ابو شنب جاكم يفتل شنباته

[ابو شنب]

السلام عليكم ورحمة الله وبركاته

هذا المنتدى الرائع
هؤلاء الاعضاء العظماء

خلوني افكر وافتل شنباتي وقررت احط رحالي بينكم
تابعت معكم مواضيعكم مرات كثيره عند اصدقاء ومن مقاهي واليوم شريت كمبيوتر ويوم جيت اشريه قلت اهم شيء هالكمبيوتر هو رحول زين يوصل لمنتدى رفحاء قال صاحب الكمبيوتر-مصري- الله الله يوصل ونص

وانا اسمي باسم الله والوح فوقه والله انه مابطى اللهحق طنطن له شوي اللي يسمونه مودم والله ويطنطن يوم اخذنا شوي وقال جاري الاتصال والله وشوي وهي تحدر تقول هدت شيهانه وتم الاتصال وننوخ بمنتداكم

بس عاد ابيكم تعلمونن وشلون احط الصورة تحت اسمي تعرفون اخوكم غشيم وعليمي بس راعي مقانيص وقصيد وطلعات بر والشنبات ماودك تشوفهن بالليل ينتفشن الله لا يبلى وليامن طلعت الشمس لا بالله صفن تقول جنحان عقاب فاردهن ويحوم والله حق انا مااداني الردى ولاحب العيلات فلاكن لااحد يخطي علي تروني ثورت بندق

....................
والله العزوبية احسن من رجال اليوم اللي كلن واليته مرته (يعني حرمته) تشرق به ياخواني وتغربه والله مايقول شي ولا يفتح فمه

امنت بالله يارجال 2000 ماهم شي الله لا يبلى

[رفحاوي]

حياك الله اخوي / ابو شوارب ...

على ما يقولون حللت ونزلت سهلا ... الخ .

بالنسبة للصورة ( عاد من زين صورتك ) تلقى التفاصيل بهالرابط :


http://www.rafha.com/vb/showthread.php?s=&threadid=42

اما ما يخص الحريم وما ادراك مالحريم ... هن شر لا بد منه وجربنا العزوبية بس الزواج احسن ... اهم شي انك تطيع المعزبة وما تقول لا وما تسهر برى البيت لكن داخل البيت ما بك مشكلة ...

حيث انك عزوبي وما تفهم ابي اوضح لك ... لو اخذت ورقة الاغراض ( العادة تكون اكثر من ورقة ) وبعد ساعتين جبتهن ونزلتهن قالت لك الغاز طافي ونبي بصل وطماط .... لا تزعل واكتم غيظك ورح الله لا يهنك جب طماط .

لهالاسباب اخوي نتحول من ذيابة قبل العرس وكلنا حيوية وتفاؤل الى رجال اليفين وش زيننا.

اخوي لا تضحك على رجال هالوقت ليبلاك الله وتصير مثلهم ... قل يالله لا تبلانا.

اكرر الترحيب يابو شوارب كنهن روس غربان .

[الحلوه أم قصه]

يا هلا وسهلا فيك أخوي معانا في المنتدى واحنا بإنتظار مشاركاتك معانا
تحياتي لك

[عاشقة الجهاد]

[ALIGN=CENTER][/ALIGN]

[ابو شنب]

ياهلا بالغالين

اللي حط نقط حمر تراي يابن الاجواد ماقلت شي كل اللي قلته بوصف الشنبات قدام المره (الحرمه) انهن يصيرن مثل شنبات القبطان نامق

وين الغلط ؟؟؟

هالسعوديين الله لا يبلى اليامن الواحد اطرى المره قالوا بس هذا فيه وفيه لا لا يرجال ابو شنب مايدنس

شواربه مادنقن يم الأدناس ## لا بأول الشيب ولا بالشبابي
يادنقن ياتقل يشربن من كاس ## ويا شليّدن يشدن جناح العقابي

