][ الكركم للنحافه ][

[شمـــاليه]

امس الزميلات تكلموا عن الكركم للتنحيف وصراحه طلعوا اكثر من وحده مجربته واعجبني الموضوع
بحثت عنه اليوم واعجبني ماوجدت كثيررررررررررر يمدحونه

ميزته انه يذيب الدهون
وقرأت كثير عنه مع الليمون يعني ..

اغلي ماء واضيف له ملقعة كركم واتركه ربع ساعه واضيف له ليمون

< وده تجرب على الدب


من سمع او جرب هالطريقه او الكركم ككل ؟

[ناصر الـشمري]

مشكوره اختي والله تعبنا وحنا نجرب اشياء خاصه بالدايت

انا واحد ذكر لي باحدى المنتديات الفاصوليه توضع بالخلاطه وتعمله نفس العصير مع كوسه

وتشرب بعد كل وجبه الناتج طلع لي من خلال استعمالي


تبون تعرفون الناتج انزل تحت

1
2
3
4
5
6
7
8
9
10
الناتج زارد وزني ههههههههه اللي يسمع اني دب

[شمـــاليه]

فصوليا وكوسه!! الحمدلله على النعمه

امس البنات يتكلمون عن الكركم حتى النحاف يشربونه عشان يحافضون على الوزن مو شرط انهم سمان
انت جرب الكركم وشوف وش يصير < لقت واحد دب وبتجرب عليه
شاكره لك مرورك

[عروووبة]

<<< تعدى عشان مايشوفه الدب
اسمعي قبل الاكل . .
( نعناع وزنجبيل وشاي اخضر وكمون ) حطيهم بكوب بماء حار يساعدن على الحفاظ على الجسم
مير شوشو تعرفين الكوب اللى له سكاكة اللى يستخدمونه بالسفر يشبه للزمزمية او المطارية حقة الماء << ياويل قلبي ياااطول السالفة
. . عندى واحد مايطلع الا بالشتاء املاه شاي . . حلو تحطين به الخلطه هذي حتى يحافظ على المواد الطياره اللى بالاعشاب ماتطير . .
أما الكركم ما نعرفه الا للصفار اللى يصير عند المواليد . . اما للتنحيف ماعنديش خبر

[شمـــاليه]

هلابتس عروبه ايه اعرفه الزمزيه اللي على شكل كوب عندي زيه ايام الشتاء والنقل يوم كنت بعيد
احط به كوفي < مدمنه

الدب قال عن الزنجبيل والكمون بس ابي الكركم امس يمدحووووووووووووووونه
وفيه معلمات اجسامهن حلوه يقولن نشربه عشان اذا كلينا شيء دسم او دهن كثير لانه يذيب الدهون
شكلي بجرب والله

[عروووبة]

^
^
والله ياشوشو ان ماعندى خبر
مير الله العالم انه له دخل بالبنكرياس او الطحال ( المهم حديهن ))
لآن الطفل يقلبن عيونه صفر ويعطنه الحريم كركم مع سكر نبات يومين وتختفى الحالة
خوف قلبي تقلبين صفراء . . مير اذا مجرباته هن وما صار بهن شي . . جربي
ثم ابحثي اكثر بالنت . .

[عروووبة]

http://www.feedo.net/alternativemedi...icbenefits.htm

[شمـــاليه]

ايه عروبه هذا اول شيء طلع لي يوم بحثت واعجبني
انتي شرايتس

[ناصر الـشمري]

اقول انتم ليش مطولين السالفه انا اليوم اجرب حقكم الكركم مع الزنجبيل مع الشاي الله

يعيني تكفون خلو المستشفى يجهزون سرير مع الواسطه تكون غرفه خاصه

انتم اعطوني الوصفات وانا اجرب ماعليكم بالحكي هههههههه بايعه ههههههههههه

احذر كاتب على يده شيهانه وعروبة اعطوني كركم لكي اطول اكفش غزم ههههههههههههههه

[شمـــاليه]

هاه وينك جربتوه لو لا ؟

[الدب الداشر]

ساعة رجيم كيميائي , وساعة رياضة ونادي , وساعة كركر مدري كركم

ارسي على بر عشان نرسي معك ..


عروبة شغلي الددسن ووراها لين تنحف هالبطه ..





,
,
,



شماليه الله يرضالي عليك .. والله حرام تشغلين نفسك بهالخزعبلات النسائية ..
والله , والله , والله .. اذا كان فيه نتائج فهي ضئية جدا ً لا تستحق مرارة طعمها ... ولا فيها لذة للتحدي ولا قوة في العزيمة ولا لها شرف محاولة ...


لا صابون كركم .. ولا الشيخ كركم براسه .. ولا بدلة سونا .. ولا خل تفاح .. [glint]ولا ولا ولا[/glint] ..

كلها مساندات يبقى الأصل ( تنظيم غذائي + رياضة ) ..

شبه الغذاء والرياضة وبقية الادوات .. إلى التخسيس كشبه الروح والجسد الى بقية الاضافات .. كالملابس والعطورات والاحذية وغيرها ..

[glint],
[/glint]
اريحي عقلك واستسلمي للشحوم حتى تنفجر اطرافك ..

ولكن !!

من الآن .. لا تقولي لماذا يا رب جاءتني الأمراض وهجرتني الصحة ..

صدقيني انك ستعودي لقراءة هذا الرد في يوم ٍ ما .. وتشتاقي لصحتك ..

ربما غدا .. او بعد اربعة أشهر .. او ثلاث سنوات .. لا أعلم .. ولكن تذكري ان هناك أخو ٌ لك .. قدم لك نصيحة بالمجان .. أسمه الدب الداشر ..

لن تنسي كلامي هنا أبدا ً .. إن غيرك فهو سبب .. وإن أنذرك فهو رسول .. وفي كلا الحالتين لن تنسيه ..

[شمـــاليه]

طيب واللي يقولك انه نزلت ثلاثه كيلو في اسبوع؟؟

[الدب الداشر]

طيب واللي يقولك انه نزلت ثلاثه كيلو في اسبوع؟؟

اقول لها .. إذا أنتي صادقة , وش حاجة الكركم أجل ؟

[شمـــاليه]

لها اسبوع تستخدم الزنجبيل والليمون والكمون مع النظام الغدائي مع المشي فقط..
بالاضافه الى الكركم من كم يوم

[عروووبة]

واللى يقولك من كثر ماتهذرين بالسمنة
زاد 3 كيلوااا في اسبوع
.
.
عقلى الباطنى خززن كلامكم بالريوس
كع كع