اخو جديد.. هل من مرحب او(عاااازم)

[اخيذة ضحى]

السلاااااااام عليكم ورحمة الله وبركااااااااته
اخوكم جديد مسير عليكم واذا جاز له الوضع بيسكن عندكم؟؟؟؟؟؟؟؟؟؟
ابجااوب قبل تسالون شمعنى اخيذة ضحى::::
يعني ماراح تشوفوني الا الضحى……. احوف الموقع حوووف
طبعا احس اني مثقف وفاهم بجميع المجالات ……….
والضحويااات كثار وتثبت للي (ناااااااقد)….
المهم رحبو وهلللللللوبي

[الملك الضليل]

السلام عليكم ورحمة الله وبركاته....
اصالة عن نفسي ونيابة عن اخواني اعضاء المنتدى..نقول لك اهلاً وسهلاً بك في كل وقت..انت نبضات قلبي ودمعة عيني

أخوك/ الذيب الاحمر

[اخيذة ضحى]

اسمع يالذيب .. المشكلة ان ردي عليك ماهو الضَحى !! - غريبة ماهي لي عادة !! - يعني على قولتهم : ياذيب انا بوصيك لاتاكل الذيب ( الاحمر )
انا وقت الضحىعلى قولتهم : عوى الذئب ( الأحمر ) فاستأنست بالذئب ( الأحمر ) إذ عوى ..
يعني ( سلِمت ) .. ياذييييييييييييب .. أووووووووو
أنا يا اخوان تجيني حاله وقت الضحى غير طبيعية ( أتورشع ) اللي قدامي
و ( تخبو ) هالثورة عقب الضحى إلى بكرى الضحى ..
وتروني يالربع ( فرد حمزة ) ثاير ثاير .. اللي قدامي الله العالم انه ماخوذ .. ما قلت لكم اني ( اخيذة ضحى ) فانتبهوا ولا تزعلون ..
بعدين الله يهداك يا ذيب حنا قلنا ترحيب و ( عزيمة ) أشوفك بس رحبت .. الاّ إذا ( نفح الطيب ) ولا ( الشمالي ) يبون يذبحون ماعندي مانع بس ياليت يكون ( التقليط ) الضحى علشان ( أتورشع ) الذبيحة ، ولا يكون بكرى ، لأن بكرى الناس صيام ..

[همّام]

وعليكم السلام ورحمة الله وبركاته
حياك الله ومرحبا فيك
وان شاء الله تسكن وترتاح . والعزيمه ضروريه لا زم تمالحنا حتى نأمن
والضحويات بيننا وهلا فيك .

[رهج السنابك]

الله يحييك
هلا هلا هلا وغلا وغلا وغلا

يامررحبااااااااااااااااااا

سويلفات الضحى خابرها لعجايز حارتنا

وبعد الله يهديك في احد ياكل الذبايح الضحى

[دمعة]

وعليكم السلام ورحمة الله وبركاته

حياك الله
وننتظر مشاركاتك المفيدة

[الأصيله]

هلا اخيذة ضحى
نرحب فيك بمنتداك
وتستاهل العزيمه وانا باخبز الرغايف بس بشرط ضحى الخميس على شان الدراسه
ونستنا مشاركاتك

[الدب الداشر]

هلالا والله حجي خيذة ضحى
حياك الله وبياك بيننا بالمنتدى العزيز
وأن شاء الله تفيدنا ونفيدك

[الحلوه أم قصه]

يا هلا وسهلا فيك معنا في المنتدى واحنا بإنتظار مشاركاتك

[اخيذة ضحى]

يا سعادة المشرف " همام " عز الله لو ماني ذالّ انك ( تقرشعن ) من هالمنتدى كان غزيت عليك .. هالحين طال عمرك حنا معتبرينك ( معزّبنا ) بهالمنتدى ، وانت اللي أول من يذبح .. وسالفة الضحويات اللي انت تقول .. سالفته مطوّلة .. لكن حق الشرهة أنا أبي منك حاجتين ومثلك يعطي ومثلي استاهل ..
الاولى : تحطون بجنب اسمي : عضو متميز جداً
الثانية : بيني وبينك



