للاستمرار بالمقاطعه . . . طريقة صنع الزبادي بالمنزل ::: وفروا يامال الغنيمة ( ~ ~

[عروووبة]

طبعا اليوم الزمت وزارة التجارة
الصافى والمراعي
أنهم يرجعون الاسعار زي ماكانت

عاد اللى يبي يشري منهم كيفه افرجت عنهم
بس بشرط على السعر القديم

واللى يبي يستمر معي على المقاطعه
حياه الله
ابى اصل الى 5 ريالات وخير وبركه
.
.
المهم

اليوم أبى أقولكم طريقه بسيطة وتوفر لكم وهي (( صنع الزبادي أو الروب بالبيت ))

ومابها شي أن كان الواحد فسر عن ذرعانه وسواها مفاجأه لزوجته ووغدانه
اصلا يصير بطل . . . يصير مثل جد هايدي طير شلوى اللى حتى الجبن يسويه

المطلوب
1- حليب بودرة ( امى تستخدم نيدو عاد انتم شوفوا منتج رخيص وجربوا )
2- كمية من الماء
3- ملعقة زبادي عادي ( بس لاتجيبون من الصافي ولا المراعي )
4- انتهت الطلبات

الطريقة:
كأنك تسوى حليب نيدو ( كل كوب له 3 ملاعق حليب ) طبعا مابو سكر
توضع على النار حتى تفور
توضع على جنب حتى يصبح الحليب فاتر ( يعنى اغرف بكاسة وحط اصبعك فيه أن تحملت حرارته ;,ds )
تضيف له ملعقة الزبادي وتخوضه بملعقه
ثم تغطيه ببطانية أو منشفه ثقيلة
لكن إن كان المطبخ حار فمالها داعي
يترك حتى يخمر وقد يصل الى 9 او 10 ساعات
ثم بعد مايخثر يوضع بالثلاجه
عاد تبون تتركونه بقدره ولا تغرفونه بعلب ( موجوده حلب بلاستيك لها طبايق )

أمي كانت تسوي بقدر وتحطه بالثلاجة . . يعنى حق أسبوع تقريبا
.
.
وهنا انعم بزبادي بيتي لامثله ولابعد يصير مثله
بلا مراعي بلا صافى

[شامي الدهيمان]

عرووووووووووبة

ابشرك غرموووووهم ورجعوا السعر الاول

[عروووبة]

أول مره بحياتي اخطي بالاملاء

وين همام افزع ضبط العنوان ( يامل خلها - يامال ) ولك قدر زبادي

[عروووبة]

عرووووووووووبة

ابشرك غرموووووهم ورجعوا السعر الاول

بشروك بالجنة
لكن . .ابو نوف ماودي اجيب العيد

ودي تكون هجمة مرتده
عقابا لهم وردعا لأمثالهم
.

[ريانه]

الشيف عروبه العالم

[همّام]

ما شاء الله

شكرا لك أختي عروبة

[أرطبون العرب]

هههههههههههههههه
ما اسرعهم ماتراجعوا كله من توجيهاتك

[شمـــاليه]

من طلعت الدنيا وحنا نزين الزبادي بالبيت
الله يعافيك عروبه ماقصرتي
لاهنتي

[الحارس الذكي]

طريقه حلوه ..

و شكرا لكِ عروووبه قائدة الثوره

[ابو متعب]

أكاد أجزم ان 99 بالمئة من نساء اليوم وحتى نساء امس القريب لا يعرفن هالطريقة
اذكر ايام حرب الخليج الاولى عام 90 كانت الوالدة الله يحفظها تسوي روب من لبن الغنم سبحان الله ولا ألذ منه لكن كنا ايامها بدو ولا احدن يروح للمدينة الا بالشهر مرة فكنا مجبرين على التعايش والتكيف مع واقعنا كنا مجموعة بدو ع الحدود واجبرونا قوات التحالف وحرس الحدود على الرحيل فوق البيب بمسافة وكنا زعلانين ليه يطلعونا من الربيع والخير ما ندري اننا بمسرح العمليات وحنا أخر من يعلم ههه
ايام جميلة عرووووبه راحت بخيرها وخيرها كيف ننام من المغرب ما ادري كيف الوكاد قبل زقزقة العصافير وانا سارح بالغنم على الفياض اللي فيها عشب اكثر وكنت أطل مع المرتفعات اشوف انا ابعدت عن اهلي هههه
لكن حدث تحول فسيولوجي ادى لاستيطان المدينة وتركنا لحياة الحل والترحال والحمد لله على كل حال اما لو اني مع الغنمات لحد الآن بس بشرط ابي لاب توب واتصال سريع وما عندي مشكلة الخبرة موجودهـ

[ابومحمدالزوبعي]

طريقة جميلة وسهلة
لكن لو حسبنا سعر النيدو راح يطلع علينا سعر الزبادي مدبول عن سعر السوووووق هههههههه

يا ملا الجنة ياجدتي تذكرته يوم تسوي لنا روب

لكن عندي سوآل والجائزة من عرووبة من هو الذي يعرف ( الخثره ) وماهي ؟

[بصمة مبدع]

طريقه حلوه


بس اشتري اريح لي <<< متعاجز

[عقارب]

عروووووبه انتي كذا تسوين دعايه للنيدو عشان يرتفع سعره ....خخخخ



وتري الغنم احسن من النيدووووو بس انتن يالحريم تتعاجزن تروحن تحلبن





بس شفي الي ملون بالاحمر انتبهي ثاني مره

موجوده حلب بلاستيك لها طبايق

[عروووبة]

الشيف عروبه العالم

بالخدمه
عاد صنع البقل او الاقط
عليك

[عروووبة]

ما شاء الله

شكرا لك أختي عروبة

العفو
وشكرا لسرعة الاستجابه بتعديل العنوان