
وانا على اتم الاستعداد ان اذكر تفاصيل اكثر ؟؟؟؟تثبت صدق ماكتبته……..
بالنسبه للمؤذن فهو في حي المحمدية؟؟؟؟؟ واتحفظ عن ذكر اسمة

اما بالنسبه لماحدث في طريق حدق الجندة فبإمكانك سؤال سائق الباص حق حدق الجنده
وحسب حد علمي ان واحد زوج مدرسه ( تومي شمري ) قد تقدم بشكوى ضد البشمرقة؟؟؟؟

اما المدرس ف…........ اتحفظ عن ذكر اسمة (ع ح))

بالنسبه لطريقة تعاملهم في المعتقل بامكانك المرور باي وقت قدام حوشهم
ومشاهدة الاسلوب العلمي في تعاملهم مع الناس وترى الوجوه باتجاه الجدار والايدي مرفوعه
اخيرا قضية الصدم معروفة في رفحا وهو ولد لطيف الرويجح وشف سيارته قدام البشمرقه معجنه
اخي ابو شوارب على قولت حجي رفحاوي
اشكرررررررررررررك على تأييدك وحنا بحاجه لتوضيح الواقع وان كان مريرا حتى انه اصبح لايصدق
تحاتي للجميع

[رفحاوي]

اخوي / مصطفى

اشكر لك هالشعور الطيب
وصراحة انصدمت اني اعرف هالاخبار التعيسة
بعدين من المسؤول عنهم وعن اللي يصير ؟!!
نكون اغبياء لو قلنا ان تصرفهم شخصي
فهم بكل تاكيد لديهم توجيهات من شخص او جهة ما
لذلك ان كانت اعمالهم سيئة كما ذكر فالمطلوب محاسبة المتسببين

وحضرة صاحب السعادة المحافظ وينه ؟!!
وين مدير الشرطة ؟!!
وين العالم ؟!!
الوضع اذا ترك على ما هو سيكبر الموضوع وقد نسمع بحوادث قتل

كل المسؤولين اللي ذكرت بسلامتهم وماني هاقي منهم شي
لكن الامل بالله سبحانه وتعالى ثم باهل الخير برفحاء
وخاصة المشايخ الافاضل وطلبة العلم
واهل رفحاء اللي منعمين حول قصر ابو متعب واهم شي عندهم
يملون بطونهم من تريلات الطعام وعسى رفحاء تحترق

[راميــــــــــش]

أخوي مصطفى .
أؤيدك بكل ماذهبت أليه . فهم فعلا قطعانا من الهمج والرعاع . أنهم لايفرقون بين صبي وشيخ . أنك ترى نضرات التحدي في عيونهم . وترى الجلافة والخشونة في تصرفاتهم . وكأنهم جيش أحتلال . يحاولون دائما استفزاز من يمر أمامهم . يكفيك فقط أن تنظر الى طرق قيادتهم لسياراتهم . يسرعون ويفحطون ويقطعون الأشارات لا لشي بل للأستعراض فقط .
أخيرا لأريد الأسهاب في طرق سلبياتهم فخير الكلام ماقل ودل .
اشكراك أخوي مصطفى مرة ثانية ...... ودمتم ,,,,

[حنين الماضي]

أنا لا شفت ولا سمعت بس أن كان هالشي حاصل فهي غلطتكم أنتم اللي تسكتون لهم
وإذا صاروا مجاهدين يعني !! الدوله وظفتهم مامكلّتهم!!!!!!

[الجنرال]

السلام عليكم ورحمة الله.

ياخوان ترى نبي العدل شوي.

انا حضرت مره لهم موقف.

وقفوا واحد من هالي 24 ساعة يفرون بالشوارع طلبوا اثباته ما كان معاه اثبات.

بغوا يركبونه في الجيب ما رضى وقعد يهاوش ويتلفظ بالفاظ وصخه .

وبصراحه لا ضربوه ولا شيء بس ركبوه في الجيب غصب.

وبعدين هالرجال الي صدموا سيارته ما فكرة ليش صدموها ؟؟؟؟؟؟

اكيد رفض يتوقف وهرب وقوفوه غصب واكيد شايفين عليه شيءولا ما طلبوا يوقفونه؟؟؟؟

زبصراحة هم احرجوا الشرطة وبينوا ان الشرطة لا تقوم بواجبها على اكمل وجه لذلك نرى الشرطه هالايام شدت الحيل شوي.

ياخي اول تفر رفحاء كله ما تشوف دوريه ما تشوف الا هالي يفحطون وبكل عاير شله مذين خلق الله؟؟؟؟

تحياتي.

[الجنرال]

اختي حنين.

وش الي انتم ساكتين لهم.

ترى الشغله مهي شلل وهوشات.

وفي طرق قانونيه للي عنده شكوا.

اما كل واحد بياخذ حقه بيده وش صارت هذي ؟؟؟؟؟؟؟

[حنين الماضي]

أخوي الجنرال
أنا ماقلت تهاوشوا وتطاقوا لا بس الشيء اللي يصير بالشارع مهو شرط الاداره حقتهم تدري به
وين المشكله إذا راجعتوا الاداره أو الشرطه أو حتى الأماره ونبهتوا أو اشتكيتوا على خفيف
لكن السكوت مضره عليكم وعليهم
ومشكور

[الجنرال]

هذا الكلام الصح اختي حنين.

جزاك الله خير.

ويجماعة ترى انا ما ادافع عنهم .

بس انا شايف انهم ضبطوا وضع هالدشير.
ولا تقولوي ما فيه دشير بعد وهذا حظر تجول العاقل ما احد يتعرضه لكن التجمعات في العواير و الزوايا هذا الي نيهم يشدون عليهم .

[أبو القلاقل]

توضيح
المدرس الي لفخوه عند جامع ساره السبب الحقيقي هو انه تفل عليهم
نعم بصق عليهم حتى اسالوه قبل يجيه البقس قالوا له ( انت تتفل على الرجال يالهكري )

والسياره التي صدموها يتهمون صاحبها بمخدرات
وقال شهود عيان انهم بعد ما نزلوا اخذوا يبحثون عنها في الاماكن القريبه
وقال احد الشهود ان احدهم يقول للاخر شوفوا وين رماها

وقد ارسل لي احدهم بعض المعلومات وطلب انزال الموضوع وعندما وجدت موضوع الاخ مصطفى رأيت أن لا اكمل في طرح ما تبقى الآن

المجاهدون بين تحقيق الآمال وتصرفات الجهال 1/1
http://www.rafha.com/vb/showthread.php?s=&threadid=4665

[رفحاوي]

اخوي / الجنرال

اشكرك على التوضيح
ويا اخوان تروها امانة بعنق اي واحد
يعرف الحق وساكت ولا يوضح لنا هنا

اذا كان الموضوع فيه ظلم على المجاهدين
واجب على كل من يعرف الحقيقة ان يكتبها
فهذه امانة واظهار حق يجب ان توضحوه

[أبو القلاقل]

لا شكر على واجب اخوي رفحاوي
وانا ابو القلاقل كاتب التوضيح والجوال يستاهل الشكر
احببت ان اوضح انه ليست الصوره بهذه السوداويه جدا وان كانت لاتخل من اخطاء ولكن الناس عندنا لا يتجاوبون الا بعد ان سمعوا
والكل اصبح يحافظ على ( العلمه ) فيتكلم معهم بادب
انا اعرف شخصين في حادثتين بينهما اكثر من شهر احدهما عمره فوق الثلاثين والاخر دون العشرين
تعاملوا معهم المجاهدين باسلوب طيب
لكن الحقيقه انهم هم ايضا طيبون