إذا عندك









سلف !!!!!!!!!!؟blushing



البنيّاخي ( رهج السنابك ) الله يهديك .. الحين انت اللي تبي تاكل الذبيحة ولاّ أنا ؟ سلمك الله لو تقلّطونه الفجور قلطت عليه .. بس انت انجز اذبح ..
بعدين أفا أفا يارهج السنابك أنا أول معتبرك ( طير شلوى ) المنتدى .. والحين تقول لي سويلفاتك مثل سويلفات العجايز ..
وانت وش درّاك بسويلفاتهن ؟ .. يا حيف .. ياحيف !! الله العالم شوف عيني انك هالضحويات متربّعن بوسط العِجْز ..
لكن أنا ابي اشير عليك ..
أخبر لي شبّة شيبان .. أتوسط لك عندهم تصير معهم .. بس بشرطين ..
الاول : انت اللي تقهويهم ، وتاقف فوق روسهم ياما يخلصون .. يعني ...؟
الثاني : ما تغالطهم ..أبد أبد .. لأن كلامهم – بنظرهم طبعا – هو الصح .. وبكلامك انت – بنظرهم طبعاً – ماعندك سالفة ..!!؟؟



خالتي " دمعة " هالحين حاطتن تعليق على ( الماضوع ) منشان ترحبين بس .. من دون عزيمة .. ومسوّيةٍ اتصال علشان هالكلمتين .. ومخسرتن روحك هالريالين بس هلّون .. وتنتظرين مشاركاتي بعد !!
وشّي مشاركاته ؟ وانا ياهالحين ما مالحت أحد منكم ..
وبعدين صورة ها ا ا( الدّب ) اللي انت حاطته وش كنّه .. حطي صورة خروف أو تيس أو على أقل تقدير دجاجة .. على الأقل الواحد ياكل بعينه مثل ما يقولون ،، وما اقول ألاّ ... واغداءاه ..
ويا ونتن ونيتها من خوى الراس .. من لاعج الجوع اللذي صاب بطني ..



عمتي " الاصيلة " اشوا .. أشوا يوم حصّلنا هالرغفان .. العوض ولا القطيعة ..
آه لقد رميت الكرة في ملعب الشنبات ..
لكن أنا عندي حل لهم وها ( الاقتراح ) الزين يمكن إنه يفيد ومنه نستفيد ..
انا أقول يا الاصيلة .. ولا يهونون الربع
...........
نسوّي ( قطّيّة ) من ( ميّة ) كل شهر على كل واحد مشترك بهالمنتدى .. وياخذ الفلوس كل راس شهر واحدٍ منا يا الاعضاء ، وتدور علينا كلّنا ..
وبما اني صاحب الاقتراح ( الشحذوي ) هذا فالقطية أول مرة لي ..
لكن أنا أبي أعلمكم منشان ما تقولون اخيذة ضحى أوخذبنا وخذا فلوسنا .. أقول لكم إني الظاهر ماني مبطي بهالمنتدى .. يمكن شهرين .. ونروح ندور لنا مسجد ! آآ أقصد منتدى ثاني .. نترزّق الله ..
إذا وافقتوا علموني أحط رقم حسابي ..




" الدب الداشر " الله يهديك هذا بالله اسم تدخل به للمنتدى ضاقت الاسامي ألا هالاسم ، وبعدين شكلك من اسمك إذا عزموني الرّبع على غدا !! غدا؟ ياحسرة .. المهم إذا عزموني شكلك تبي تضايقن على الصحن ..


" الحلوة أم قصة " ماش طلعت الاصيلة أطيب .. وبعدين الأسامي هذي منين تجيبونهن الله يهديكم .. بس اسم الحلوة حلو ، بس انا عندي حاجات ودي أقوله لكن غير وقت الضحى أكون بالعادة دايخ .. دايخ !؟؟ الله يستر لا يقولون الجماعة بكرى انت اللي يكتب باسم ( دايخ ).. تروني ما أعرفه ولا يعرفن ، وبعدين هو أكثر كتاباته بالليل ..

[رفحاوي]

السلام عليكم ورحمة الله وبركاته ...

الاخ / اخيذة ضحى ...

يا هلا ومرحبا واسفرت وانورت رفحاء بشوفتك و صراحة فشلونا الربع معك ، الغداء باسر عندي انت والذيب الاحمر وباقي المنتدى ( ممنوع اصطحاب وزراء الداخلية ).

