قصيده رائعه

**مدمن قهوة** · 26 Nov 2007, 10:25 AM

لاتضيّع حكمة الصمـت إذا كثـر الصيـاح
واترك العالم يروحون صوب وروح صوب
وانظر بعين البصيـره تـرى الدنيـا كفـاح
ماتشـوف إلا معـارك وغالـب ومغلـوب
كل مافي الأرض من خف وإلا مـن جنـاح
كلهـم شـارد وطـارد وسالـم ومعطـوب
والطيور تطير في الجـو تحملهـا الريـاح
لكن طيور اللحـم تاكـل طيـور الحبـوب
والبشر فيهم هجومـي ولـو مالـه سـلاح
وفيهم اللي ساعة الجد ماهر فـي الهـروب
وفيهم اللي يـوم تقفـي يسـدد لـك رمـاح
ويوم تقبل يبتسـم لـك وطيـب ومحبـوب
في زمانك وين تلقى القلوب اللـي صحـاح
والمصالح تحكم الناس راضـي ومغصـوب
عندهـم تـرك العوايـد تـقـدم وإنفـتـاح
والصداقه عندهم لبس ثـوب وخلـع ثـوب
لـو بدايتهـا محـبـه نهايتـهـا جــراح
وانشد اللي عاش بيـن القبايـل والشعـوب
إختبرت النـاس بالسـر ليـن السـر بـاح
وإختبرت وجيه الأصحاب واعطوني الجنوب
كم صديقٍ كان في العين ومن العيـن طـاح
يوم جاء وقت الصداقه وميقـاف الوجـوب
أشهد إن الجود كالطيـب لـو تخفيـه فـاح
واشهد إن البخل عيبٍ مـن كبـار العيـوب
والطمع سارق يضوّي السرايق في المـراح
والفقر نهاب يدخـل يدينـه فـي الجيـوب
والسعيد اللي قنـع مـن زمانـه وإستـراح
وإنتبـه قـدام تلعـب بـه الدنيـا اللعـوب
لو صبر صبر الجوازي عن العـد القـراح
خيـر مـن دنيـا تغـره وعنهـا مايتـوب

**القروي** · 26 Nov 2007, 01:02 PM

والطيور تطير في الجـو تحملهـا الريـاح
لكن طيور اللحـم تاكـل طيـور الحبـوب
والبشر فيهم هجومـي ولـو مالـه سـلاح
وفيهم اللي ساعة الجد ماهر فـي الهـروب
وفيهم اللي يـوم تقفـي يسـدد لـك رمـاح
ويوم تقبل يبتسـم لـك وطيـب ومحبـوب

الحمدلله
فعلاً قصيده معبّره في مضمونها وقافيتها وكلماتها
لك الشكر على النقل المميّز .