الديربي المنتظر وحكاية من الزمن الجميل

[نـازف]

مدخل :



حان وقت السفر والعين عيت تنام ,, ول يالصيف كم فرق محب وحبيبه





كانت الإجازة الصيفية أيام زمان مامن أحلى منه وكانت رفحاء ماتنمل في العطله

ولاكنا نعرف سفر ولاسياحه وخرابيط ,, المهم اذكر ان جدولنا مزدحم بالفعاليات

والبرامج الترفيهيه ( نبيطات وسياكل وقلول وعظيم ضاح ) !!

وولد النعمة هذا حكايته حكايه تحصل عنده أتاري ومايطلع مثلنا بالشموس ,,

واللي من الجيل التالي ولايعرف الأتاري يطالع للصورة اللي تحت







أيييه يازين زمان أول !! زمان الرجال والأتاري مو زمان البلاستيشن اللي ماتقدر تنطق حتى أسمها

على طاري الأتاري تخبرون هاللعبه









لعبة الطيارات ويامنه فضى البانزين وقربت تنفجر الطياره >> أنواع حرق الأعصاب خخخ




كل هذه الفعاليات السابقه بما فيها من متعه ماتساوي شي عند عشقنا الأبدي والأزلي ( كرة القدم ) .

وفي يوم من الأيام حدثت مشاجرة عنيفه بيننا وبين الحارة اللي بجنبنا وأنتهت

الهوشة بسلام بعد أن إتفق زعيما الحارتين على إقامة مباراة مفصليه والفائز بها

سيتوج كزعيم للحارات المجاورة أجمع ,, المهم المباراة تأجلت أكثر من مره لعدة أسباب !!

منها أن كل فريق حارة كان ينتظر قدوم لاعبين من أقاربهم من خارج رفحاء واللي يجون

عشان يقضون الصيفيه برفحاء .. اللي من الحفر واللي من عرعر وهلم جررا !!

وينك عاد ياللي عنده أقارب من الرياض والكويت تلقاه مايشوف بعينه أحد ويهايط بالتحدي

ويقول جاكم شبيه ماجد عبدالله والنعيمه وجاكم جاسم يعقوب وفيصل الدخيل وفتحي كميل

أما السبب الأهم لتأجيل المباراة فهو أننا كنا مختلفين على الطقوم >> الله واكبر عاد وش هالطقوم

عاد اللي يسمع هالكلمه بالذات يقول كلش عاد ياطقم البرازيل والأرجنتين ..!

الطقم أو اللبس ياسادة ياكرام يامن تسمعون هذه الحكاية ومتحمسين لما تؤول

له المباراة كان عبارة عن ثياب بس >> لا و تهفهف ماتحتها شين أبد !!

ايه يادنيا يازين طقومنا أول والبراد الي ماتدري من وين يجيك ويهفهف عليك !!

لا ويامنه قام يقوطر خشمك تمشه بالردن >> اللي هو الكم وترى عادي لو لقيت
كم ثوبك ميبس وصايرن تقل كرتون خخخ!!

المهم أتفقنا مع الفريق الثاني أنو فريق يلبس ثياب شتوية (ملونه) وفريق يلبس ثياب

صيفيه (بيضاء) >> وركزوا على النقطة هذي لأنها ستكون محور حديث قادم !!

ودقينا القرعة وطلعت لهم الثياب الشتويه ( آوم القهر ) حضهم حتى القرعه معهم !!

لأننا كنا في عز الصيف نتمنى نلبس الثياب الشتويه تدرون ليش ؟؟

لأنها أستر وأوجه قدام الناس ومايبين شي تحت الثوب يامنك طحت لكن الحظ معهم




فاصل إعلاني :





هذه المباراة برعاية





( شكليط أبو كوره )

أبو كوره مش حتئدر تؤف سعابيلك



الموزع الوحيد بقالة حارتنا



المهم ان المباراة بدت ولعبنا بهم لعب وحسنا مرير مريرهم وكان أطلق لاعب بفريقنا

اسمه ( صطمبه ) وكان محد يقدر يوقف بوجهه عشان أظافر رجلينه طوال

وكان الوحيد في العالم كله اللي يشوت البلنتي وهو معطي ظهره للحارس !!