معنى اخيذة ضحى ان الناس يغزى عليهم الضحى وهذا يدل على قوة الغازي وضعف وهوان المغزي عليه . ويبلغ الغازي قوته عندما يقيم الضحى بارض المغزي عليه مثل ما هو حاصل من امريكا بالعراق والسعودية . الشاعر ابو زويد ( شمري) يمدح ابن شعلان بالشجاعة فرد عليه شاعر رويلي يسبه ويتهمه انه شاعر غير عادل وان ما يستحق المدح هو ابن رشيد الذي لا يخاف من اعدائه ( مقيم الضحى للمنهزم وش يجيبه ) يقصد ما فيه مجال للمقارنة بين الشجاع ( مقيم الضحى ) والانسان الخايف ( المنهزم ) . صراحة طولت بالمعنى واتمنى ان كلامي مفهوم.

بعدين ما علمتنا من وين ؟ انت من السعودية والا من الحدود؟ صراحة يوم ذكرت الفلوس توقعت انك من ربعنا اللي بالجزيرة (المكان مهو القناة وانتم بكرامة).

عندي كلام كثير بس اخاف عليكم من السكر .

اخوكم / رفحاوي

[الفيلسوف]

اخوي اخيذذذذذة والله انك خيذة صدق
المهم انت بلشة الي يعزمك او يترك.......
الوكاد ابشرر بقعود باكر بس الفجر مو الضحى لاني اداااااوم
بدري :::::::: والخميس انت معززززوم على خبز صااااااج

[رهج السنابك]

شكلك ماتعرف الفرامل

اول مرة امزح مع احد بالمنتدى وظنها اخر مرة معك

حياك الله واخشى ان يأتي اليوم الذي لا تجد فيه من يرد عليك اتقاء "تورشعك"

الذبايح عند اهلها

والناس اليوم من الحمص والمتبل وجاي

مثل مانت عارف الرواتب ماتلحق

[اخيذة ضحى]

يالسنافي " رفحاوي " ياخوي لا تكلم بالسياسة ، خلنا بـ : فن الطبخ ، وطرق النفخ ، واستراتيجية تربية الأغنام ، وأبحاث زراعة الجزر في وقت الخريف ، وعمل جدوى اقتصادية لمشروعات محلات ( أبو ريالين ) ، والطريقة المثلى لقتل بريعصيين معاً بضربة زنّوبة واحدة.. وغيرها من ( الماضوعات ) المثمرة و .. الآمنة ..
وعندي كلام كثير ودي أقوله .. بس بعدين !

يا " الفيلسوف " من قريت اسمك ما ارتحت .. ومن كبرت عزيمتك دريت اننا مفلسين .. وبعدين اقترح عليك .. تترك المنتدى تدري ليه ؟ لأن ودي لحالي بالمنتدى .. فلو تترك المنتدى وتعلم هاللي يكتبون تكون فاتحة خير لي ..

صديقي اللدود وعدوي العزيز " رهج السنابك " اسمع نبي نسوي أنا وانت اتفاقية للدفاع المشترك ، وذلك لصد هجمات المتربصين ..
وبعدين إذا سالفة الراتب هي اللي لادّتن هالناس عن العزيمة .. الحل بسيط ..
ننتظر هالرويتب ياما يجي .. وأبد .. لا تشيل هم .. انت أول استعزم له ..
ولحظة !! وشّي سالفة : يجي يوم ماحد يرد علي ! يا خوي حنا قلنا ما نبي أحد يرد الحين .. الحين نبي نمالحكم ونتعرف عليكم ! ألا على طاري نتعرف عليكم .. أرسل لي اسمك برسالة خاصة هاليومين .. وأنا ارسل لك اسمي وصورتي وصورة من بطاقة الأحوال وصورة من شهادة الميلاد ، وتعريف من حضرة جناب العمدِه ، كلهن السنة الجاية .. كان الله أحيانا وما صار بالامور شين ..

[دايخ]

أخيذة ضحى:
آآآسف جدا على التأخر بالترحيب والمعذرة لأني نزلت على قولتك (ماضوع) وزباينه كثار ويبي له ردود وشغل. والسبب الاخر واللي يتبعه اني ما عندي جهاز وكل شغلي من مقاهي والا عند زقرتي من الربع ما يقصر . وهذا سبب التأخير بالترحيب .
نكون اكثر صراحة يا حبيبي والله انت شكلك على اسمك وكتاباتك (تخرع) .
الا وش رايك تقلط عندي وانا اول من يعزمك ولاني مكبره علشان ما تقول (لا كبرت هانت) . غدين خاص من طبح المدام ام دوخان هذا اسم الولد بعد اقل من شهرين ان شاء الله.

ولا تحسبن ابي فزعة منك علشان ما تقول (بخشيش). بس مجرد ترحيب وعاد اذا تغدينا نتفق على كل شي.

عزالله انك اخيذة ضحى