بديت المقص قبل قولة هلا

لالا ماياجب ماياجب

ويمكن تشوفون شي ماشوفه بس عسى خير عسى خير

رفحاوي يابناخي والله توصياتك زينه بس ابو شنب مايرضابها ويسميها رخامه والعالم الله بعد الزواج اطبقها بحذافيرها مثل مايقولون هالمثقفين

ايه ايه الشكل لك عليه بس المراجل فل الفل

بعدين ماتعلمن وشلون شوارب روش غربان؟؟ ماخبر راس الغراب يلاحن للشنب الا ان كان اللون يمكن بس يمكن قصدك جناح الغراب
عسى خير عسى خير

الحلوه ام قصه ياهلا بك وانا اشوف قصتك ماشاء الله بس ماتجي مثل طرف شنبي

عاشقة الجهاد ياحلو اسمك والله انك بنت رجال على هالاسم
ماهو بنات هالوقت الاقشر اللي الوحده ماتغسل ثوبها ولاتقضي لازم والكريمات والاصباغ والملابس يادافع البلا

[رفحاوي]

اخوي / ابو شوارب ...

اول شي اعتذر لشواربك اذا جرحت احساسهن المرهف ...

ثاني شي ... اخرتك اشوفك عند المطاعم انت وشواربك مرسلتن معزبتك .

ثالث شين ... بخصوص قولي انف الذكر (يابو شوارب كنهن روس غربان ) قلبته يا فلان قبل ... ما جاء معي الا هالمدح ...

المهم يا فلان ارتحت لك حياك الله واعتبر المنتدى منتداك والله بالمواضيع الزينة واترك عنك مواضيع الخبول ( تكرم ) .

اخوك زين الحلايا / رفحاوي - شعبة نصاب سابقا - حدق الجندة حاليا

[عاشقة الجهاد]

أخي الكريم


أجمل ترحيب يهدى لأي شخص ينضم إلى ركبنا

واحترامي الشديد لك
لكن مافعل من وضع النقط عين الصواب

لعلك لم تطلع على هذا الرابط
http://www.rafha.com/vb/showthread.php?s=&threadid=3138
أو لم تقرأ شروط التسجيل جيدا مسبقا


المنتدى هنا محط أنظار أهل رفحاء خاصة والكثيرين عامة
والآداب العامة شرط أساسي ومهم في التعامل هنا فلا حاجة لنا لما يخدش الحياء أو يتعرض إلى أحدنا بالهمز واللمز

أكيدة أنا أنك لم تكن تقصد
لكن الكثير من الشباب والنساء والأطفال يمرون من هنا ويقرؤون...


أرحب بك بيننا من جديد
وأعتذر لتدخلي وتجاوزي

[رفحاوي]

اخوي / ابو شوارب ...

ترى ما قالت اختي الغالية عاشقة الجهاد هو الصحيح وعلى فكرة ترى هالبنت من افضل البنات وارجحهن عقلا اسال لها الثبات ... ومنتدانا هذا حلو وزين ونحس كاننا بين اخواننا واخواتنا والمشرفين خوش رجال لو انهم احيانا يزلقون بس اهم شي زلقة غير متعمدة ومقبولة .

اتمنى تشارك معنا باللي ينفع الجميع .

اخوك زين الحلايا / رفحاوي - شعبة نصاب سابقا - حدق الجندة حاليا

[ابو شنب]

هلا بعاشقة الجهاد بهالزمان يسمونك الارهابية

الله العالم نص كلامي مافهمتيه بسبب اللغه
وش نسوي مامعي لغه


رفحاوي يا زين الحلايا

تطلع الشمس ونشوف والاثر يدل القافي واما الخطأ مااحد سالم من الخطأ ولااحد معصوم يابعدي وعلى ماقالوا بالمثل (لاتسرق ولاتخاف) ومرضي الناس كايد وانا بزعمي اني عاقل والعاقل خصيم نفسه
عسى خير عسى خير

