أخي الفاضل:(الكاشف) تسلم والله يالغالي (كشفت) وسردت لنا أحلى الذكريات الجميلة شكرا شكرا مليون شكر.... ياالله..... ما أحلاها من حياة... بساطة .....أخوة.....مروة.... كلنا على قلب واحد والله ماقصرت نطمع منك المزيد فأنت اسم على مسمى.... لاتحرمنا الذكريات.
حبيبي( أبو طلال): والله صدقت يالغالي... الدموع أربع أربع..... شكرا لك .
أخي الفاضل( هبساوي) لك كل الشكر على مرورك.
أخي الفاضل(أبو عبدالله55):العسة والخضارين.... يقدمك..... تسلم يالغالي لك مني كل الشكر وأطمع منك المزيد.... لاتحرمنا.
حبيبنا (الحمدان) :تسلم يالغالي وفعلا أخونا الكاشف كشف وعبر لنا الذكريات بالتفصيل.
أخوي الغالي( التابلاين): أنت (ملح المنتدى) الله...... فلافل أبو يحي ....وآيسكريم بابو
ما أجمل ذيك الأيام............ أطمع منك المزيد يالغالي.
كل الشكر لمن قرأ وعلق على الموضوع وأعود إلى سرد الذكريات:-
كما ذكر أخوي (التابلاين) و(أبو عبدالله55)آيسكريم (بابو) وأحيانا يسمى ( شوكة) ذلك الرجل الباكستاني الذي يجوب الشوارع بعربته ويضرب بوري (سيكل مطورله له ثلاث كفرات وفي الوسط زي الثلاجة مليانة آيسكريم على شكل كاسات بلاستك مغلفة من أعلى بقصدير ذهبي وأحيانا أحمر ومكوناته حليب نيدو وفانيلا مجمد يصنع بالعمارة اللي بالشارع العام قرب محلات الفوزان.
أتذكر الماقف( سوق الغنم) بالشارع العام وكذلك سوق الخضار واللحوم( حاليا المكان اللي فيه فلفة والمحلات القريبة منه)
أتذكر السوق الشعبي اللي بساحة مسجد العيد القديم أمام سوبرماركت منديل الآن.... وأذكر شخص اسمه( قعيميل العنزي) من البياعين بالسوق عنده جمس قديم... وبالمناسبة شفته أمس يبيع ( عند جامع الوليد) ومازال جمسه ماشاء الله تبارك الله سليم ( الله يعطيه الصحة والعافية).
أتذكر مستشفى الشبك( مستشفى أرامكو) والحكيم (الطبيب) والنمرة: (الرقم الدائري اللي فيها سلك).
أذكر مستوصف رفحاء(مستشفى رفحاء) ومقره اللي بجنب بيت الجريسي ثم انتقل إلى بيت دحيم الثواب اللي قدم مخبز اليحي ثم تحول إلى مستشفى وانتقل إلى مقره اللي بجنب الاتصالات الآن مستشفى النقاهة وكان ذلك عام 1405هـ .
أتذكر الحفلات المدرسية التي تقام ليلا ويحضرها جميع الأهالي وأولياء الأمور كانت حفلات صح.
أتذكر دوري منتخبات المدارس ومقره مدرسة المثنى بن حارثة كرة قدم كرة طائرة كرة سلة والجماهير الغفيرة ومدراء المدارس والمعلمين وأذكر من اللاعبين: سعد الطريخم( لاعب طائرة) من المثنى عزيز جزاء( لاعب طائرة) من البراء وكنت اسمع الجمهور( جمهور المثنى) يقول: شوفوا سعد وش سوى...... خلى عزيز يتلوى.......... ومن اللاعبين مناور مسباح وصالح البيشي ونايف مسباح وحمود الغازي ومهاوش الريس والريض هندي واذكر جمهور هارون يقولون : حنا طلابك هارون ......كل واحد يسوى مليون
وكان عدد المدارس ثلاثة فقط هارون والمثنى والبراء
وأذكر إذا كان هناك صلاة استسقاء ما نروح للمدرسة
واذكر الفسحة بالمدارس في البداية عدس ورز بعلب قواطي وحليب
ثم تطورت إلى علبة كاملة لونها برتقالي وأخرى خضراء كل يوم صنف تحتوي على حليب وكيكة بالزبيب وفول سوداني و علبة أناناس يسمونها (سلطة) وعصير مر قريب فروت وجبن وبسكوت اكسترا شكولاته بيضاء لفالين طعمها سكر
وأذكر يوزعون علينا ملابس رياضة كنادر مشمع وكنادر سود وملابس صفر وأحيانا خضر تم وضع على الملابس شعار وزارة المعارف.
واتذكر حلويات شافي الخليل أبو ماضي ( الله يرحمه) مقرها الآن أمام المسطح الأخضر اللي قدام المقبرة كان يشب كل عصر بالشارع.
وأتذكر ألبان اسمها ألبان بسمة ولبن المشيقح ولبن سنابل.
وأتذكر ابن دويهم الله يرحمه اللي بيته قدام النادي ويشب بالشارع ويوزع على كل من مر بيبسي ومرندا .... عرف عنه الكرم رحمه الله.
أتذكر استراحة الراحة مرزوق وسمعه اللي بجنب الفرسان الآن.
اتذكر معرض هائل مهوس بشارع الأربعين
هذا ما لدي ولي عودة إن شاء الله تعالى ولاتحرمونا مشاركاتكم،،،