قصة وقصيدة اللي سرق راتب زوجته

**مدمن قهوة** · 29 Oct 2007, 08:34 AM

بس لاحد يسوي مثله ثم يجيب العيدين هههههههه

هذي قصه زوج وزوجته كانوا
عايشين في قمه الرومانسيه والحب وكانت الزوجه مدرّسه وراتبها زين
يعني من مدرسات أول يوم كانت رواتبهن عاليه ماهو مثل الحين ..!!!!!
وهذا الزوج جاء يوم من الايام وهو طفران ..
وحصل زوجته توها مستلمه المعاش و هو اللي ينبسط و يوم طلعت من
البيت . نقز للدرج اللي فيه الدراهم .. والقط سبعه الاف ريال فقط لا غير ..
المهم درت زوجته .. وازعلي واطلعي لبيت اهلها ونادت اخوها وتمردس
ببطنه وماخلى فيه عرق صاحي.. لكن الزوج بعد ماصحى
وصحصح و استصح قال هالقصيده اللي كلها شجن وعاطفه بعد ما هجرته
زوجته بدون عوده ..

<><><><><><><><><><><><><><>

لي زوجةٍ حبه يتــل المعــاليق
عرسي عليها العام باول شباطي

من روحته والزاد بالبيت ماذيق
ولا اميز العلم القوي والخراطي

بياض وجهه من بياض الغرانيق
وخدودها ياخوي مثل الطمــاطي

والصدر يزهابه عذاب العشاشيق
والردف زامي فوقه الخصر واطي

ومدرّسه مع زين كل التخاليق
وزود على هذا تعـرف الخياطي

وجابت رويتبها وصفـقت تصفيق
تسـعة الاف كلهن بالمــغاطي

وصكت عليه بغرفته بالصناديق
وغطت على صندوقهن بالبساطي

وديتها تشري قدور واباريق
وانا انطلقت للبيت يم الشناطي

واخذت سبعة الاف معهن تلاحيق
وخليت انا الف وخمس معهن افراطي

عرفت وقالت عندك اليوم ماليق
والله لوتربط برجلي ارباطي

وانا عرفت اني توهقت توهيق
يااللة يارب اتهديـن الصراطي

وقالت لخوها كل شي بتوثيق
وجاني حلال القوم راع النشاطي

ثمن ضربني ضربة تييبس الـريق
وقام وفرشني فرشتة للــسماطي

وقام يتوطاني بليا ترافيق
و يرجد علي ويمسّحن بالبلاطي

واوجس بصدري عقب ضربه حشاريق
قمت اتنفس عقبها من اباطي

لي تسعة ايام وانا بي تشاهيق
عجزت اسولف كن فيني اصقاطي

براسي صعارير اسواة الزرانيق
ومضاربٍ بالبطن مثل المقاطي

ولا ضاق صدري قمت اجمع طوابيق
و الى توسع قمت اجمع قــواطي

انا احمد الله بدّل الضوق بالضيق
والهم من راسي نزل للمواطي ..

**الرادار** · 29 Oct 2007, 10:55 AM

انا اقول ماعنده سالفه

كان راجع على الباقي (وزرطه)

والله خوش قصيدة

وياليت زوجته ترد عليه

وحذاري من الزواج من المدرسات

**البندق** · 29 Oct 2007, 01:24 PM

يعطيك العافيه

فيه الخير خلاله شوي

**القروي** · 30 Oct 2007, 04:12 PM

الحمدلله
والله مامعها حق بعد مامردغه هالمعفي المفروض ترجع له
لأنه كل مابغى يتهايق بالشنطه فطن عليه المعفي وتعوّذ من الشيطان !
قولوا لها تعود !!!
والرجال ماعاد يعود !!!
اجمل فكاهيه الله يعطيك العافيه .