المهم إن المباراة قبست وبلغت قمة الإثاره والندية وصار فيها أهداف واجد

ومع كل هجمه منصلقه << ( مرتده يعني ) ماتشوف اللاعبين من العجاج والغبره والريغا

وكل شوي يطلع واحد من الريغا والغبره ويطامر رافعن يدينه ويقول جبت هدف !!

ولأن الحكم مايشوف هالمعمعه فهو مايحسب الهدف الا بعد مايحلف اللاعب

ويقسم أنه جاب هدف وان الكورة تعدت الخط خخخخ

المهم انتهت المباراة المثيرة وفزنا عليهم ودقينا خشومهم دق وكمكافئة لنا من

عضو شرف فريقنا اللي هو راعي البقاله ( مدحس ) فقد قرر إعطائنا مرندا وببسي وشاني مجاناً

وفتح لنا ثلاجة المشروبات






أما كبتن فريقنا وزعيم الحاره فقد قرر إنه يودينا بسيارة أخوه يم المسبح !!

طبعاً المسبح الوحيد المتوفر وقتها هو ( بركة مزرعة الشهري على طريق الغنم )

المهم علقنا ثيابنا ويازين ثيابنا الأوله ( الصينيه ) مايحتاج تعلقه بمعلاق

تفصخ الثوب وتقطه وهو ينتصب واقف مثل الخيمه ( بلا والله من اليباس والخياس اللي مكوم بها )

ويوم خلصنا سباحه قمنا لبسنا ثيابنا اللي واقفه تحترينا !! وتفاجئنا يوم رجعنا للحارة

انهم مقدمين إحتجاج علينا علشان ثوب لاعبنا ( الصطمبه ) كان شتوي وهم طقمهم من

الأساس كان عبارة عن ثياب شتويه ..

والحقيقة أنه لابس ثوب أبيض بس من زود الوصاخه والمناشق والمش صايرن تقل شتوي الله يقرفه !!

ويوم شفنا الصياح قابلناه بصياح حنا بعد وأحتجينا على هدفهم ( السبعطعش )

لأن الكوره أصلاً طالعه برى وحلف لاعبهم أنها داخل وحسبها الحكم هدف لهم ..

المهم رفعوا إحتجاجهم لـ ( نعيس القانوني) ونعيس هذا أطلق واحد برفحاء يعرف القانون الكروي !!

وجمعنا نعيس القانوني صاحب كتاب ( النية في كرة القدم مطيه )

وقال : قبول الإحتجاج يعتمد على نية لاعبكم ( الصطمبه ) قلناله : وشلون يعني ياخبير القانون !!

قال : اذا كان لابس هالثوب الوسخ علشان يموُه على الفريق الثاني ويصير ثوبه تقل شتوي

ففي هالحاله راح يقبل الإحتجاج ..! اما اذا كان ماعنده غير هالثوب فهنا راح يصير كلام ثاني ..!

المهم جبنا ( الصطمبه ) وحلف لهم يمين ان ماعنده غير هالثوب وان غسالتهم خربانه !!

المهم قال (نعيس القانوني ) لازم أتأكد هو صادق والا ( لا ) أبروح أشوف غسالتهم !!

المهم غسالتهم صحيح كانت خربانه لكن يلعنبوه الحظ !! يوم جاء ( نعيس ) يشوفه اشتغلت بنت الذين !!

وتعرفون غسالات الأوليين مالها خاتمه تشتغل بالنيه زي قانون نعيس !!

وقال نعيس : إحتجاجهم مقبول ..! رفضنا هذا القرار المجحف وقررنا إننا نرفع

تظلم لإمارة رفحاء على هدفهم ( السبعطعش ) لأن الكوره طلعت برى الخط !!

ورحنا للإماره وطلعولنا (مري) يقص أثر الكوره وقرر المري إن الكوره فعلاً طالعه برى خط التماس

قبل لايسجلون وكتبلنا ( المري ) تقرير يثبت هالشي وقلنا لنعيس : والله لو ماترجع عن

قرارك


وتثبت لنا النتيجه أننا نبي نرفع تقرير ( المري ) للإتحاد الدولي لكرة القدم

_____________________________________

الحلقة القادمة

_ماذا فعل نعيس القانوني بعدما علم بإحتجاجنا ؟

_ ماذا قرر الإتحاد الدولي

_ ردة فعل الجماهير

_ لقينا إحتجاج جديد وهو إنه واحد منهم لابس كنادر

_ المري هو قصاص الأثر


__________________________________




مخرج :


حبيتك في الصيف حبيتك في الشتي



يالعنبوها أغاني أول وحتى ذوقنا تغير عقب ابن سعيد قمنا نسمع فيروز !!




