من هالسنين الأوله قبل الأزمه حصلتي تغريزتين الأوله حول لوقه والثانيه ماهي بعيده عن رفحا بس أكود من الاوله وأنا أنخش خشه ماأنساه طول ماني عايش وكله منزين الحظ وصرت ليا جاء الشتاء أتغربل لياساعتنى هذي وجلست ثلاث سنين وكل سنه بالبرد أردى من اللي عقبه ويوم الله قسم وأنوي أكوي عند أم سعود الله يجعل يديه مايطبن النار ويرضى عليه ويغنيه دنيا وأخرة وهي تكوينن بله خلال خمس مكاوي بظهري وحجبتن عن الحليب والجبن واللحم وقالت لا يشفك الهواء وأدف حالك وأنا أنام هكا الليله بمحلي بالديوانيه وأتغطى بلحاف ويوم وعيت الصبح لياهاذي العافيه يمار تقول لي سنه ماشربت الما عطشان وحلقي يابس وأوجس العافيه بس لثلاث أيام ويجون الخوياء هكا الليله ويغصبوني أقنص معهم وأعلمهم يمار ماحولي أحد وكذبت عليهم وقلت ماعندي فراش البر وجابولي واحد ويوم شاء العزيز وأنا أنهج وهكا الليله نذبح طلي وناكل حميسه وأنا أنام وبالمربعانيه وقتنى ويوم وعيت الصبح ليمار راجعلي بلاي بس أهون من أول وحنا نهد الطير هكا اليوم ونصيد حبارى ونضيع الثانيه ونستانس بس متغربل لياهالحين ورجعت وكويت بس مافيه فايد ليا هالحين عسى الله يكون بالعون والحاصل أنك ماودك تغصب الرفيق ولا ودك الواحد يقول يارجل عساك سالم