مليون يصرف في براطم بعارين

[شامي الدهيمان]

البارحه مانمت ضايـق ومغبـون
عيّــو علي بالنوم نـاس غشيمـه

ناسٍ بفعله تغضب الرب وشلـون
بأسبابها خشاش الصحاري سقيمه

زملٍ عليه العفش ومحزم عيـون
قـام يتخبـط وانتثـر بالعتيمـه

وين الرجال اللي من الله يخافون
وين الرجال اهل العقول الحكيمـه

البل عطايا الله لها عشق مجنون
مـا غيـره زودٍ ونقـصٍ بقيمـه

يامغلين الـذود تكفـون تكفـون
ما للفسـق إلا عواقـب وخيمـه

مدري جهل بالديـن والاتعرفـون
والا هياط ونفعهـا ظـل غيمـه

تباشرو بيناتهـم جـاك مزيـون
كنــّـه يبشّـر بالعـراق العظيمـه

ناسٍ توكل طفلها خبز!! بـ ديون
ومليون يصرف في براطم بهيمـه

إن كانكم للخير والطيب تشـرون
ياكثرهم أهـل البـزور اليتيمـه

شوفو عزيزٍ داخل الحبس مسجون
مسجون من كثر الكرم والحشيمه

وألا عجوزٍ ضامها الوقت والهون
ضناه واحد!! رافضاتـه حريمـه

الجود والاحسان والرفق والعـون
أربع ماهي بدروبكـم هالعقيمـه

ياليتكم ناسٍ حريصيـن وعفـون
ولا نعمة تنكب عسى الله يديمـه

انا بدوي في سلمنا حيل مفتـون
اذواد نملـك بالسنيـن القديمـه

يوم إنها مابين طاعن ومطعـون
نـذود عنهـا ماخذوها غنيمـه

يالايمي لو لك معاويـن ومتـون
ما زعزت شخص فرد بالشكيمـه

الحمد لله دايـم إبليـس ملعـون
النفس تصبر لو ظـروف أليمـه

تبطي ويبطي من بنا عمره ظنون
اموت لكـن ماتشـوف الهزيمـه


لشاعر / عبدالله فهاد البجيدي

صح لسانه والله لا يؤاخذنا بفعلهم

إن شاء الله تعجبكم

[أرطبون العرب]

صح لسان الشاعر وعاش ناقلها

*بس الخـط صغير . حيل

[شامي الدهيمان]

صح لسان الشاعر وعاش ناقلها

*بس الخـط صغير . حيل

الله يسلمك .......

العذر والسموحة .. ما انتبهناااااااا للخط

يرفع للعمه شمالية لتعديل الخط

[همّام]

صح لسان الشاعر

ولسان الناقل

شيء جميل أن يرفض المجتمع هذه التصرفات

[شامي الدهيمان]

وشي جميل إن اراك هناااااااااااااا

شاكر مرورك

العاقل هو من يرفض

دمت بخير

[إحسـاس]

كما قال اخي همام رفض المجتمع لهذه التصرفات شيء مفرح

جزى الله شاعرها خير الجزاء وللسلهومي تقديري

[شامي الدهيمان]

حياك احساس

منورة طال عمرك

[عقارب]

البل عطايا الله لها عشق مجنون
مـا غيـره زودٍ ونقـصٍ بقيمـه

يامغلين الـذود تكفـون تكفـون
ما للفسـق إلا عواقـب وخيمـه

مدري جهل بالديـن والاتعرفـون
والا هياط ونفعهـا ظـل غيمـه

تباشرو بيناتهـم جـاك مزيـون
كنــّـه يبشّـر بالعـراق العظيمـه



صح لسان الشاعر ولسان الناقل

والله لا يهينك يا السلهومي

[شمـــاليه]

لو انت سامع خالي يوصف نياقه تقول وش هالمزيونه اللي مامثله
صح لسان شاعرها ولاهنت على النقل