واحد هنا يبرد احمممم اقصد يروي الواقع من وجهة نظره الثاقـبـه

[سلك مجروح]

اللي يشوف العنوان هالحين يقول هذا عنده سالفه مهمه والا شيء رسمي وما يمديه يقرأ الموضوع والا يلقاه كله سوالف واحدن يفضفض < لا يكثر بس
ندخل إلى الموضوووووووع :
اشرقت الشمس ونشرت نورها الذهبي وغطت به أرجاء الأرض وإذ بالسيول الجارفة تجتاح الشوارع والبراري على حد سواء وعندها امتطيت صهوة سيارتي المتواضعه وانطلقت محلقا بها واكابد ويلات التوقف بسبب توقف المحرك على العمل فنحن في رفحاء بالشتاء شيء عادي عندنا ان ترى السيارات يمين ويسار الشوارع بسبب السيول والأمطار وهكذا دواليك مرة امشي بها ومرة تنطفئ بي حتى وصلت قصري الموقر < اما قصر إلا خرابه من ثلاث جدران وعلى شكل مثلث ما لنا بالطويله وبالقرقره الزايده بس السياره هذه من أسوأ السيارات وأردى الصناعات وأقدمها عهدا فانا لا استطيع ان اشتري سيارة جديدة فضلا على ان اقتني سيارة جيدة والسبب يعود لفترة بطالتي التي زادت واستمرت لسنوات وسنوات عديدة فانا كحال غيري من الخريجين الجامعيين الذين انقطعت بهم سبل الحياة < مساكين والله ان بعضهم يستحق الصدقه .. تخيلوا يا جماعة ان رخصه السير لدي منتهيه من كم شهر ولم استطع تجديدها والسبب يعود للبطاله سالفه الذكر .. إلا وش دخل امكم بضروفي نتركها على جنب ونخليها للاستئناس بها على قولة الشاعر والمؤلف : انتشروووماخر < اكيد مستغربين من الاسم وغريب عليكم لانه يعتبر شاعر ومؤلف في فترة مضت يا الله عدوها للي بعدها .. نجي للجانب الآخر من الموضوع < شفتوا وشلون اني اقدر استخدم عبارات ما احد يقدر عليها .. امشي كثيرا بالسياره واجد ان الشباب اللي عندنا برفحا دايما يسكرون بوجهك الشارع يا اما واقفين بجنب بعض ويسولفون والناس خذ يا عرقله من غير الشيبان اللي بعد يا الله وبالله يسوقون تلقاهم اذا صادفهم مثل هالموقف خذ يا مفاجأت مره يلف يمين ومره يسار واحيانا يطلع بشكل مستقيم ولا يوقفه إلا صدام احد سيارات هالشباب وهذا مما يميز شباب المحافظه وخصوصا عن البوفيات مثل سامي وملحقاتها .. ومرة من المرات يا ناس امشي ومعي صديق ماهو من هالديره المهم اقتربنا من الاشارة وكانت مضيئه باحد الوان الطيف وهو اللون الاخضر المشع كأنما هي فيضه مربعه < يا حبك للبر والعشب المهم يوم اني قربت من التقاطع وانا اوقف والتفت يمين والتفت يسار وبعدها قطعت التقاطع الله يقطع بليس سيارات شباب رفحا ومزحهم الثقيل هههههه لانهم ما يعترفون بالاشاره الضوئيه وانا بصراحه ماعندي ثقه باحد اخاف اني امشي ويصدمني احد هالمراهقين وينزل هو وشلته وخذ يا كفوف وشلوتيات مع حادث مجاني وساعتها اصير مثل هذيك اللي يقولون عنها مـ...... ومتروشة بجربته ( القربة هي براد ماء البدو ) نجي عاد لخويي اللي قال ليش يا يا ابو مجروح ما مشيت ؟ عسى ما شر قلت لا ابد طال عمرك انا عندي احترام للناس الآخرين واشوف اذا فيه احد وده يمشي قبلي علشان اعطيه المجال .. انا الحين اشعر بالصداع من تاثير الكوكاكولا اللي كرعتها بعد الفطور هذا الصباح اضافة لحصولي على مخالفة انتهاء رخصة قيادة واستمارة سيارة مما اثر على موهبتي الادبية ودعاني للتوقف عن الكتابة مؤقتاً حتى المساء .. انتظروني ..لنا لقاء بعد بقاء ....

[هبوب الريح]

أخي : سلك مجروح ، معاناتك زادتنا ألما وقروح ..

وموضوعك حقيقة ناقش قضايا في المجتمع مهمة ..

كالبطالة ، وتصرفات البعض في الشوارع ، وقطع الإشارات وغيرها ..

أسلوب جميل .. تعليقات ظريفة .. رسومات معبرة ..

فنفسّ عن نفسِك ، وأخرج نفسَك ولا تحبسه ..

ونحن في انتظار اللقاء ..

[سلك مجروح]

هبوب الريح المسألة لا تعدو كونها تشخيص للاخطاء والسلبيات وبعض افراد مجتمعنا فانا بالحقيقه لا اعاني البطاله ولكن ارى ان هناك افراد كثر بمجتمعهنا يعانيها ومهما عرضت من مسائل ارجو الا يظن القارئ انني مررت بهذه التجارب فليس بالضرورة ان اكون احد افراد القضيه التي اكتب عنها ودمت اخي هبوووب

[ليث]

ههههههههههه

لقد شهيتني لقطع الاشارات


اسلوبك رائع.... ولاتفشلنل قدام ضيوفنا... اقطع ولا تهاااااااااااب

[ابو مشعل]

اسلوب رائع غير ممل
ناقش بابداع و وصل الفكرة بطريقة جميلة

الف شكر

[السـًـــامـي]

أستاذي 00سلك مجروح
أرجو أن لايستمر هذا الجرح طويلا 00وأعرف أنك تحدثت على لسان من يعاني البطالة00وعرضت لنا تصرفات مشينة هي بالفعل موجودة بكثرة عند شبابنا 00ولكن ياصديقي كم كنت اتمنى أن لايرد ذلك المثل الذي المحت له 00حقيقة يجب أن نترفع عن ذكر مثل هذه الألفاظ خصوصا أنه من الممكن توصيل المرادبدون ذكر ذلك المثل البدوي المعروف0
ولك كل شكري

[نفح الطيب]

سلك مجروح

في انتظارك في اللقاء القادم

تقبل تحياتي