سهرت حــتــى وردنـي تالـي الـليـل جــوال = وانا على شاهي وبسكـوت ديمـة

[رفحاوي]

سهرت حــتــى وردنـي تالـي الـليـل جــوال =

وانا على شاهي وبسكـوت ديمـة


الرقم بايخ لكـن الــصــوت قــتـال=

كنــه مثل صـوت المذيعـة حليمـة




قــالت مساء الخير يـا طيّـب الفـال =

قـلـت ارحــبـي تــرحيبـةٍ مستديمـة


بـالـعــود والصفـري ودلـة وفنجـال=

واجـبـك يا بنت الأصـول الكريمـة


وردت بضحكة ثم قالت وش الحـال؟=

قلت اشهد إن الحال عقبك سقيمـة


قالت وهي تضحك بعد مثل الأطفال =

وانـــا بـعـــد كــنــي بــدونـك يتيمـة


مـــن يـوم قـالـتهـا تزلزلـت زلـزال =

مــن فجعتي كنـي مسـوي جريمـة


قلت ارفعي صوتك ترى مابه ارسال =

كـــذاب لــكـنّ المصيبـة عظيمـة


قالت أقول اسمع ترى هرجنـا طـال =

مــمكـن تصاحبنـي ترانـي وسيمـة


واسمي الحقيقي أول حروفـه الـدال =

لــكـــن يسمّونـي البنـات الزعيمـة


صحيح أحب الفخفخة واعشق المال=

لكـن ترانـي طــاهــرة مستقيـمـة


ما عندي امغازل ولا( لعب يهّـال )=

ما عندي إلا في الشرف والحشيمـة


بس الصراحة قلبي لشوفتـك مـال =

واصبحت وحدك جالسٍ في صميمه


فكّر بعقلك واترك القيـل والقـال =

واحذر تطيع اهل العقـول العقيمـة


وارسل علي الحين خمسميـة ريـال =

أشحن بهـا جـوال أختـي غنيمـة


أو طقم غالي فيه خاتـم وسلسـال =

أروح بـه فـي عـرس ولاّ عزيمـة


قلت الحقيقة مانيب رجـل أعمـال=

ولانـي بتاجـر والمـوارد عديـمـة

أنا الصراحة شبـه عطّـال بطّـال=

وعلاقتـي بالفــقـــر جـداً حميـمـة

والراتب الله يرحم الحـال مـا زال=

محـدود والمصـروف ربـي عليمـه

والــديـن بـالآلاف والبنـك شغّـال=

يــاكـل فـلـوسـي بالربـا والظليمـة

والسوق طايح والغلا ضيّـق البـال=

والموت والله صايـر اكبـر غنيمـة

قالت تحمّل بـس والحمـل ينشـال=

خلك شديد الباس صلـب العزيمـة

ياخي تصرّف جعلك اتصيـر نشّـال=

أهـــــم شــي إن النوايـا سليـمـة

لابــد تـفـهمني علـى كـل الأحـوال=

ما دمت من أهل العقـول الفهيمـة

قلت إيه والله فاهم اللي على البـال=

لــكــن تــرى هـذي علينـا قديمـة

يــا بـنت هـذا صايـر اليـوم مـوال=

للي تبي تلعب علـى ابـن اللئيمـة

يا بـنــت ما تدرين كـم فيـه محتـال=

يلعب على الحبلين وانتـي غشيمـة

يا بنت كم من جاهلة دمعها سـال=

من عقب ما جات العواقب وخيمـة

والبنت لا اقتفى عرضها بيد الأنـذال=

والله مــا يــبـقـى لهـا أي قيـمـة

قالت تبي ولاّ فـ خـلّك علـى جـال=

مهوب ناقصـني نصايـح حكيمـة

عز الله إنك للأسف منـت رجّـال=

وانك قليل الذوق ما فيـك شيمـة

يا لعنبو اللي مـا يسطّـرك بنعـال=

حــتـى يـعـلمـك الغـزل يـا بهيمـة

( تفو ) عليك وصكّت الخط في الحال=

مدري ( تفو ) هي مدح ولاّ شتيمـة

[أبو هيا]

ههههههههههههههههههه
ههههههههههههههههههه

لا والله تفو من اشكالها مدح ولا الامداح<<<تورط بجمع مدح

بصراحه حرام الشاعر يبقى مجهول..هذا شاعر رهيب ورايق...ما اتوقع انه انت ياخالي والا كان قلت صح لسانك

[رفحاوي]

لا ما هي لي يالمملوح ...

ويا صارت ماهي لي ما تقول صح لسانك ...

مدري من هالشاعر جتن القصيدة عير العيميل العلكتروني ...

وش مدريك يمكن انه شاعر شريف وما يشحد ...

تر كلمة المدح تجي مفرد وجمع وتجي لو تبي فاعل ...

تذكرت شي ابي ادق عليك جهز الفاقس ...

