أحسن جمري في العالم .. ( صور في الداخل )

[ريانه]

مساء الشبّة .. صباح المشراق
واللي مايعرف المشراق يسأل عنه


تذكرون لما قلت لجدي خلينا نطلع البر واسوي لك جمري
رد علي وقال : هه ( وهز راسه ) وقال إذا طلعنا للسطح .. انتم ماوراكم بر

من يومها وانا مبيته النيه أني اسوي له جمري على قولة اهل رفحاء ..وقرص جمر على قولتنا
وجمري وإلا قرص جمر كله واحد على قول المثل ( صبه حقنه لبن ) ..

وبما أني وحدةٍ ماحب كثر الحكي بعطيكم الصور

بس خلوني اول احكي لكم السالفه << هذي اللي ماتحب كثر الحكي
كنت معزومه يوم الخميس جتني رساله ( تبين تروحين البر بكره ؟ ) رديت أأأأأيه
جاني الرد تولمي الساعه سبع الصباح وهاتي معك اي شي يحرك الضرس

لاحول الله ..وين اجيب منه هالحين الساعه وحده الليل ..والصباح كل شي مقفل
المهم جبت معي نواشف للفطور وشاي وقهوه وطحين وقصدير << عشان الرجّال

رحنا مكان روعه .. وصورت لكم من مشينا الى ان رجعنا
وتوته توته خلصت الحدوته ..

واحنا في الطريق شفنا جمل ابو سنامين ووقفنا عشان نصوره << مسوين سياح



اول ماوصلنا فرشنا وبعدها تقهوينا << وش رايكم في المشمش المجفف تراه حقي

















صوره للمكان الجميل







عاد الفطور نواشف وعدس وقلابه وحنيني











وتعرفنا على شاي الكرك ..شي لايفوتكم










هذا غدانا الله يعافي من طبخه وكله ..رز ومرقوق




يتبع

[ريانه]

طريقة عمل الرجّال >> عاشت السكسوكه
هههههههههههههههه

















طبعا ً رفضوا القصدير
بحكم ان التراب في وجه العدو افضل من القصدير واقل ضرر
<< مقتنعه بقووه



الرجّال بعد الذبح وتقطيعه حته حته




صوره مع اداة الجريمه



رجم مطوّر


صوره ارض جو





يتبع اصبروا شوي

[ريانه]

الرحله كان غير مرتب لها ..خالي قال ماعليكم كل شي في العزبه بس اطلعوا
الادوات كلها من عزبة الشباب ..حتى الفرشه لك عليها :(
مافيه سفره والملح خلص بس ملحنا فينا يكفي وزياده
انبسطنا مرره وجدي عجبه الجمري وقال المره الجايه حطوا معه سمن وتمر
قلت له وين في السطح
خخخخخخخخخخخخخخخخخخخخخخخخخخخ


اتوقع فيه سؤالين للنبيه منكم .. ونتريا ونشوف من يجيبها


* وش رايك ياراعي الجمري في جمرينا ..



اختي الجميله جابت هالحطبه وماسكتها بمنديل لايعور يدها ..>>يااااااي ههههه

راحت تتمشى مع امي وجابتها فرحاانه
قلت لها هذي رطبه وخضراء ( فيها ورق اخضر ) كاسرها السيل ماتصلح
<< ماتدري اني كنت بجيبها وخالي علمني انها ماتصلح وانا عاد اتفلفس عليها



وسلامتكم ..يله انطلقوووا

[ابو متعب]

ما قصرتي بجدك ريانه والله يوفقه

بس الجمل ابو سنامين كيف ووشلون ومنذ متى يعيش معنا هنا؟

رحلة سعيدهـ

[ريانه]

مدري وانا اختك
انا اللي اعرفه ان ابو سنامين في استراليا مدري وش غير الدنيا وجابه عندنا ..مدري
بس هو في مكان مسوّر ..اتوقع ان هالمكان مزرعة بعارين على وزن مزرعة اسماك

حياك الله خيوو

[ابومحمدالزوبعي]

ماشاء الله صراحة طلعة بر رائعة والجو أروع

أما الجمري لي تحفظ عليه

يعطيك العافية أختي على التقرير الرائع

[ريانه]

^
^
الغيره تسوي اكثر
ههه ههه ههه هاها

وش فيه الجمري ؟

[الوسام]

يعطيك العافيه اختي ريانه ونصيحه لو كانت الرحلة بدون صور كان افضل صراحه التوسع والتوثيق في مثل هذي الامور يجر للكشف عن شخصية العضوه لبعض ضعاف النفوس

[عقارب]

الله يعطيك العافيه على التقرير


واشوف تقل بالارض طين


تقرير جميل يا ريانه



ولكن سؤال


انتي كليتي من الجمري....؟

[عمار الزيادي]

رحلة جميلة ورائعة ..

والجمري .. أيضاً شكله لذيذ ..

ومن الممكن إصلاحه بعدة طرق .. منها

لفه بالقصدير .. بعد وضع طحين بينه

وبين القصدير لمنع الالتصاق ..

ويمكن .. دعكه مع الزبدة أو السمن البري

والبصل ويكون البصل مقطع قطع صغيره ..

وداخل قدر ويوضع على النار لفترة قليلة ..

فيه ناس يحطون معه سكر حسب الحاجة ..

أمممممم .. طعمه لذيذ بشكل ..

شكراً ريانه ..

[قهر الرجــــال]

صور روعة
لكن للأسف .. اصبحت من عشاق البيت ..وذلك خوفا من الحشرات الطائرة والزاحفة , مدري وش جاني صرت اخاف حتى من الذبانة
أحسها تعض

أما الحطب اذكر سالفة للوالدة الله يطول بعمرها ... مانخرج نتمشى الا وهي معشقة الدبل وطالعه بالجبل تجيب حطب ..ومرات في الشجر ..عاد أنا وخواتي
نقول لها انزلي الله يحفظك مانبي حطب تمسك فينا ريحة الدخان <<< اوخص ياجيفنشي وغوتشي
المهم ماتابت الين طاحت يوم ..الله يعافيها ..وبغت تجيب العيد ..الى يومك ذا وأنا اقول لها تذكرين يوم طحتي هههههههه وتلفعني بشبشبها

مشكورة ريانة

[صادق الاحاسيس]

الله الله


طلعه حلوووووه

[شمـــاليه]

ماشاءالله طلعه جميله..
بس انا احب النفود ما احب الحصى
ينطيتس العافيه
ودي اصور جمري ماي فاذر هو اللي يزبطه لنا الله يطول بعمره

[همّام]

شكرا لك أختي ريانة على هذا التقرير ومشاركتنا للرحلة

حلو البعير الغمارتين هذا
ما شاء الله باين انه عايش بخير

[غزلان]

مشكوره ريانه على التقرير الحلووووووو
الصور رووووووعه
الله يونسكم بالعافيه