أربع سنين ودمعتي فوق خدّي
دايم ودمعي فوق خدّي هماليل

ما فيه يومن فيه ما زاد وجدي
ولا فيه يومن ما نواجه بهاذيل

با سباب من فتت فؤادي وكبدي
ظبي الفلا راع الرموش المظاليل

أبو ردوفن مثل طعس التحدّي
وجدايله لا فلّها كنها الليل

عليه حالي والفؤاد إمتردّي
أنا اشهد أنه يا بدر فتنة الجيل

رغم القرابة بين جدّه وجدّي
خلاني أجرع من عنا الحب واشيل

بذلت له روحي ومالي وجهدي
وأقفا ولا جتني ردود ومراسيل

عيّوا بها عني وأنا فيه ودّي
وعطوه خبلن ذاهل العقل بهليل

عقب التصبّر والجلد باح سدّي
ما عاد بي حيله ولا عاد بي حيل