[poem=font="Simplified Arabic,4,white,bold,normal" bkcolor="coral" bkimage="" border="double,9,sienna" type=2 line=0 align=center use=ex num="0,black"]
قالوا شتبي برفـحاء لا يامــلا البيـــن = دامك هنـــا منعم وعايش براحـــه
خلك بحــــايل استقر واقعد سنـيــــن = وتشوف خير يجيك من كل ساحــه
امـن حيـاتك شـوف مسـتقبلك ويـــن = الرزق جاء عندك رمى لك وشاحه
فـكـر بـعقلك واغتـنـم فرصتك زيـن = مو كل يومن فيه فرصه متـاحــــه
ام القـواطي انسـها تـروح بــعديـــن = وجهك على ذيـك البنى والبراحــه
وقالوا لي رفــحـاء قلنا وشبـها زيـن = لاصار هي كم بيت وكم استراحــه
ديـــرة بـــدو مـغفـليـن ومـجانيــــن = قليـل تلقى شخص زايد نـصاحــــه
دروسـهـم عنـد الغــنم والبعـاريـــن = ومايـعرفون الا زراعه وفـلاحــــه
ديـرة خـوارج لاجئيــن ومقيــميــن = وكـل الجزريه تلقى فيــها مراحـــه
قـالوا لي غير نـظرتك يالمسـيكيــن = وكانــك مـصمم والله من الديـاحــه
قلت ايـــــه ماتـدرون انتـم قديـميـن = كلامـكم ظـلم وتـجني وبـجاحــــــه
كلامـكـم عن ديـرتي قـول" يهيـــن = ولاتزعـلون ان قــلت عنـه وقاحــه
اقـبل نصايحكم على الراس والعين = بس لاتسـبوا ديـرة اهـل السـماحـــه
رفــحــاء اذا تدرون تسـوى ملايين = وتسـوى ديار" زيـنت للسيـاحـــــه
تسـوى فلل باريـس واسـواق بـكيـن = وجـوها الـطف من ابـها وباحــــــه
اشــوف حوسـتها ورود وبـساتيـــن = وحاراتـها احلى من الفيـن واحـــه
رفحاء بعيني اكـبر من أي تثــميـن = كنــه عبيـر الورد وقـت انفتاحــــه
لو غبت عن رفحاء ولو بس يومين = غصب" علي الشوق يطلق سراحه
ماانلام في حــب" سكني من سنين = اموت في رفحاء و هبة رياحــــه
حبي لهـا حــب" مشى بالشرايـيـن = حب" غرز في وسط قلبي رماحه
لوبيني وبيــنه حـصون وميـاديــن = مبطي نوى جيش الوله اجتياحـــه
ولو بيني وبيـنه بـحــر او بحريـن = امشي واقـطـع لو حتى سـبـاحــــه
احب رفــحـاء ولي فيــها محبيــن = والقلب فيــها دوم يلقى ارتيـاحــــه
فيـــها هلي وربـعي مني قريـبيــن = لاحتـجتـهـم الكـل يـرفـع سـلاحـــه
وفيها اخوياي وكلبوهم على الدين = وفيها معارف لي في كل مـسـاحــه
وفيها حبيبي طربتي كامل الزيــن = شوفـه دوا لهمـوم قلبي وجــراحـــه
وفيها وفيـها كل ماتشتهي العيـــن = صدري وانا فيــها يزيــد انشراحــه
ياللي تلوموا اركدوا يالمساكيــــن = جاكم جـواب" قلته بكـل صراحـــه
واخر كلام اختم قصيدي بقوليــن = يسـعد مسـا رفحاء ويسـعد صباحــه[/poem]