الا عينت علوم الرجال بهالوقت؟ حنا ماعلينا من علوم الحريم

ترى اسوالف تزين مع دن النجر وهز الفناجيل لياصرت بالبر ومع من النشامى مثلك وشرواك والصيد واجد والجو مغيم لابرد ولا حر والوقت اعصير والشمس هافه للمغيب ومحولين تزاينتو هكا المكان للنوم وهذا يركض يشب النار وهذا يحوف الدلال اللي ماكلتهن النار

هذا يقوم وشبها واعتنابه ## وهذاك بيدينه يغسل الفناجيل

وهذا ينتف الصيد ولا يصلخه وهذاك يزين القدر اللي اسود

اي بالله يارفحاوي ياملا السيل ياشعبة نصاب وحدق الجنده
الله من يوم مريناهن والشوزن متسندة على اليسرى والصقر على اليمنى والجيب غبرته تعانق السما

بها الاماكن عز الله مانت شايف اللي يضيق صدرك من اهل البنطلونات من حريم وشباب اللي واحدهم مايستانس لياما تبين العوره اما عباية مخصرة ولا كتف وغط وجهك امور ماتسر .الحمدلله برفحاء ماعندنا الا شي مايذكر مار البلا الرياض وجدة والدمام
الله ياشين شفته بالرياض امنت بالله والله يالو انها مفصخه انه استر
ياخي هم مالهم والي؟

امور لها حراديب مار خلنا بالبر والمقانيص ابرك والله ماتشوف اللي يضيق صدرك

[غشام]

حياك الله اخوي ابو شنب

[رفحاوي]

اخوي / ابو شوارب كنهن شوارب ابو زيد واذياب ...

البر برير وكله حلو ... ابي ازيد امنيتك امنية ... شفت حلو يمنك تعشيت بالنفود ( ممطورة يا فلان) وحفرت لك حفرة ونمت بوسطه يا ريت هي ازين والا يا نمت بفندق 5 نجوم ؟!

[عاشقة الجهاد]

السلام عليكم ورحمة الله


أخي الكريم

بلى فهمت وكل من قرأ لك فهم
ولا زلت تتحدث بما لايروق الكثيرين من أعضاء المنتدى الأفاضل ويخدش مشاعرهم

أنت يا أخي بهذا تحرم الكثيرين من الترحيب بك
وإلا بم تقيم 52 قراءه للموضوع مقابل 10 ردود والترحيبات فيها 5 فقط!!


أعتذر لجفاف عباراتي لكن صدركم أرحب لما قرأتم

أختكم في الله

[ابو شنب]

هلا هلا بالشرقاوي ياهلا. والله انك اطيب من ناس كثير ياهلا ياهلا

رفحاوي لا بالله النفود احسن وبعيد

عاشقة الجهاد
لاتعتذرين وليش تعتذرين اجل مايقول المثل لاتخطي ولاتعتذر والمثل الثاني يقول لاتسرق ولاتخاف

ان كانك غلطانه؟ ليش الغلط
وان كانك مانتي غلطانه؟ ليش تعتذرين

اما العدد فهو بهالحدود مار متى زاد عنه وماكلهم اعضاء بعضهم زوار وبعضهم مرار وبعضهم ماله رغبه وبعضهم وبعضهم

وهذي ياطويلة العمر على راسك الضيف يرحب به حتى لو انه خبل قاطع الجاده وحتى لو يخطي

فلاكن انتي زعلتي علشان الحريم ليه ماتقولينها بصراحه وان صابت هقوتي نص كلامي مافهمتيه ليش ؟ لاني بشرق وانتي بغرب

[الأصيله]

اختي الفاضله عاشقه الجهاد
الله يعطيك العافيه ما قصرتي

[ابو شنب]

على ايش ماقصرت يابنت الاصايل
والله انك بنت اصايل