السلام عليكم ورحمة الله وبركاته
رد على ماكتبه الأخ رجل المهمات
اول شيء احب احييك واقول نورت المنتدى وحياك الله معنا ... رغم اني عضو جديد في هذا المنتدى
لكن احب اوضح لك بعض إنجازات (( المجاهدين )) في رفحاء

1- يوم من الأيام كان هناك شخص كبير بالسن كان طالع هو عائلته وعياله للبر على طريق زبالا ... سيارته صالون جمس ... وقفته دورية المجاهدين وطلبوا منه الإثبات وأوراق السيارة ... وبعد ماتأكدوا من هويته وإستمارة السيارة ... قالوا له نبغى نفتش السيارة !!
قالهم وشلون تفتشون السيارة وانا معي عائلة ... قاله العسكري انزل مو شغلك ... فتشوا السيارة بعد مانزلوا العائلة منها ...
أقسم بالله العظيم ... ان ابو العائلة ركبوه معهم بالجيب ... واللي يسوق في العائلة واحد من المجاهدين ... !!!

2- واحد شريطي سيارات من أهل رفحاء ... وقفوه المجاهدين بالشارع الأصفر ومعه زوجته ... نزل عسكري واحد والثاني جالس بالجيب ... قاله العسكري اللي نزل وين لوحات السيارة ... ؟
قاله السيارة جديدة واليوم الصباح طلعتها من المعرض وإذا منت صدقني امش معي للمعرض الحين وتلقى الاوراق عندهم ... المهم كلمة بكلمة
العسكري ضرب الشخص هذا قدام زوجته وقاله ضف وجهك !!!!
وراح العسكري يبغى يركب الجيب ... ناداه المواطن وقاله ياخي انت بأي حق تمد يدك علي !!؟
العسكري الثاني اللي جالس بالجيب سمع الكلام هذا ونزل وقاله بالحرف الواحد : لا بعد لك عين تكلم ... وضربه الكف الثاني !!!

3- واحد مواطن من اهل رفحاء ... معاه ددسن قرنبع يالله توديه وتجيبه للدوام ... صار معه حادث مروري مع احدى دوريات المجاهدين ... والخطأ كان على دورية المجاهدين قالوا له راجعنا بكرا بالدائرة ... المهم رجال من بكرا جاهم وكان رد احد المسئولين عليه :
اسمع يا حبيبي اذا تبغى تصلح سيارتك لا تراجعنا !!
رح لنايف بن عبدالعزيز خله يصلح سيارتك !!!!!

4- المجاهدين مسكوا شخص عمره 17 سنه ... وهذه الحادثة شفتها بأم عيني ... والسبب انه كان جالس قدام بيته ... رحت ابغى اشوف وش سالفته لما جيت الدائرة ... لقيته مكلبشينه في حامي الشباك
وقاله واحد من المجاهدين إضحك ... والمسكين وش يسوي ماباليد حيلة ... ماد كشرته والعسكري الثاني يصوره .... !!!! هذا من غير التكفيخ اللي جاه .

5- واحد من عيال عمي ... انسان ملتزم ... وقفته دورية المجاهدين وقالوا له اثباتك ... عطاهم الاثبات ... قالوا له استمارة السيارة
الرجال كان توه جاي من الرياض ويعرف من هم المجاهدين ؟ وش لهم وش عليهم ... قالهم ياخي وش ذا التعقيد ... قاله العسكري عطني الاستمارة لا العن والديك !!! والله العظيم هذا اللي صار
يقول نزلت ورديت عليه ... يقول لحظه والا دوريات المجاهدين كلها موجودة ... يقول استخدموا كل وسائل العنف معي ... سبع اشخاص على شخص واحد ... يقول ركبوني بالجيب بالقوة ... من مشينا وهم يضربوني ... ويقول فيه واحد منهم كان ماسك لحيتي ويقول :
لعنبوا ذا اللحية !!!!
يقول دخلنا الدائرة ... وكان فيه عسكر جالسين في بيت الشعر اللي بالحوش ... يقول اول ماشافوني قاموا كلهم ... والله لا يوريك ضرب في ضرب ... وهم مايعرفون وش السالفة ... واللي يقهر صحيح ان المناوب ذيك الليله جاء وقالهم ياشباب اللي تسونه مايصير مو كذا ... يقول انا لما سمعت كلامه نزلت يديني اللي كنت محتمي فيهن ... يقول فجأة الا والرجال مد رجله علي وبالوجه ... شوفوا إنجازات المجاهدين في رفحاء.

6- واحد من اهل رفحاء اعرفه زين ... غاب ابنه عن البيت لمدة يومين ... مايدري وين ولده ... اللي يذكره ان ولده طلع بالسيارة بس هذا اللي يعرفه بعد ثلاثة ايام لقى سيارة ولده بالسوق ... وقف .. الا وفيها شخص عسكري من افراد المجاهدين قاله هذه سيارة ولدي وين ولدي ؟ قاله العسكري ولدك موجود عندنا اتبعني !!!
المهم لما وصل للدائرة سلموه ولده واعطوه مفاتيح السيارة ... كذا هذا اللي صار والمسكين مايدري وش يسوي .!!!!

7- قدام محل كاظم العراقي اللي بالسوق ... جيب المجاهدين واقف قدامه بالضبط ... والجيب الثاني واقف بجنبه ... سادين الطريق وعددهم بالضبط اربعة ... وعيونهم للبنات اللي تمر ... يعني غزل عينك عينك .



احب اقولك يا اخي الكريم ... ( رجل المهمات ) ان المجاهدين في رفحاء سيئاتهم اكثر بكثير من حسناتهم .... والكل تضرر منهم واسأل اي مواطن في رفحاء عن سمعة المجاهدين في رفحاء .... رغم ان لهم حسنات ورغم ان هناك اشخاص من منسوبي المجاهدين في رفحاء اكن لهم كل احترام وتقدير وهم
الاخ ناصر الباز
والاخ سعد السبيعي
والاخ علي العتيبي
والاخ فهد السدحان
لهم تحية ... والله يعطيهم الف عافية ... الا ان هناك مجموعة من الجحلط ماادري من وين جايبينهم مايعرفون الا العنف ولا غير العنف .

في الختام اكرر ترحيبي بك واقول حياك الله معانا وتواجدك معنا .
واحب تنقل الرسالة لجميع منسوبي المجاهدين في رفحاء ... وتقولهم ان اهل رفحاء يرحبون فيكم ... ويقولون حياكم الله ... ومافي شيء احسن من الأمن والأمان
لكن اذا وصلت السالفة للإهانة والذل ... لا والف لا
لن نرضا بالذل ..... لن نرضا بالذل .... لن نرضا بالذل .