[الـوايـلـي]

( تفو ) عليك وصكّت الخط في الحال=

مدري ( تفو ) هي مدح ولاّ شتيمـة

لاوالله الا اتفو ياخوك غربال & لو قال بعض الناس ماهي شتيمه

والا انت ردك يوم رديـت رجال & مـار الـبـنـيــه يالـبـنـاخـي لـئـيـمـه

بانـت خـوافـيها تـبي منكم المال & مـتـبـيـنـه ماهـي عـليـها ظـلـيـمــه

يالـيتـك مـطـفـي مـع النـور جــوال & مـاشـفـت رقم اللي تـسمى حـليـمـه

وكـثر السهر يـرث عـلامات بالحـال & لاصار ماكـولـك مـع الـشاي ديـمـه

تـحـمــدالله يــوم مـنـزلــك بـالـجــال & غـيـرك يـقـودنــه ســوات البـهـيـمـــه

بعـض الـنســاء شرن قديم(ن) ولازال& ويـلـزمــك تـــذبـح للـسلامـه ولـيـمــه

[رفحاوي]

صح لسانك اخوي الوايلي ...

ما شاء الله عليك إبداع متواصل وشعر راقي وهادف ...

بعض الحريم للأسف يهدمن البيت اللي يطبنه وبعضهن العكس ...

كالعادة مرور شاعري راقي ...

[أبو هيا]

صح لسانك اخوي الوايلي ...

ما شاء الله عليك إبداع متواصل وشعر راقي وهادف ...

بعض الحريم للأسف يهدمن البيت اللي يطبنه وبعضهن العكس ...

كالعادة مرور شاعري راقي ...

الى الاخ الكريم الوايلي/
انا قلت مدح قياسا على البيت الشهير
واذا اتتك مذمتي من ناقص(ن)&&&&فهي الشهادة لي بأني كامل

صح لسانك واعتلا شانك ولاهنت على اي حال..


الى الاخ والزميل ورفيق الدرب رفحاوي اللي يجرح ويداوي/
الرجال يقول يلزمك تذبح للسلامه وليمه
وانت ماغير تسب في هالحريم,,,على كذا بتجي الهنوف وتخليها ذبيحتين

[رفحاوي]

الى الاخ والزميل ورفيق الدرب رفحاوي اللي يجرح ويداوي/
الرجال يقول يلزمك تذبح للسلامه وليمه
وانت ماغير تسب في هالحريم,,,على كذا بتجي الهنوف وتخليها ذبيحتين

اتركك من الوايلي شكله انتحاري وعايف هالدنيا ...

بعدين لا تحط بحظك يا شين وتقول اني اسبهن ...

الهنوف شكله من النظام القديم اللي يجوز لي ...

[هرطمان]

اتركك من الوايلي شكله انتحاري وعايف هالدنيا ...

مساكم انوار وسرور

الوايلي عنده زوجتين لا تقردونه انت وحمود المملوح
هاذا وصح لسانك ولسان الوايلي وعيدكم مبارك

[رااايق]

المره زينتهااا حياهااا وحشمتهااا .. مشكور يارفحاوي ياعلّك تعرس ..

[الـوايـلـي]

اخوي رفحاوي صح بدنك وتستاهل كل خير ولاتنسى الذبيحه

[الـوايـلـي]

hmoud18 الله لايهينك ومشكور على ماقلت لاكن الرجيلي يبي ايهرب من سالفة الذبيحه

[الـوايـلـي]

رفحاوي000حرااااااااام عليك والله انا غلبان وماني انتحاري وليتي اسلم براسي 0

وبعدين من قال انك تسبهن بالعكس انت من المدافعين عن حقوق النساء بس وشسالفة الهنوووووووووووف والنظام القديم

[عبدالملك الشمري]

كصيدة ناكستن للمرح

ههههههههههههههههههههههههههههههههههه

بس رفحاوي الغالي ماله دخل بها

وذوقه لايعلا عليه .

و(ناقل الكفر ليس بكافر)

[رفحاوي]

مساكم انوار وسرور

الوايلي عنده زوجتين لا تقردونه انت وحمود المملوح
هاذا وصح لسانك ولسان الوايلي وعيدكم مبارك

[align=center]
له له له مو معقوووووووووول ؟!

هلا وغلا بالمملوح ابو لطمة ...

مساء الخير والنور والسرور وخبز التنور ...

عيدك مبارك وكل عام وانت بخير يالغالي ؟!

وين الغيبات ؟! لا حس ولا خبر تقول ما بيننا عيش وملح ...

صح بدنك يالغالي والوايلي دام عنده ثنتين اجل ابي اضبط العلاقة معه غديه يعلمن بالخلطة السرية ...

مشكور اخوي الغالي هرطمان بهالمرور الجميل الذي اسعدني كثيراً كثيراً ...
[/align]

[رفحاوي]

المره زينتهااا حياهااا وحشمتهااا .. مشكور يارفحاوي ياعلّك تعرس ..

[align=center]
الا العرس يا فلان ماكو عظام يشيلنن يا جاء طاريه ...

صدقت اخوي رايق المرة بدون حياء ما تسوى بصلة ...

العفو يالغالي ...
[/align]