قالت أم نازف


الحظ يامنه أستقعدلك .. وش يفكك منه ياوليدي



انحش

[الزعيم]

جميل يانازف ذكريات رائعة واحداث طريفه واسلوب شيق

رائع بكل حالاتك يانازف
وأسأل الله أن يحفظ لك ام نازف

[شدقم]

لله درك يانازف

إذا فيه واحد عند الاتاري القديمة وخاصة الي فيها الطيارات بس حدها أنا ابا اشتريها


زمن الأول لا حشيش ولا حبوب ولا هم يحزنون العربجي إلي يدخن هذا مجرم ولا يكثر التدخين لما يجون عرابجة الكويت

[

[مــــهــــا]

أوسع الله صدرك أخي نازف تسلسل وإنسياب فكري من وحي الواقع والذكريات الطفولية الجميلة...

جميل بحق أحييك أخي نازف وجعل الله التوفيق والإبداع حليفك.

[سعود الشمري]

ذكريات جميله


شكرا لك اخي نازف

[العالمي]

نازف

[الشمري عبدالملك]

شاكر وممتن لك اخي المتميز ( نازف )

حجزت لنا رحلة مجانية وخاطفة

الى ردهات ذاك الزمن الجميل .

اوووف اما ( الاتاري ) فالحديث عنها يطووووول .


بانتظار ( نعيس القانوني ) وملحقاته ..

تحياتي لك .

[ابومحمدالزوبعي]

يعطيك العافيه أخي الفاضل نازف الماضي شي جميل فقط لكونه ماضي والا الحياة الآن أفضل بكثير من حيث التطور في كل شي .....

[احمد الجري]

شكرا لك اخي نازف على هالصياغه الجميله واخذنا للماضي الجميل الذي يتميز ببساطته وعفويته ...
بأنتظار ابدعك المميز ...

[رفحاوي]

أضحك الله سنك أخي نازف ...
شوقتنا لتلك المباراة المثيرة ...
ما شاء الله وصف دقيق للزمن الغابر "المغبِّر" ...
بإنتظار رد الإتحاد الدولي والحلقة القادمة ...
لا تنس موضوع الثياب الصيفية ...
شكراً أخي نازف ...

[نـازف]

جميل يانازف ذكريات رائعة واحداث طريفه واسلوب شيق

رائع بكل حالاتك يانازف
وأسأل الله أن يحفظ لك ام نازف

اللهم أمين ويحفظ أمهاتنا وأمهات المسلمين
والأروع مرورك يازعيم وألف شكر على دعمك المتكرر

[نـازف]

لله درك يانازف

إذا فيه واحد عند الاتاري القديمة وخاصة الي فيها الطيارات بس حدها أنا ابا اشتريها


زمن الأول لا حشيش ولا حبوب ولا هم يحزنون العربجي إلي يدخن هذا مجرم ولا يكثر التدخين لما يجون عرابجة الكويت

[

حياك أخوي شدقم والأتاري موجوده عند مكتبة المنديل
ويعطيك معاها هدية طباشير الصقري وكتاب الخط حق ثاني جيم :d

[نـازف]

أهم شي أستانست أختنا الخلوقه مها ولاهي شايله علينا شي
ترى القلب حتى لو تكدر وعارض يوم لايغرك تراه أبيض من الثلج
حياك وبياك الفاضله مها
برايفت مها >> ليش نحتاس إذا أقتبسنا ردك

[عروووبة]

ماضي جميل
وله حكايات لاتنسى

وانا ادخل بالسوم على الاتاري
وخاصة هاللعبة


جزاك الله خير اخي نازف

[تربوي]

تسلم أخي نازف ..

ذكريات جميلة من الصعب نسيانها .و كثيرا ما نشتاق إليها..